ينۆەستيتسيالىق تابىستىڭ ىقتيمال تەرىس ماندەرىن جەكەلەگەن ۋاقىت ارالىقتارىندا نيۆەليرلەۋ ماقساتىندا ينۆەستيتسيالىق تابىس مولشەرلەمەسىن ەسەپتى كەزەڭگە وتكەن 18 جىلداعى ورتاشا جىلدىق ءمان نەگىزىندە ايقىنداۋ جوسپارلانىپ وتىر. 18 جاسقا دەيىنگى بالا ءۇشىن بولجامدى جيناق سوماسى شامامەن 3,5 مىڭ دوللاردى قۇراۋى مۇمكىن. بۇل سوما كاپيتال نارىعىنىڭ قۇبىلمالىلىعىن ەسكەرە وتىرىپ, تاريحي دەرەكتەر نەگىزىندە ەسەپتەلگەن جانە الەمدىك ەكونوميكانىڭ كونيۋنكتۋراسىنا بايلانىستى تۇزەتىلۋى مۇمكىن.
جوبا بىلاي جۇزەگە اسىرىلادى:
- شوتتار «بجزق» اق-دا (ەكىنشى دەڭگەيدەگى بانكتەرگە جۇگىنۋ تالاپ ەتىلمەيدى) ادىلەت مينيسترلىگىنىڭ جەكە تۇلعالارىنىڭ دەرەكقورى نەگىزىندە اۆتوماتتى تۇردە اشىلادى.
- جىل سايىن قاڭتار ايىندا جوباعا قاتىسقان ساتتەن باستاپ 18 جاسقا تولعانعا دەيىن «بجزق» اق-داعى بالالاردىڭ شوتتارىنا شارتتى تۇردە قاراجات ەسەپتەلەدى. مىسالى, ەگەر جوبا باستالعان كەزدە بالا 5 جاستا بولسا, وعان جىل سايىن 13 جىل ىشىندە, ياعني كامەلەتكە تولعانعا دەيىن ۇلتتىق قوردىڭ ينۆەستيتسيالىق تابىسىنىڭ ءبىر بولىگى ەسەپتەلەدى.
- جوباعا قازاقستان ازاماتتارى بولىپ سانالاتىن بالالار قاتىسادى.
- ەگەر 18 جاسقا دەيىنگى بالا ەلدەن كەتىپ, قازاقستان ازاماتتىعىن وزگەرتسە, وندا تولەمدەرگە تالاپ قويۋ قۇقىعى جوعالادى. قاراجات بارلىق بالا اراسىندا قايتا بولىنەدى. بالا ەلدەن 18 جاسقا دەيىن ازاماتتىعى اۋىسپاي كەتكەن جاعدايدا تولەمدەرگە تالاپ قويۋ قۇقىعى ساقتالادى.
- شوت قاراجاتىن سالىق سالۋدان بوساتۋ ۇسىنىلادى. 18 جاسقا تولعان كەزدە شوتتاردان قاراجات تولەۋدى اقش دوللارىمەن جۇزەگە اسىرۋ ۇسىنىلادى. ءىس جۇزىندە 18 جاسقا تولعانعا دەيىن اقشا ۇلتتىق قوردا قالادى جانە قارجى قۇرالدارىنا ينۆەستيتسيالانادى.
- 18 جاسقا تولعان كەزدە قاراجات بالانىڭ مەنشىگى بولادى, ول قاراجاتتى قالاي پايدالانۋ كەرەكتىگىن ءوز بەتىنشە شەشۋى كەرەك ء(بىلىم الۋعا نەمەسە تۇرعىن ءۇي جاعدايىن جاقسارتۋعا). بۇل رەتتە شەتەلدىك وقۋ ورنىندا وقۋ اقىسىن تولەۋگە قاراجاتتى پايدالانۋدى شەكتەمەۋ جوسپارلانىپ وتىر.
ءوز كەزەگىندە تۇرعىن ءۇي جاعدايلارىن جاقسارتۋ نەمەسە تۇرعىن ءۇي ساتىپ الۋ ءۇشىن قاراجاتتى پايدالانۋعا تەك قازاقستان اۋماعىندا عانا رۇقسات ەتىلەدى. وسى قاراجاتقا ساتىپ الىنعان تۇرعىن ءۇيدى قايتا ساتۋ بويىنشا شەكتەۋلەر كوزدەلمەيدى.
- قاراجاتتى ماقساتتى پايدالانۋ ءۇشىن «بجزق» اق ءوزارا ءىس-قيمىل جاسايتىن ۋاكىلەتتى وپەراتورلاردى («وتباسى بانك» اق, ەكىنشى دەڭگەيدەگى بانكتەر) انىقتاۋ ۇسىنىلادى.
- 18 جاسقا تولعاندا شوتتاعى قاراجات 5-10 جىل بويى ساقتالادى. تالاپ ەتىلمەگەن جاعدايدا 5-10 جىل ىشىندە شوتتاعى قاراجاتتى زەينەتاقى شوتىنا اۋدارۋ ۇسىنىلادى.
- سونداي-اق ازاماتتىق زاڭناماعا سايكەس ءىس جۇزىندە جيناقتالعان قاراجاتتى مۇراگەرلىك بويىنشا بەرۋ مۇمكىندىگى كوزدەلەدى.
- بالا ارەكەتكە قابىلەتسىز بولعان جاعدايدا, اتا-انالارعا (زاڭدى وكىلدەرگە) قر زاڭناماسىندا بەلگىلەنگەن تارتىپپەن قاراجاتتى پايدالانۋعا قۇقىق بەرۋ جوسپارلانىپ وتىر.
«تۇتاستاي العاندا, ۇسىنىلعان الگوريتم بويىنشا جوبانى ىسكە قوسۋ ءۇشىن زاڭناماعا وزگەرىستەردى قوسا العاندا, دايىندىق جۇمىستارىن جۇرگىزۋ قاجەت بولادى. وسى جىلى قازاقستان رەسپۋبليكاسىنىڭ زاڭناماسىنا جانە ءتيىستى نورماتيۆتىك قۇقىقتىق اكتىلەرگە تۇزەتۋلەر قابىلداۋ جوسپارلانۋدا. جوبانى ىسكە قوسۋ تەستىلەۋى ءتيىستى پلاتفورمالاردا (قوسىمشالار, بجزق سايتى) وتكىزىلەدى», دەلىنگەن قارجى مينيسترلىگىنىڭ حابارلاماسىندا.
