«ارسەلورميتتال تەمىرتاۋ» اق-دا ۇجىمدىق شارتتىڭ ءاربىر تارماعى مۇقيات پىسىقتالادى. 2022 جىلى كومپانيانىڭ ۇجىمدىق شارتىنىڭ جاڭا نۇسقاسى قابىلداندى. وندا جۇمىسكەرلەرگە قاجەتتى جاعدايلار ايتارلىقتاي جاقسارتىلدى. بۇل جونىندەگى جۇمىس ءبىر جىل بويى جۇرگىزىلدى. وسى ماقساتتا «ارسەلورميتتال تەمىرتاۋ» اق باسقارماسى, «جاقتاۋ» مەتاللۋرگتەر كاسىپوداعى قب, «قورعاۋ» كومىرشىلەر كاسىپوداعى قب وكىلدەرىنەن بىرلەسكەن كوميسسيا قۇرىلدى. بۇل رەتتە جاڭا ۇجىمدىق شارت قابىلدانبايىنشا, بۇرىنعىسى كۇشىندە قالادى دەگەن ۋاعدالاستىققا الدىن الا قول جەتكىزىلدى. مۇنداي قادام كەز كەلگەن داۋ-تالاستى بولدىرماۋ ءۇشىن جاسالدى.
دەگەنمەن, «ارسەلورميتتال تەمىرتاۋ» اق ۇجىمدىق شارتى تۋرالى اڭگىمەنى ونىڭ كۇشى كىمدەرگە تارالاتىنىنان باستاۋ كەرەك. ولار – ەڭ الدىمەن, كاسىپوداققا مۇشە بولعان كومپانيا قىزمەتكەرلەرى. سونداي-اق بۇل قاتارعا جەكە ءوتىنىشى نەگىزىندە ۇجىمدىق شارتقا قوسىلعان جانە كاسىپوداق مۇشەلەرىمەن تەڭ دارەجەدە كاسىپوداق جارناسىن تولەيتىن قىزمەتكەرلەر كىرەدى. بۇعان قوسا, ۇجىمدىق شارت زەينەتكەرلەرمەن جۇمىس ىستەمەسە دە كومپانيانىڭ جۇمىس ىستەمەيتىن زەينەتكەرلەرىنىڭ كاسىپوداق كوميتەتىنە مۇشە جۇمىسكەرلەرگە دە قولدانىلادى.
«ارسەلورميتتال تەمىرتاۋ» اق-نىڭ 2022-2024 جىلدارعا ارنالعان ۇجىمدىق شارتى تۋرالى ايتقاندا ءبىرىنشى كەزەكتە جۇمىسكەرلەردى الەۋمەتتىك قولداۋدى كۇشەيتەتىن وزگەرىستەر مەن تولىقتىرۋلار ەنگىزىلگەنىن اتاپ وتكەن ءجون.
- ناقتى ايتقاندا, قر ەڭبەك زاڭناماسىنا قاتىستى وزگەرىستەر, سونداي-اق جاڭا جەڭىلدىكتەر مەن كەپىلدىكتەر ەنگىزىلدى. نەگىزگى تارماقتاردىڭ ءبىرى – كومپانيا جۇمىسكەرلەرىنىڭ جالاقىسىن قاڭتاردان باستاپ قر ۇكىمەتى بەلگىلەگەن ينفلياتسيا دەڭگەيىنە سايكەس يندەكستەۋ. ال 2022 جىلى ينفلياتسيا 20,3 پايىزدى قۇراعانى بەلگىلى. 2023 جىلدىڭ 1 قاڭتارىنان باستاپ «ارسەلورميتتال تەمىرتاۋ» اق باس ديرەكتورى ۆلاديمير يابلونسكيدىڭ بۇيرىعىمەن كومپانيا قىزمەتكەرلەرىنىڭ جالاقىسى دا سونشا دەڭگەيدە ءوسىرىلدى, دەيدى «جاقتاۋ» مەتاللۋرگتەر كاسىپوداعى قب توراعاسى ۆيكتور ششەتينين. – مەنىڭ ويىمشا, قازاقستاندا ءالى ەش كاسىپورىن جالاقىنى وسىلايشا كوتەرگەن جوق.
جاڭا ۇجىمدىق شارتتا وزگەرگەن باستى جايتتىڭ ءبىرى – جىل قورىتىندىسى بويىنشا وندىرىستىك كورسەتكىشتەردى ورىنداعانى ءۇشىن بىرجولعى تولەم نەمەسە 13 جالاقى دەپ اتالاتىن قاعيدا.
