دەگەنمەن بىزدەگى كوممەرتسيالىق يپوتەكا ايتارلىقتاي قىمبات بولىپ شىقتى. مىسالى, قالىپتى يپوتەكانى, ياعني بانكتەردىڭ سەرىكتەس باعدارلامالارى مەن جەڭىلدەتىلگەن مەملەكەتتىك باعدارلامالارىنا كىرمەيتىن جانە تۇرعىن ءۇي قۇرىلىس جيناق جۇيەسىنە جاتپايتىن يپوتەكالىق نەسيە بەرۋمەن بىزدە 12 ەكىنشى دەڭگەيلى بانك اينالىسادى. بۇل سەگمەنتتەگى ەڭ تومەنگى جتسم 14,9%-دان («تسەنتركرەديت بانكى») 26,5%-عا (قازاقستانداعى قىتاي بانكى) دەيىن اۋىتقيدى. بۇل مولشەرلەمەلەردىڭ جوعارىلىعى سونشا, اتالعان تاسىلمەن ءۇي الاتىن قازاقستاندىقتار تىم از.
سونىمەن قاتار كەيبىر بانكتەر ءوز ونىمدەرىن جەتىلدىرىپ, سەرىكتەس باعدارلامالار ازىرلەيدى. قازىر ەلدەگى 4 بانك قۇرىلىس كومپانيالارىمەن سەرىكتەس يپوتەكا ۇسىنىپ وتىر.
«بۇل سەگمەنتتەگى ەڭ تومەنگى مولشەرلەمەنى Altyn Bank ەكى مينۋتتا ماقۇلدايتىن تسيفرلىق يپوتەكانىڭ بولىگى رەتىندە BI Group-پەن بىرلەسكەن «وڭاي» باعدارلاماسىن ۇسىنادى: نەسيە مەرزىمىنە بايلانىستى جتسم 0,1%-دان باستالادى. سونىمەن قاتار بانك ناۋرىز ايى بويى اكتسيا وتكىزىپ, مولشەرلەمەنى 4,5%-عا تومەندەتەدى. ودان كەيىن BI Group-پەن بىرلەسكەن يپوتەكالىق باعدارلاما ۇسىناتىن, جتسم 0,2%-دان باستالاتىن «فريدوم فينانس بانك» تۇر. «تسەنتركرەديت بانكىندە» قۇرىلىس كومپانيالارىمەن سەرىكتەس باعدارلامالارى اياسىنداعى مولشەرلەمە 5%-دان باستالادى (جتسم 5,1%-دان باستالادى). Halyk Bank-تە BI Group-پەن بىرلەسكەن باعدارلاما بويىنشا مولشەرلەمە 4,6%-دان باستالادى (جتسم 6,7%-دان باستاپ), ال Bazis-A-دا – 18%-دان باستاپ (جتسم 20,4%-دان باستاپ)», دەپ جازادى Ranking.
ءتورت بانكتىڭ ۇشەۋى – Altyn Bank, «تسەنتركرەديت بانكى» جانە Halyk Bank – تۇرعىن ءۇي قۇنىنىڭ 20%-ىنان باستاپ, فريدوم فينانس بانكى – 30 پايىزدان باستالاتىن باستاپقى جارناسىن سۇرايدى. Altyn Bank جانە Halyk Bank-تە يپوتەكانىڭ ەڭ جوعارى مەرزىمى – 240 ايعا دەيىن, «تسەنتركرەديت بانكى» مەن «فريدوم فينانس بانكىندە» – 180 ايعا دەيىن.
يپوتەكانىڭ ەڭ ۇلكەن ماكسيمالدى سوماسىن «فريدوم فينانس بانكى» (200 ملن تەڭگەگە دەيىن), ودان كەيىن «تسەنتركرەديت بانكى» (100 مل تەڭگەگە دەيىن) جانە Altyn Bank (80 ملن تەڭگەگە دەيىن) ۇسىنادى. Halyk Bank شەكتى سومانى كورسەتپەدى.
سونىمەن قاتار بيىل جىل باسىندا تۇرعىندارعا تۇرعىن ءۇي سالۋعا جانە ساتىپ الۋعا بەرىلگەن نەسيەلەر (يپوتەكالىق نەسيەلەر) 4,86 ترلن تەڭگەنى قۇرادى, بۇل ءبىر جىل بۇرىنعىدان 39,3%, ال ون جىل بۇرىنعىدان بىردەن 5,3 ەسەگە ارتىق. بۇل قازىردىڭ وزىندە ەل ەكونوميكاسىنا بەرىلگەن بارلىق نەسيەلەردىڭ 21,3%-ىن قۇرايدى, ءبىر جىل بۇرىن كورسەتكىش – 18,9% جانە ون جىل بۇرىن 9,2% عانا بولعان.
