قوسىمشا ءبىلىم بەرۋ ورداسى از ۋاقىتتىڭ ىشىندە تامىرى تەرەڭگە بويلايتىن تاريحتىڭ نەگىزىن قالاپ ۇلگەردى. ءبىلىم مەكەمەسىنىڭ نەگىزگى ماقساتى – سانالى, ءبىلىمدى, كوزى اشىق ۇرپاق تاربيەلەپ, ەلىمىزدىڭ بەدەلىن اسقاقتاتاتىن ۇلت قالىپتاستىرۋ. ءۇش جىلدىڭ ىشىندە وڭىردەگى ءبىلىم مەن تاربيەنىڭ وشاعىنا اينالعان «Bolashaq Saraiy»-ىندا قازىرگى تاڭدا سپورت, مەديا, شىعارماشىلىق, عىلىمي-ينتەللەكتۋالدىق, ءىت باعىتتارى بويىنشا 3 مىڭنان استام بالا 120 ءتۇرلى ۇيىرمەدە ءوز تاڭداۋى ارقىلى ءبىلىم-قابىلەتتەرىن جەتىلدىرۋ ۇستىندە.
شىعارماشىلىق باعىتتا وقۋشىلار مەن ستۋدەنتتەر «گۇلدەر», «بولاشاق», «تۇمار», «Diamond» توپتارىندا بي ونەرىن, «ۇلگىلى ۆوكال» ۇيىرمەسىندە ءان ايتۋدى, «فانتازيا» جانە «ەكسپرەسسيا» توپتارىندا سۋرەت سالۋدى, «فوم-فلوريستيكا», «زولوتايا نيت» ساندىك-قولدانبالى ونەر ۇيىرمەلەرىندە ءتۇرلى بۇيىم جاساۋدى, «ۇكىلى دومبىرا», «جەتىگەن», «قىلقوبىز», «سازسىرناي» ۇيىرمەلەرىندە اسپاپتاردا ويناۋدى, «ماسكا» ۇيىرمەسىندە ساحنا ونەرىن مەڭگەرۋدى, «موبيلوگرافيا» ۇيىرمەسىندە فوتو مەن بەينەباياندار ءتۇسىرۋدى, «جۇرگىزۋشىلەر كلۋبىندا» كولىك جۇرگىزۋدى ۇيرەنەدى. عىلىمي-ينتەللەكتۋالدى باعىتتا «جاس عالىم», «جاس ناتۋراليست», «حيميانىڭ شاعىن اكادەمياسى», «Green industry», «Eco – water», «Planta Tech» جانە تاعى باسقا ۇيىرمەلەردە بيوتەحنولوگيا, ەكولوگيا, قورشاعان ورتانى قورعاۋعا بايلانىستى تاقىرىپتار زەرتتەلىپ, زاماناۋي زەرتحانادا گەرمانيا, شۆەتسيا ەلدەرىنەن اكەلىنگەن قۇرىلعىلار ارقىلى تەوريانى تاجىريبە جۇزىندە سىناپ كورۋگە مۇمكىندىك بار.
قازىرگى تسيفرلىق ءداۋىر كەزەڭىندە اقپاراتتىق-كوممۋنيكاتسيالىق تەحنولوگيالار مەن ينجەنەرلىك تەحنيكالىق باعىتتا بولاشاق مامانداردى دايارلاۋ جۇزەگە اسىرىلىپ, «Cybertron», «Lego Mindstorms», «Lego Club», «Lego WeDo», «Tesla club», «Lego kids», «Lego junior» ۇيىرمەلەرىندە روبوتتەحنيكا, «New generation», «راديوتەحنيكتەر كلۋبى», «STEاM», «STEAM IOT» ۇيىرمەلەرىندە ەنەرگەتيكا, ەلەكترونيكا, اۆتوماتتاندىرۋ, «3D پروتوتيپتەۋ ستۋدياسى» ۇيىرمەسىندە 3D مودەلدەردى جاساۋ, شىعارۋ جانە وڭدەۋ, «گرافيكالىق ديزاين», «كومپيۋتەرلىك ديزاين», «WEB ديزاين», «يلليۋستراتور» ۇيىرمەلەرىندە گرافيكالىق سۋرەتتەردى سالۋ, انيماتسيالاردى جاساۋ, «Python», «Java Script», «الگوريتمدەر», «كيبەرقاۋىپسىزدىك نەگىزدەرى» ۇيىرمەلەرىندە باعدارلامالاۋ تىلدەرى, كيبەرقاۋىپسىزدىك نەگىزدەرى ۇيرەتىلەدى. وزەكتىلىگىمەن ەرەكشە مەدياباعىتتاعى «جۋرناليستيكا نەگىزدەرى» ۇيىرمەسىندە جاس جۋرناليستەر, «كوشباسشىلار مەكتەبىندە» جاس كوشباسشىلار, «پىكىرسايىس» ۇيىرمەسىندە ءسوز شەبەرلەرى, «اقمولاتانۋ», «مادەني-تانىمدىق تۋريزم» ۇيىرمەلەرىندە ولكەتانۋشىلار ءبىلىم الىپ, بولاشاق فوتوتىلشىلەر مەن بەينەوپەراتورلار ءوز قابىلەتتەرىن «فوتون» ۇيىرمەسىندە جەتىلدىرە الادى.
