ۇستەرىنە ارنايى تىگىلگەن جۇمىس فورماسىن كيىپ, ەگىن سەبۋ ناۋقانىنا اتتانىپ بارا جاتقان جاستاردى ءبىلىم ورداسى سالتاناتتى تۇردە شىعارىپ سالدى.
سالتاناتتى شارادا ۋنيۆەرسيتەتتىڭ باسقارما توراعاسى - رەكتور, قر ۇعا اكادەميگى قانات مارات ۇلى تىرەۋوۆ ارنايى جاساق قۇرامىنا ءساتتى ساپار تىلەپ, ەلىمىزدىڭ اۋىل شارۋاشىلىعى سالاسىنا ەرەكشە ۇلەس قوساتىندىقتارىنا سەنىم بىلدىرە وتىرىپ جاستاردى جىگەرلەندىردى.
«بۇل «ستۋدەنتتىك مەحانيكالاندىرىلعان جاساقتاردى» قايتا جانداندىرۋ جۇمىستارىن ءبىزدىڭ قازاتزۋ ارنايى تۇردە قولعا الىپ وتىر. ەڭ ءبىرىنشى مەحوترياد قۇرامىنداعى ستۋدەنتتەر وزدەرىنىڭ كاسىبي دايىندىعىن جەتىلدىرەدى. سونىمەن بىرگە جاستار اۋىل شارۋاشىلىعى كاسىپورىندارىنا كوكتەمگى ەگىس جۇمىستارى مەن كۇزگى استىق جيناۋ, جەم-ءشوپ دايىنداۋ ناۋقاندارىن تابىستى جۇرگىزۋگە كومەك كورسەتەدى. تاريحتان بەلگىلى ەلىمىزدە «مەحوترياد» ءوز زامانىندا ەلىمىزدىڭ بارلىق وڭىرلەرىندە جاساقتالىپ وسىنداي ۇلكەن ناۋقاندار كەزىندە زور ۇلەس قوستى. بولاشاقتا ءبىز بۇل جاساق قۇرامىن ۇنەمى مولايتىپ وتىرامىز», دەدى ول.
بۇگىندە ەلىمىزدەگى تەحنيكالىق جوعارى وقۋ ورىندارى الدىنا ءوز ستۋدەنتتەرىن جۇمىسپەن قامتۋ ماسەلەسى قويىلدى. وسىعان وراي, ەلىمىزدىڭ اگروتەحنيكا سالاسىنداعى بەلدى وقۋ ورنى – سەيفۋللين ۋنيۆەرسيتەتى ۇمىت قالعان مەحانيكالاندىرىلعان جاساقتاردىڭ جۇمىسىن قايتا جانداندىرىپ, تۇلەكتەردى ۋنيۆەرسيتەت قابىرعاسىنان باستاپ جۇمىسقا دايىنداپ وتىر.
سەيفۋللين ۋنيۆەرسيتەتىنىڭ العاشقى جاساعى ءساۋىر ايىنان باستاپ سولتۇستىك قازاقستان وبلىسى «سولتۇستىك قازاقستان اۋىلشارۋاشىلىق تاجىريبە ستانتسياسى» جشس-عا جانە قاراعاندى وبلىسى, نۇرا اۋدانى, «شاحتەرسكوە» جشس-عا «اگروينجەنەريا» بويىنشا وندىرىستىك تاجىريبەدەن ءوتۋ ماقساتىندا جۇمىسقا اتتانادى. ازىرگە 50 ءبىلىم الۋشىلاردان قۇرىلعان مەحانيكالاندىرىلعان جاساق ءوز جۇمىسىن باستاپ تا كەتتى.
«كەڭەس وداعى كەزىندە ەرەكشە بەلسەندى جۇمىس اتقارىپ ەل اۋزىندا «مەحوترياد» دەگەن اتپەن تانىلعان ستۋدەنتتەردەن قۇرالعان جاساقتار سول ۋاقىتتا وداقتىڭ ءىرى جوبالارىنا قاتىسىپ, جالپى ەكونوميكانىڭ ورلەۋىنە ەلەۋلى ۇلەس قوستى. ءبىر مەزگىلدە قۇرامىندا 300-400 ستۋدەنت بار ونداعان مەحانيكالاندىرىلعان جاساقتار قۇرىلىپ, وداقتاعى بارلىق مەملەكەتتەرگە اتتانىپ وتىرعان. ولار كوبىنە, ەلىمىزدىڭ استىقتى وڭىرلەرىنە جەرلەردى يگەرۋ كەزىندە اۋىلشارۋاشىلىقتىڭ جاندانۋىندا ماڭىزدى ءرول اتقاردى. مەن ءوزىم دە وسى سەيفۋللين ۋنيۆەرسيتەتىنىڭ ستۋدەنتى بولىپ جۇرگەن شاعىمدا تالاي رەت وسى وترياد قۇرامىندا بولدىم», دەيدى ۋنيۆەرسيەتتىڭ ءبىرىنشى پرورەكتورى ايتجان ءابدىروۆ.
قۇرامنىڭ بارلىق مۇشەلەرىنە ارنايى تىگىلگەن جۇمىس كيىمدەر ۇلەستىرىلەدى. بارلىق قاجەتتى قۇرالدارمەن قامتاماسىز ەتىلگەن جاساق, ۋنيۆەرسيتەت الدىنان جۇمىس ورىندارىنا اۆتوبۋستارمەن اتتاندى.
ءبىر ايتا كەتەرلىك جاعداي, جاستار بەلسەندى جۇمىس ىستەۋى ءۇشىن جاتىن ورىن, تاماقتانۋ, تۇرمىسقا قاجەتتى زاتتاردىڭ بارلىعى جۇمىس بەرۋشى تاراپىنان تەگىن ۇيىمداستىرىلىپ وتىر.
بەردىبەك حاباي