- بۇرىن 13 جالاقى (بولات دەپارتامەنتى بويىنشا) بەرىك بولات جونىندەگى (كونۆەرتەر تسەحى بويىنشا) كورسەتكىشتەر ءۇشىن ەسەپتەلگەندىكتەن, بۇل تۋرالى كوپتەگەن تۇسىنىسپەۋشىلىك بولدى. سودان كەيىن ءبىز 2022 جىلدان باستاپ پروكات تسەحتارىنداعى پروكات ساپاسى جونىندەگى كورسەتكىشتى نەگىزگە الدىق, - دەيدى ۆيكتور ششەتينين.
كومىر دەپارتامەنتىنە كەلەتىن بولساق, بىرجولعى تولەمگە بىردەن ءۇش كورسەتكىش اسەر ەتەدى: كومىر ءوندىرۋ, كومىر كونتسەنتراتىن ءوندىرۋ بويىنشا بيزنەس-جوسپاردى ورىنداۋ, قاتارداعى كومىردىڭ ناقتى ك ۇلىنىڭ بەكىتىلگەن جوسپارلى دەڭگەيدەن اسپاۋى. ايتپاقشى, 2022 جىلى كومپانياداعى بارلىق كورسەتكىشكە تولىق كولەمدە قول جەتكىزىلدى.
ۇجىمدىق شارتتا تولەمدەر اۆتوماتتى تۇردە جۇرگىزىلەتىن تارماقتار بار. الايدا كومپانيا اكىمشىلىگى مەن كاسىپوداقتاردىڭ بىرلەسكەن شەشىمىمەن نەمەسە قىزمەتكەردىڭ جەكە ءوتىنىشى بويىنشا عانا ىسكە اسىرىلاتىندارى دا بار.
- قىزمەتكەرگە ونىڭ اۋىر ماتەريالدىق جاعدايىنا, الداعى وپەراتسيالارعا, بولعان ورتتەرگە جانە باسقا جاعدايلارعا بايلانىستى ماتەريالدىق كومەك كورسەتۋ تارماقتارى بار, - دەپ ناقتىلادى ۆيكتور ششەتينين.
سول سياقتى ءتيىستى كوميسسيا پايىزسىز نەسيە بەرۋ تۋرالى وتىنىشتەردى دە قاراستىرادى. ۇجىمدىق شارتقا سايكەس مۇنداي نەسيە تۇرعىن ءۇي ساتىپ الۋعا نەمەسە جوندەۋگە, ەمدەلۋگە, وقۋعا بەرىلەدى. بىراق قاجەتتىلىكتى راستايتىن قۇجاتتار بولۋعا ءتيىس. 2022 جىلدىڭ قورىتىندىسى بويىنشا قىزمەتكەرلەرگە 175 114 000 تەڭگە پايىزسىز نەسيە بەرىلدى, ونىڭ ىشىندە بولات دەپارتامەنتى بويىنشا – 84 325 000 تەڭگە, كومىر دەپارتامەنتى بويىنشا – 90 789 000 تەڭگە. كومپانيا قىزمەتكەرىمەن ونىڭ دەنساۋلىق جاعدايى بويىنشا ەڭبەك شارتى بۇزىلعان جاعدايدا ۇجىمدىق شارتقا سايكەس وتەماقى تولەۋ دە كوزدەلگەن.
ۇجىمدىق شارت بويىنشا «ارسەلورميتتال تەمىرتاۋ» كومپانياسىنىڭ 2022 جىلعى شىعىندارى 29,03 ملرد تەڭگەنى قۇرادى, ونىڭ ىشىندە بولات دەپارتامەنتىندە – 12 317 049 مىڭ تەڭگە, كومىر دەپارتامەنتىندە – 16 714 780 مىڭ تەڭگە.
ايتا كەتەيىك, «ارسەلورميتتال تەمىرتاۋ» اق ۇجىمدىق شارتىندا بۇرىنعى جەڭىلدىكتەر مەن تولەمدەردى ساقتاۋمەن قاتار, ونىڭ 2022 جىلعى جاڭا رەداكتسياسىندا قىزمەتكەرلەردىڭ ءال-اۋقاتىن جاقسارتۋعا, ولاردى ىنتالاندىرۋعا جانە قولداۋعا باعىتتالعان قوسىمشا تارماقتار پايدا بولدى.
ارينە, كومپانيانىڭ كاسىپوداق ۇيىمدارىنىڭ وكىلدەرى مويىنداپ ايتقانىنداي, تالقىلاۋ بارىسىندا كوپتەگەن داۋلار دا بولعان.
