اۋىل شارۋاشىلىعى قۇرىلىمدارىندا 160 مىڭ تراكتور, 5 مىڭنان استام جوعارى ءونىمدى ەگىس كەشەندەرى, 78 مىڭ سەپكىش جانە 226 مىڭ توپىراق وڭدەۋ قۇرالدارى بار. تەحنيكانىڭ بارلىعى دەرلىك جاپپاي ەگىس جۇمىستارىنىڭ باستالۋىنا تولىعىمەن دايىن.
كوكتەمگى ەگىس ناۋقانىن وتكىزۋگە وڭىرلەرگە 413 مىڭ توننا جەڭىلدىكتى ديزەل وتىنى ءبولىندى, بۇل وتكەن جىلعى دەڭگەيدەن 13 مىڭ تونناعا ارتىق.
وپەراتورلاردىڭ شىعىستارىن ەسكەرە وتىرىپ, رەسپۋبليكا بويىنشا اۋىل شارۋاشىلىعى تاۋارىن وندىرۋشىلەر ءۇشىن ديزەل وتىنىنىڭ ورتاشا قۇنى 204 تەڭگە/ليتردى قۇرايدى, بۇل نارىقتىق باعادان 15-20 پايىزعا ارزان. بۇگىنگى تاڭدا وڭىرلەرگە شامامەن 163 مىڭ توننا وتىن نەمەسە جوسپاردىڭ 44 پايىزى جونەلتىلدى.
بيىلعى جىلدان باستاپ ەگىسكە بولىنەتىن ديزەل وتىنىن ماقساتسىز پايدالانۋدى بولدىرماۋ ءۇشىن وپەراتورلارعا ءموز-دەن جونەلتۋ ەلەكتروندىق شوت-فاكتۋرالاردىڭ اقپاراتتىق جۇيەسىندە جەكە ۆيرتۋالدى قويما قۇرۋ سونداي-اق ارنايى بوياعىشتار قوسۋ شارتىمەن جۇزەگە اسىرىلادى. بۇدان باسقا, اۋىل شارۋاشىلىعى جۇمىستارىنا تيەلەتىن ديزەل وتىنىنىڭ كولەمىنە ءموز-گە جەكە پين-كود بەرىلەدى.
بيىلعى جىلى 700 مىڭ توننادان استام تىڭايتقىش ەنگىزۋ جوسپارلانعان, ونىڭ 63% وتاندىق اممياك سەليتراسى مەن امموفوسقا تيەسىلى. بۇگىنگى تاڭدا كوكتەمگى ەگىس جۇمىستارىن جۇرگىزۋ ءۇشىن شارۋالارعا 177,3 مىڭ تونناسى جونەلتىلدى. جەرگىلىكتى بيۋدجەتتەردە تىڭايتقىشتاردى ساتىپ الۋدى سۋبسيديالاۋ باعدارلاماسىنا 31,3 ملرد تەڭگە قاراستىرىلعان.
