كەرن دەپ وتىرعانىمىز – گەولوگيالىق بارلاۋ بارىسىندا جەر قويناۋىنان بۇرعىلانىپ الىناتىن جەراستى جىنىسىنىڭ سىناماسى. گەوبارلاۋشىلار جەر قويناۋىندا قانداي پايدالى قازبالار بار ەكەنىن, ونىڭ قاي تەرەڭدىكتە جاتقانىن وسى كەرننىڭ ءار مەترىن زەرتتەۋ ارقىلى تانىپ, بىلەدى. جۋاندىعى بىلەكتەي, ۇزىندىعى 200 مەتردەن 800 مەترگە دەيىن باراتىن بۇل قاتتى ماتەريالداردى گەولوگ-ماماندار وسى جاڭا عانا اشىلعان كەشەندە كەسىپ, ءبىرىنشى جارتىسىن زەرتحاناعا جىبەرەدى دە, ەكىنشىسىن كەرن قويماسىنا ساقتاۋعا قويادى.
مەملەكەت باسشىسى قاسىم-جومارت توقاەۆ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋىندا ەلىمىزدىڭ رەسۋرستىق الەۋەتى تولىق اشىلماعانىن, گەولوگيالىق تۇرعىدان زەردەلەنۋ دەڭگەيى تومەن ەكەنىن تىلگە تيەك ەتە كەلىپ, جەر قويناۋىن پايدالانۋ سالاسىنا, اسىرەسە گەولوگيالىق بارلاۋ جانە جەر قويناۋىن كەشەندى زەرتتەۋ ىسىنە تىڭ سەرپىن قاجەت ەكەنىن ەسكەرتكەن ەدى. پرەزيدەنت, سونداي-اق, گەولوگيالىق اقپاراتتىڭ اشىق تسيفرلىق مالىمەتتەر بازاسىن قۇرۋدى قاداپ تاپسىرعان بولاتىن. رۋدنىيدا اشىلعان كەرن قويماسى – جولداۋدا جۇكتەلگەن مىندەتتەردى جۇزەگە اسىرۋ بارىسىندا قول جەتكەن ماڭىزدى مەجەنىڭ ءبىرى. بۇل جونىندە سالتاناتتى جيىندا كەنشىلەر قاۋىمىن قۇتتىقتاعان گەولوگيا كوميتەتىنىڭ توراعاسى كەڭىرەك بايانداپ ءوتىپ, ERG GeoHub-تىڭ اشىلۋىن – وتاندىق گەولوگيا مەن گەولوگيالىق بارلاۋ سالاسى ءۇشىن ۇلكەن تاريحي وقيعا دەپ باعالادى.
– بۇگىندە ەلىمىزدە گەولوگيا سالاسىنىڭ ينفراقۇرىلىمىن دامىتۋعا باعىتتالعان اۋقىمدى جۇمىستار قولعا الىنىپ جاتىر. گەولوگيا سالاسىنىڭ تۇجىرىمداماسى قابىلداندى. ونىڭ ءتورت باعىتى بار. سونىڭ ءبىرى – وسى گەولوگيالىق ينفراقۇرىلىمدى دامىتۋ. بۇل كەشەننىڭ ەلىمىزگە دە, كومپانياعا دا بەرەرى كوپ, – دەدى ەرلان اقباروۆ.
جاڭا تەحنولوگيامەن جابدىقتالعان ERG GeoHub كەشەنىندە 100 مىڭ مەتر كەرن ساقتالاتىن بولادى. جاڭا حابتىڭ قازاقستانداعى وزگە كەرن قويمالارىنان ەرەكشەلىگى مۇندا جەر قويناۋىنداعى قازبا بايلىقتار تۋرالى اۆتوماتتاندىرىلعان دەرەكتەر قورى تۇزىلەدى.
ERG كومپانياسىنىڭ گەولوگيالىق بارلاۋ قىزمەتىن دامىتۋعا ارنالعان اۋقىمدى باعدارلاماسى اياسىندا قوستاناي جانە اقتوبە وبلىستارىندا ءدال وسىنداي تاعى بىرنەشە كەرن قويماسىن سالۋ كوزدەلگەن.
قوستاناي وبلىسى
