اقتاۋدا ۋاقىت تالابىنا ساي لوگيستيكالىق ورتالىق سالىنادى

استانا. 2 شىلدە. اقتاۋدا قازاقستان مەن ازەربايجان پرەزيدەنتتەرىنىڭ كەلىسىمى شەڭبەرىندە ءىرى لوگيستيكالىق ورتالىق سالىنباق. بۇل تۋرالى «24kz» حابارلادى. ماڭعىستاۋ وبلىسىنىڭ اكىمى اليك ايدارباەۆ: «بۇگىنگى تاڭدا «اقتاۋ تەڭىز پورتى» ارنايى ەكونوميكالىق ايماعىندا 23 ءىرى كومپانيا قىزمەت ەتۋدە. سولاردىڭ ىشىندە ۇلكەن ديامەترلى قۇبىرلار شىعاراتىن «ارسەلور ميتتال اقتاۋ» زاۋىتى, تەمىر كونسترۋكتسيالارىن شىعاراتىن «كەپپەل قازاقستان» جانە يسپاندىق «يندەكس» كومپانيالارى ءىرى جوبالاردى ىسكە اسىرۋدى باستاپ جاتىر. سول كومپانيالاردىڭ قاتارىنا, مىنە, بۇگىن تاعى دا ءبىر ءىرى جوبا قوسىلعالى تۇر», – دەدى. قۇنى 14 ملن. ەۋرو تۇراتىن اتالعان ينۆەستيتسيالىق جوبا «ازەرسۋن حولدينگ» كومپانياسىنا تيەسىلى. «ازەرسۋن لوگيستيكا جانە ءوندىرىس ورتالىعى» ەلىمىزگە كەلەتىن تاۋارلار مەن ەلدەن ەكسپورتتالاتىن ونىمدەردى قابىلداپ, ساقتاپ, ونى تەمىرجول مەن تەڭىز ارقىلى جونەلتۋ جۇمىستارىن اتقاراتىن بولادى. مۇندا الەمدىك لوگيستيكا ءوندىرىسىنىڭ ەڭ سوڭعى ۇلگىدەگى تەحنولوگيالارى قولدانىلماق. مامانداردىڭ ايتۋىنشا, ىرگە تاسى قالانىپ وتىرعان لوگيستيكالىق ورتالىق ەلدەگى شاعىن جانە ورتا بيزنەستىڭ دامۋىنا, كاسىپكەرلىكتىڭ وركەندەۋىنە مول ۇلەس قوسادى. سونداي-اق, ول ماڭعىستاۋ وڭىرىندەگى ازىق-ت ۇلىك قاۋىپسىزدىگىن قامتاماسىز ەتۋگە مۇمكىندىك بەرەدى. بۇعان قوسا, شولەيتتى ايماق تۇرعىندارى نارىقتاعىدان ارزان ءارى ساپالى كوكونىس پەن جەمىس-جيدەككە قولى جەتكىزەتىن بولادى. ال ءوز كەزەگىندە ازەربايجان ەكونوميكا جانە ونەركاسىپ ءمينيسترى شاحين مۇستافاەۆ: «بۇل – ەكى ەلدىڭ باسشىلارىنىڭ تىكەلەي تاپسىرماسى ارقىلى ءوزارا كەلىسىم نەگىزىندە تۋىنداعان جوبا. قىسقا مەرزىم ىشىندە قازاقستاندىق تاراپپەن ءوزارا ارىپتەستىك مەموراندۋمىنا قول قويىلدى. بۇل نىسان مەملەكەتتەرىمىزدىڭ ەكونوميكاسىنداعى مۇناي-گاز سالاسىنان تىس سەكتورلاردىڭ دامۋىنا زور ىقپالىن تيگىزەدى دەگەن ويدامىز», – دەدى. جولدىباي بازار. دەرەككوز: «24kz». فوتو: news.delovoimir.kz.