مامانداردىڭ ايتۋىنشا, الەمدىك رەكورد ورناتۋ ءۇشىن ەڭ الدىمەن كۋرورت حالىقارالىق ستاندارتتاردىڭ بارلىق تالابىنا ساي كەلەتىن قالىپتا جۇمىس ىستەۋگە ءتيىس. وعان قوسا شاڭعى تەبەتىن جول حالىقارالىق شاڭعى فەدەراتسياسىنىڭ تالابىنا سايكەس كەلۋى كەرەك. گيننەستىڭ رەكوردتار كىتابىنا ەنۋ ءۇشىن ەڭ جوعارى نۇكتە رەتىندە 3 100 مەتر بيىكتىك بەلگىلەنگەن. ال شىمبۇلاق تەڭىز دەڭگەيىنەن 3 200 مەتر بيىكتىكتە ورنالاسقان. سوندىقتان ول الەمدەگى ەڭ بيىك تۇنگى شاڭعى تراسساسى رەتىندە گيننەس رەكوردىن ورناتتى. بۇعان دەيىن مۇنداي رەكوردتار ەشقاشان بولماعان. قازاقستانداعى تاۋ-شاڭعى كۋرورتى ءبىرىنشى بولىپ تىركەلدى.
ايتۋلى وقيعا بارىسىندا Guinness World Records كەڭسەسىنىڭ سۋدياسى شەيد سۋباسي-گەميدجي: «قاجەتتى قۇجاتتاردىڭ بارلىعى تەكسەرىلدى. شاڭعى بازاسىنا قاتىستى اقپاراتتى تۇگەلدەي قاراپ شىقتىق. بيىكتىگى ولشەندى. گەودەزيستەر مەن ارنايى ماماندار جۇمىس ىستەدى. تراسسانى ءوزىمىز سىناپ كوردىك. جارىقتاندىرۋ, جولدى تەگىستەۋ جاعىنا دا وڭ باعا بەرەمىن. بارلىعى تالاپقا ساي شىقتى», دەپ مالىمدەدى.
شەيد سۋباشي-گەميدجي سالتاناتتى وقيعا ارقىلى شىمبۇلاقتان تابىلعانىنا بەك قۋانىشتى ەكەنىن ايتا كەلە, تاۋ شاڭعىسى كۋرورتىنىڭ باس ديرەكتورى رينات ابدىراحمانوۆقا الەمدىك رەكوردتى راستايتىن سەرتيفيكاتتى تابىس ەتتى. سەرتيفيكاتتى تاپسىرۋ ءراسىمى مەن رەكورد ناتيجەسىن رەسمي تىركەۋ – تەڭىز دەڭگەيىنەن 3 200 مەتر بيىكتىكتە «تالعار اسۋى» ستانساسىندا ءوتتى.
«شىمبۇلاق» تاۋ كۋرورتى الەمدەگى ەڭ بيىك تۇنگى شاڭعى تراسساسى رەتىندە رەسمي تۇردە گيننەس رەكوردىن العانى تۋرالى سىزدەرگە حابارلاۋعا قۋانىشتىمىن. بۇل الەمدەگى جاڭا رەكورد», دەدى شەيدا سۋباشي-گەميدجي.
سالتاناتتى شاراعا مادەنيەت جانە سپورت ءمينيسترى اسحات ورالوۆ پەن الماتى قالاسى اكىمىنىڭ ورىنباسارى ارمان قىرىقباەۆ قاتىستى.
«بۇگىن – تاريحي كۇن. ءبىزدىڭ «شىمبۇلاق» تاۋ شاڭعى كۋرورتىمىز گيننەستىڭ رەكوردتار كىتابىنا ەندى. بۇل – بۇكىل ەل ءۇشىن ۇلكەن جەتىستىك. ارينە, ءبىزدىڭ الەۋەتىمىز زور, شىمبۇلاق – ەلىمىزدەگى ءتۋريزمدى دامىتۋدىڭ نەگىزگى ورىنداردىڭ ءبىرى. جالپى, قازىرگى تاڭدا مادەنيەت جانە سپورت مينيسترلىگىنىڭ ارالاسۋىمەن ناقتى قادامدار قابىلدانىپ جاتىر. اتاپ ايتقاندا, ەلىمىزدە الداعى جەتى جىلعا ارنالعان تۋريزم سالاسىن دامىتۋ تۇجىرىمداماسى ازىرلەندى. ءبىز جەرگىلىكتى اتقارۋشى ورگاندارمەن, سەرىكتەستەرمەن, بيزنەس قوعامداستىقپەن بىرلەسىپ ينفراقۇرىلىمدى جانە ءتۋريزمىمىزدى دامىتامىز», دەدى اسحات ورالوۆ.
