“اقتوبە” اقتاۋعا كەلدى

“قازاقتەڭىزكولىكفلوتى” اكتسيونەرلىك قوعامى تاعى ءبىر الىپ تانكەرمەن تولىقتى. نيجەگورودتاعى “كراسنوە سورموۆو” زاۋىتىندا قۇراستىرىلعان “اقتوبە” تانكەرى جۇك كوتەرگىشتىگى جاعىنان كاسپي تەڭىزىندەگى ەڭ ءىرى سۋ كولىگى بولىپ تابىلادى. ۇلتتىق كومپانيانىڭ تاپسىرىسى بويىنشا مەرزىمىنەن كوپ بۇرىن سۋعا تۇسىرىلگەن تانكەر حالىقارالىق ستاندارتتارعا ساي تەحنيكانىڭ ەڭ سوڭعى جاڭالىقتارىمەن جابدىقتالعان. وسى رەتتە ماڭعىستاۋ مۇنايىنىڭ قويۋلىعىنا وراي وزىق تەحنولوگيانى پايدالانۋ, جۇك جۇيەسىن اۆتوماتتى تۇردە باسقارۋ, قاۋىپسىزدىك شارالارىنىڭ جەتىلدىرىلە تۇسكەندىگىن ايتۋعا بولادى. 13 مىڭ توننادان استام جۇك كوتەرە الاتىن تانكەردىڭ ۇزىندىعى 147,8 مەتر, ەنى 17,3 مەتر, قاپتالىنىڭ بيىكتىگى 10,5 مەتر. سەنبىدە قازاقستان مۇنايى تيەلگەن “اقتوبە” تانكەرى اقتاۋدان ماحاچقالاعا جول تارتتى. سالتاناتتى راسىمگە وبلىس اكىمى ق.كوشەرباەۆ, پارلامەنت ءماجىلىسىنىڭ دەپۋتاتى س.فەرحو, “كراسنوە سورموۆو” زاۋىتىنىڭ وكىلدەرى, قالا جۇرتشىلىعى قاتىسىپ, “اقتوبەگە” ءسات ساپار تىلەدى. اقتاۋ. جولامان بوشالاق, “ەگەمەن قازاقستان”.