دەنى ساۋ ۇرپاق قالىپتاستىرۋ ءۇشىن كەرەمەت سپورتتىق الاڭ ۇيىمداستىرىلعان. مۇندا سپورتتىڭ نەگىزگى تۇرلەرى ۇيرەتىلەدى. وقۋشىلار دوپ ويىندارىمەن, كۇرەس تۇرلەرىمەن, كاراتە, دزيۋدو, تەننيس, شاحمات, قازاقتىڭ ۇلتتىق ويىندارى اسىق, توعىزقۇمالاق, قازاقشا كۇرەسپەن اينالىسىپ, سۋدا ءجۇزۋ ۇيىرمەسىنە بارادى. سونىمەن قاتار ەرەكشە ءبىلىمدى قاجەت ەتەتىن بالالار ءۇشىن پسيحولوگيالىق-پەداگوگيكالىق قىزمەت كورسەتىلەدى. مۇندا 118 بالا ءبىلىم الادى. بالالار وزدەرىن ەركىن سەزىنەدى. ويتكەنى تولىققاندى ءبىلىم الۋعا بارلىق جاعداي قاراستىرىلعان جانە ەرەكشە بالالارمەن لوگوپەد, دەفەكتولوگ, پسيحولوگ, ارت-تەراپەۆت ماماندارى جۇمىس ىستەيدى.
ءبىلىم ورداسىن تاڭداپ, قىزىعۋشىلىقتارىن قاناعاتتاندىرۋ ماقساتىندا ۇيىرمەگە قاتىساتىن بالالار سانى جىل سايىن كوبەيىپ كەلەدى. «ۆوlashaq saraiy» تالانتتى دا دارىندى بالالاردى تاربيەلەۋگە ايرىقشا ۇلەس قوسىپ وتىر. ماقتانۋعا تۇرارلىق جەتىستىكتەرى دە مول. اتاپ ايتقاندا, «شەبەر قولدار» ۇيىرمەسىنىڭ وقۋشىسى تەمىر ينايات «التىن قازىنا» اتتى وبلىستىق كونكۋرستا ءبىرىنشى ورىن يەلەندى. شي توقۋ تەحنيكاسىمەن جاسالعان «قوبىز ءۇنى» اتالاتىن تۋىندىسىمەن تامساندىرعان جاس جەڭىمپاز رەسپۋبليكالىق كونكۋرسكا جولداما الدى. رۋمىنيادا وتكەن اسىق اتۋ, بەس اسىق جارىسىنان «اسىق اتۋ» ۇيىرمەسىنىڭ تاربيەلەنۋشىسى ايلانا دۋمان ءبىرىنشى ورىندى يەلەنىپ, الەم كۋبوگىن جەڭىپ الدى. اتالعان جارىسقا قىرعىزستان, تۇركيا, چەحيا, مولدوۆا, بولگاريا مەملەكەتتەرىنەن 32 سپورتشى قاتىسقان.
عىلىمي-زياتكەرلىك, ءىت باعىتتارى بويىنشا دا كوپتەگەن جەتىستىك بار. ماسەلەن, يننوۆاتسيالىق يدەيالاردىڭ وبلىستىق بايقاۋىندا اندرەي بۋتورين ءبىرىنشى ورىندى يەلەندى. قاراعاندى قالاسىندا وتكەن «Roboland 2022» حالىقارالىق روبوتتەحنيكا جارىسىندا ارمان ماقىشەۆ, اندرەي بۋتورين جەڭىمپاز اتاندى. وقۋشىلار مەن ستۋدەنتتەر جانە جاس عالىمدار اراسىندا «Aqmola POWER» يننوۆاتسيالىق يدەيالار مەن جوبالاردىڭ ايماقتىق بايقاۋىندا ءالي رۇستەم ۇلى, تالعات ماقسات, قايرات ەراسىل وزدەرىنىڭ تىڭ يدەيالارىمەن الدىڭعى قاتارعا شىعىپ, ءبىرىنشى ورىن الدى. ءدۇبىرلى دودالاردا العىرلىقتارىمەن العا سۋىرىلىپ, وزا شاباتىن وقۋشىلاردىڭ ءار جەڭىسى – تالىمگەرلەر مەن جەتەكشىلەر ەڭبەگىنىڭ جەمىسى.
