نۇرماعامبەتوۆتىڭ ايتۋىنشا, استانادا 6 ادامنان تۇراتىن ۇيىمداسقان توپتىڭ قىلمىستىق قىزمەتى اشكەرەلەندى, ول جىل بويى جەزوكشەلىكپەن جانە جەڭگەتايلىقپەن اينالىسۋ ءۇشىن پريتون ۇستاۋمەن اينالىسقان. جۇيەلى تۇردە قىلمىستىق جولمەن تابىس تابۋ ءۇشىن كۇدىكتىلەر استانانىڭ ەليتالى تۇرعىن ءۇي كەشەندەرىنىڭ بىرىنەن 3 پاتەر جالداپ, وندا پريتون ۇيىمداستىرعان.
«قىلمىسكەرلەر ءوز قىزمەتىن اسا قۇپيا ۇستاۋ ءۇشىن تۇرعىن ءۇي كەشەنىنىڭ كۇزەتشىلەرىمەن بايلانىس ورناتىپ, پوليتسيا رەيدتەرى تۋرالى ەسكەرتۋ جاساۋ جايىندا كەلىسىم جاساسقان. رەيد ءجۇرىپ جاتقاندا ولار دەرەۋ جالدامالى پاتەرلەردەن كەتىپ قالىپ وتىرعان», دەدى نۇرماعامبەتوۆ.
ۇيىمداستىرۋشىلار كريمينالدىق بيزنەستەن كۇن سايىن ورتا ەسەپپەن 1 ميلليون تەڭگەگە دەيىن الىپ وتىرعان. پوليتسيا قىزمەتكەرلەرى ينتيمدىك قىزمەت كورسەتەتىن 11 ادامدى انىقتاعان. ءتىنتۋ بارىسىندا 20 مىڭ اقش دوللارى, 156 مىڭ رەسەي ءرۋبلى جانە 720 ەۋرو سوماسىندا اقشالاي قاراجات تاركىلەنگەن.
«وسى فاكت بويىنشا ۇيىمداسقان توپ قۇرۋ جانە وعان باسشىلىق ەتۋ, پريتون ۇستاۋ جانە جەڭگەتايلىق باپتارى بويىنشا سوتقا دەيىنگى تەرگەۋ باستالدى. كۇدىكتىلەر ۇستالدى, ەكەۋى قاماۋدا, قالعاندارى قولحاتپەن بوساتىلدى», دەدى ءىىم وكىلى.