ءوز كەزەگىندە مينيستر «شىمبۇلاق» كاسىپورنىنىڭ باس ديرەكتورى رينات ابدىراحمانوۆقا الەمدىك رەكوردتى راستايتىن سەرتيفيكاتتى اماناتتادى. شارا سوڭىندا قىزىل لەنتا سالتاناتتى تۇردە كەسىلىپ, ەڭ بيىك تۇنگى تاۋ شاڭعىسى تراسساسىمەن تومەن قاراي جاپپاي سىرعاناۋ ءوتتى.
تەڭىز دەڭگەيىنەن 3 200 مەتر بيىكتىكتە تۇندە شاڭعىمەن سىرعاناۋ 2021 جىلدىڭ قاراشاسىندا باستالعان ەدى. وسى ۋاقىت ىشىندە جۇزدەگەن مىڭ ادام تۇنگى ۋاقىتتا ەڭ جوعارى نۇكتەدەن ءتۇسىپ ۇلگەردى.
تاۋ شاڭعىسى كۋرورتىنىڭ ءباسپاسوز قىزمەتىنىڭ حابارلاۋىنشا, 2021-2022 جىلعى ماۋسىمدا تۇنگى شاڭعىمەن سىرعاناۋعا 50 346 تۋريست كەلگەن, بيىلعى ماۋسىمدا 10% كوپ كەلدى, ياعني 55 486 كەلۋشىلەر بولدى. سونىمەن قاتار 2021-2022 جىلعى ماۋسىمدا كۇنىنە 12 520 ادام كەلسە, بيىلعى ماۋسىمدا كۋرورتقا 1 ملن-نان اسا ادام كەلىپ ۇلگەردى.
«بۇل دەگەنىمىز – ىشكى تۋريزم جانە سىرتقى ءتۋريزمدى دامىتۋ ماقساتىنداعى جاساپ جاتقان قادامداردىڭ ءبىرى جانە تۋريستىك ماۋسىمعا قارايتىن بولساق, ناقتى كورسەتكىش بويىنشا تاريحتا العاش رەت ىشكى جانە سىرتقى ءتۋريزمدى قوسقاندا شىمبۇلاققا 1 ملن-نان اسا تۋريست كەلدى. الەۋەتىمىز زور. بۇل جۇمىستى ءبىز مينيسترلىك تاراپىنان اكىمشىلىكپەن بىرلەسىپ, كاسىپكەرلەرمەن جانە ءبىزدىڭ ارىپتەستەرمەن جالعاستىرامىز», دەيدى مادەنيەت جانە سپورت ءمينيسترى.
شىندىعىندا, شىمبۇلاقتاعى ەندى قايتالانبايتىن تاريحي ساتكە تاۋ ءتۋريزمىن جاقسى كورەتىن قالا تۇرعىندارى دا ورتاقتاستى.
قالا تۇرعىندارىنىڭ ءبىرى گۇلميرا يۋسۋپوۆا: «تالاي ەلدى شارلاپ كوردىم. بىراق ءبىزدىڭ شىمبۇلاققا جەتەرى جوق. تراسسا كەرەمەت. ونى مۇندا تۇراقتى تۇردە كەلەتىن شاڭعىشىلاردىڭ ءبارى جاقسى بىلەدى. وسىنداي مارتەبەگە يە بولىپ جاتقانىنا قۋانىشتىمىن», دەدى.
ال ءمادي الدابەرگەنوۆ اتتى الماتىلىق: «مەن 18 جىلدان بەرى شاڭعى تەبەمىن. كاسىپقوي شاڭعىشىمىن. شىمبۇلاق گيننەس رەكوردتار كىتابىنا ەنۋگە ابدەن لايىق. راسىندا, شىمبۇلاق – شاڭعى تەبۋگە تاپتىرماس جەر. گيننەس رەكوردتار كىتابىنا ەنگىزىلگەننەن كەيىن كەلۋشىلەر سانى كوبەيە تۇسەدى دەگەن بولجام بار», دەدى.
الماتى