«ۆوlashaq saraiy»-نىڭ باسشىسى ايناگۇل قىدىربايقىزىنىڭ ايتۋىنشا, ءۇش جىلدىڭ ىشىندە مۇنداي تولايىم بەلەستى باعىندىرۋ – ورتاق جۇمىستىڭ ارقاسى. «ەل بولاشاعى – ءبىلىمدى جاستار. ءاربىر مەملەكەتتىڭ بولاشاعى مەكتەبىندە شىڭدالادى. مەكەمەمىزدە ءار وقۋشىنىڭ ءبىلىم-قابىلەتتەرى مەن تالانتىن شىڭداۋعا ۇلكەن ءمان بەرىلەدى. بولامىن دەگەن بالانى قولداپ, جول كورسەتىپ, مۇمكىندىك سىيلاۋ – «ۆوlashaq saraiy»-نىڭ باستى ماقساتى. ءبىز بىرىگىپ اسۋلار مەن شىڭداردى باعىندىرامىز», دەيدى ول.
زاماناۋي تەحنيكامەن جابدىقتالعان عيماراتتا تىڭ يدەيالاردى جۇزەگە اسىرۋعا مۇمكىندىك مول. ەكوجوبالار شەبەرحاناسىنىڭ جەتەكشىسى, تەحنيكا عىلىمدارىنىڭ ماگيسترى تيمۋر كامالوۆ الەۋمەتتىك ماڭىزى زور, ەرەكشە بالالاردى قوعامعا بەيىمدەۋگە جانە ولاردى تولىققاندى ومىرگە ۇيىمداستىرۋ ماقساتىندا قايتا وڭدەلگەن پلاستيكتەن بالاعا قول پروتەزىن جاسادى. ارينە, بۇل جوباعا «Recycling club» ۇيىرمەسىنىڭ ءبىلىم الۋشىلارى دا اتسالىستى.
ء«بىلىمدى بولۋ دەگەن ءسوز – بەلگىسىز نارسەنى اشۋ, قابىلەتىنە يە بولۋ دەگەن ءسوز», دەپ الەمنىڭ ەكىنشى ۇستازى ءابۋ ناسىر ءال-فارابي ايتقانداي, ءبىزدىڭ ءبىلىم بەرۋ قىزمەتكەرلەرىنىڭ نەگىزگى ماقساتى – دايىن ءبىلىمدى مەڭگەرگەن وقۋشىلاردى وقىتىپ قويماي, ومىرگە بەيىم, ءوز اينالاسىندا بەلگىسىز قالعان ءار جاعدايدان جاڭالىق اشۋعا جانى قۇمار جاڭاشىل, جان-جاقتى, دامىعان تۇلعالاردى قالىپتاستىرۋ. بالالاردىڭ ءبىلىمى مەن جىل بويى جەتكەن جەتىستىكتەرىن باعالاپ, جىلدى قورىتىندىلايتىن جانە العا جىگەرلەندىرەتىن ەرەكشە ءىس-شارا «بولاشاق پرەمياسى» دەپ اتالادى. ەرەكشەلىكتەرىنە قاراي ءار بالانىڭ دارىنىن باعالايتىن ءداستۇرلى شارانى ءبىلىم الۋشىلار تاعاتسىزدانا كۇتەدى.
«ۆوlashaq saraiy» قىزمەتكەرلەرى اراسىندا دا سپورت جارىستارىن وتكىزۋ داستۇرگە اينالعان. جال سايىن ناۋرىز مەرەكەسىنە وراي «Bolashaq بارىسى» اتتى قازاق كۇرەسىنەن جارىس ۇيىمداستىرىلادى. جەتىستىككە تولى جىلدىڭ تاعى ءبىر جەمىسى – وقۋشىلاردىڭ «Caravan of Knowledge» قورىنىڭ «Steam teen Research» رەسپۋبليكالىق گرانتتىق باعدارلاماسىنا قاتىسىپ, 5 گرانت ۇتىپ الۋى. ءىت جانە عىلىمي-ينتەللەكتۋالدى باعىتتىڭ ءبىلىم الۋشىلارى ءوز جوبالارىمەن دوداعا ءتۇسىپ, قورعاپ شىقتى. جوبالارىن جۇزەگە اسىرۋ جولىندا 125 مىڭ تەڭگە اقشالاي گرانت يەگەرلەرى اتاندى. شىعارماشىلىق ءبولىمىنىڭ «ۆوlashaq» بي ۇيىرمەسىنىڭ وقۋشىلارى وزبەكستاندا وتكەن «Nauryz fest» حالىقارالىق كونكۋرسىندا گران-پريگە يە بولعانىن دا ايتا كەتەيىك.
ءار وقۋ جىلى ءداستۇرلى شارا – شىعارماشىلىق ءبولىمنىڭ وقۋشىلارى ۇيىمداستىرعان ەسەپ بەرۋ كونتسەرتىمەن قورىتىندىلانادى. اتا-انالار ءۇشىن بالالارىنىڭ جەتىستىگى مەن ەڭبەگىنىڭ جەمىسىن كورۋدەن اسقان قۋانىش جوق.
كوكشەتاۋ