- بىراق ءبىز ورتاق ءتىل تاپتىق. بۇل – ءبىز كەلىسپەۋشىلىك حاتتامالارىنسىز ءارى مەملەكەتتىك ورگانداردىڭ قاتىسۋىنسىز قول قويىلعان العاشقى ۇجىمدىق شارت. بۇل – ءبىزدىڭ ورتاق ەڭبەگىمىز. وسى ورايدا كومپانيا باسقارماسىنىڭ دانالىق پەن شىدامدىلىق تانىتقان ساليقالى ۇستانىمىن اتاپ وتكىم كەلەدى, - دەيدى ۆيكتور ششەتينين.
«ارسەلورميتتال تەمىرتاۋ» اق-داعى ۇجىمدىق شارتتى جاڭارتۋ تاجىريبەسى كومپانيا تاراپىنان جۇمىسكەرلەرگە دەگەن ادال كوزقاراس پەن قامقورلىق بارىن ايعاقتايدى. بۇگىندە كومپانيادا جۇمىسكەرلەردى اقپاراتتاندىرۋ, قاجەت بولعان جاعدايدا ۇجىمدىق شارتتى ءتۇسىندىرۋ جانە ەڭ باستىسى – شارتتىڭ بارلىق تارماقتارىن ورىنداۋ ءۇشىن بارلىق شارا قولدانىلىپ جاتىر. كاسىپوداقتاردا ەگەر داۋلى ماسەلەلەر تۋىنداي قالسا, ولاردى شەشۋمەن اينالىساتىن كوميسسيا قۇرىلعان.
مەملەكەتتىك ورگاندار دا كومپانيانىڭ ەڭبەك جاعدايلارىن جاقسارتۋ مەن ەڭبەكاقىنى كوبەيتۋ, سونداي-اق جۇمىسكەرلەردى الەۋمەتتىك قولداۋ سالاسىنداعى جۇمىسى كۇشەيتىلگەنىن ايتىپ وتىر. ماسەلەن, 2021 جىلعى 11 قاراشادان باستاپ كەلىسىم كوميسسياسى جۇمىس ىستەيدى, ونىڭ قۇرامىنا «ارسەلورميتتال تەمىرتاۋ» اق, كاسىپوداقتار مەن وبلىس اكىمدىگىنىڭ وكىلدەرى كىرگەن.
قاراعاندى وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ حابارلاۋىنشا, 2021 جىلعى تالاپتار بويىنشا ۋاعدالاستىقتارعا قول جەتكىزىلىپ, جالاقى 15 پايىزعا ارتتى, 13-ءشى جالاقى تولەندى جانە باسقا دا الەۋمەتتىك ماسەلەلەر شەشىلدى. كومىر ءوندىرۋ جوسپارى دا تومەندەتىلدى.
2022 جىلعى قاراشادا لەنين اتىنداعى شاحتادا بولعان قايعىلى وقيعادان كەيىن كومىر دەپارتامەنتىنىڭ ەڭبەك ۇجىمدارى قوسىمشا تالاپتار قويدى. بارلىعى 18 تالاپ قويىلدى, ونىڭ 3-ءى – ورتالىق مەملەكەتتىك ورگانداردىڭ قاراۋىندا, 12-ءسى ورىندالدى, 3-ءى ورىندالۋ ۇستىندە. كەلىسىم كوميسسياسى جۇمىسىنىڭ ناتيجەسى بويىنشا مىناداي شەشىمدەر قابىلداندى: 2023 جىلعى 1 قاڭتاردان باستاپ ۇجىمدىق شارتقا سايكەس جالاقىنى ينفلياتسيا دەڭگەيىنە سايكەس يندەكستەۋ جۇرگىزىلەدى. 2022 جىلعى 16 جەلتوقسانعا دەيىن «ارسەلورميتتال تەمىرتاۋ» اق بارلىق جۇمىسكەرىنە 100 پايىز مولشەرىندە 13-ءشى جالاقىنى تولەدى.
قاراعاندى وبلىسىنىڭ ەڭبەك ينسپەكتسياسى باسقارماسى بۇگىنگى تاڭدا «ارسەلورميتتال تەمىرتاۋ» اق-نىڭ ۇجىمدىق شارتى بارلىق مۇددەلى تاراپتاردىڭ ۇسىنىستارى ەسكەرىلگەن, ءارى بارىنشا الەۋمەتتىك باعدارلانعان شارتتاردىڭ ءبىرى ەكەنىن اتاپ ءوتتى.
