مەملەكەت تاراپىنان ءسۇت ءوندىرىسىن ەسەلەۋ ءۇشىن ايتارلىقتاي قولداۋ كورسەتىلىپ جاتىر. ناتيجەسىندە, كورسەتكىش وتكەن جىلمەن سالىستىرعاندا 1,6 پايىزعا ارتتى. البەتتە, مۇنىمەن توقتاپ قالۋعا بولمايدى. الداعى ۋاقىتتا تىندىراتىن تىرلىك از ەمەس. ويتكەنى ءوڭىر باسشىسى نۇرجان نۇرجىگىتوۆ ءسۇت ءوندىرىسىنىڭ اياسىن كەڭەيتۋگە ايرىقشا ءمان بەرىپ وتىر.
ءسۇت ونىمدەرىن وندىرۋدە باۋىرجان مومىش ۇلى اۋىلىندا ورنالاسقان «Ali-Ko Sut» شاعىن ءسۇت تسەحىنىڭ دا ايتارلىقتاي ۇلەسى بار. مۇراتبەك نىسانوۆ باسقاراتىن تسەح جۇمىسى جىل وتكەن سايىن ءونىم كولەمىن ارتتىرىپ وتىر. جاڭا ءىستىڭ كوزىن تابۋعا ۇمتىلعان كاسىپكەر 2021 جىلى شاعىن تسەح اشقان.
ء«سۇت وڭدەيتىن تسەحقا قاجەتتى اپپاراتتاردى رەسەي فەدەراتسياسىنان 25 ميلليون تەڭگەگە ساتىپ العانبىز. مۇزداتقىش, ءسۇت, قايماق پاستەرلەۋگە ارنالعان اپپاراتتار, سەپەراتور, م ا ي دايىندايتىن اپپارات جانە وزگە قۇرىلعىلارىمىز جەتكىلىكتى. تسەحتى اشۋ ءۇشىن شامامەن 40 ميلليونداي قارجى جۇمسادىق. ارينە, كىرىس كىرۋى ءۇشىن الدىمەن شىعىندانۋعا تۋرا كەلەدى. باستىسى تسەح جۇمىسى بۇگىندە ايتارلىقتاي ناتيجە بەرە باستاعانى كوڭىل قۋانتادى», دەيدى م.نىسانوۆ شاعىن ءسۇت تسەحىن اشۋ وڭايعا سوقپاعانىن ايتىپ.
كاسىپكەردىڭ ايتۋىنشا, تسەح جۇمىسىن جۇيەلەۋ ءۇشىن جەرگىلىكتى مامانداردى جۇمىسقا تارتقان. ولار ءوز كەزەگىندە اۋىسىممەن ەڭبەك ەتەدى. ال مۇندا وندىرىلگەن ءونىم نەگىزىنەن ىشكى نارىقتى قامتيدى.
ء«بىز مامانداردى تاڭداۋدا جەرگىلىكتى تۇرعىندارعا باسىمدىق بەردىك. بۇگىنگى كۇنى اۋىلدىڭ جەتى بىردەي ازاماتى تۇراقتى جۇمىسپەن قامتىلعانىن ايتا كەتكەن ءلازىم. ولار تيىسىنشە اۋىسىممەن جۇمىس ىستەيدى. ورتا ەسەپپەن جالاقىلارى 100 مىڭ تەڭگەدەن جوعارى. ءبىر قۋانىشتىسى – جۇمىسقا قابىلدانعان ازاماتتاردىڭ بارلىعى ءوز ءىسىن جەتىك بىلەتىن ماماندار. سوندىقتان جۇمىس بارىسىندا ايتارلىقتاي ماسەلە جوق.
تسەحتا تەحنولوگ, زەرتحاناشى, ماي دايىنداۋشى, ءسۇت قابىلداۋشى سەكىلدى ماماندارمەن بىرگە ءارتۇرلى جۇمىستاردى جۇزەگە اسىراتىن قىزمەتكەرلەرىمىز بار. ولار جۇمىسقا ارنالعان ارنايى كيىممەن تولىقتاي قامتىلعان. باستىسى, سانيتارلىق تالاپتار, تەحنيكالىق قاۋىپسىزدىك سەكىلدى ەرەجەلەر قاتاڭ ساقتالعان. قىزمەتكەرلەردىڭ ءوز ىسىنە اسقان جاۋاپكەرشىلىكپەن قارايتىنى قۋانتادى», دەيدى كاسىپكەر.
م.نىسانوۆتىڭ ايتۋىنشا, تسەح قىزمەتكەرلەرى اۋدانعا قاراستى اۋىلداردان تاۋلىگىنە 1,5 توننا ءسۇت قابىلدايدى ەكەن. تسەحتا وندىرىلگەن ونىمدەر اۋدان ورتالىعىنداعى دۇكەندەرگە وتكىزىلەدى. سونىمەن قاتار تاراز جانە الماتى قالالارىنا جونەلتىلەدى. بۇگىندە ىرىمشىك, ماي, قايماق ءوندىرىپ وتىرعان كاسىپكەر الداعى ۋاقىتتا ايران مەن سىر ءوندىرۋ جۇمىستارىن قولعا الۋعا بەكىنىپ وتىر.
سالادا شيرەك عاسىرلىق ەڭبەك ءوتىلى بار تەحنولوگ تاتيانا جۋكوۆسكايا ءونىم ءوندىرۋدىڭ وزىنە ءتان ماشاقاتى مول ەكەنىن ايتادى. راسىندا دا تەحنولوگ ماماننان باستاپ, بىلەك سىبانىپ تەر توگىپ جاتقان وزگە مامانداردى كورگەندە جۇمىس ۇدەرىسىنىڭ وڭاي ەمەستىگىن بىردەن تۇسىنەسىڭ. ءسۇت قابىلداۋ كەزەڭىنەن باستاپ, ءسۇت وڭدەۋ ۇدەرىسىنىڭ باسى-قاسىندا جۇرەتىن مامانداردىڭ ەڭبەگى ادال.
ءيا, تسەحتىڭ ءبىر بولىگىندە قۇرت, ەندى ءبىر بولىمىندە سۇزبە, ىرىمشىك جاساپ جاتقان قىزمەتكەرلەردىڭ ماڭايىنا مويىن بۇرۋعا مۇرشاسى جوق ەكەندىگى كورىنىپ-اق تۇر. «ادال ەڭبەك ءبارىن جەڭبەك» دەگەننىڭ ءمانىن وسىندايدا تۇسىنەسىڭ. جۇمىسى جولعا قويىلعان شاعىن تسەحتا باسقا دا ونىمدەردى وندىرەتىن كۇن الىس ەمەس. وعان كۇمان دا جوق.
جامبىل وبلىسى,
جۋالى اۋدانى,
باۋىرجان مومىش ۇلى اۋىلى
