ءاليحان سمايىلوۆ الدا اتقاراتىن جۇمىستار جايىندا ايتتى

«قۇرمەتتى قاسىم-جومارت كەمەل ۇلى! قۇرمەتتى دەپۋتاتتار! ماعان ارتقان سەنىمدەرىڭىز ءۇشىن شىنايى ريزاشىلىعىمدى بىلدىرگىم كەلەدى. بۇل – مەن ءۇشىن ۇلكەن جاۋاپكەرشىلىك. قۇرمەتتى قاسىم-جومارت كەمەل ۇلى، ءسىز ايقىنداپ بەرگەن ەلىمىزدىڭ الەۋمەتتىك-ەكونوميكالىق دامۋى، حالىقتىڭ ءومىر ءسۇرۋ ساپاسى مەن ءال-اۋقاتىن ودان ءارى ارتتىرۋ جونىندەگى مىندەتتەر ۇكىمەت جۇمىسىنىڭ نەگىزگى باسىمدىقتارى بولادى.

ەڭ الدىمەن، ءبىز مەملەكەت باسشىسىنىڭ سايلاۋالدى باعدارلاماسىن جانە «Amanat» پارتياسىنىڭ باعدارلاماسىن ىسكە اسىرامىز. سونىمەن بىرگە باسقا دا پارتيالار مەن دەپۋتاتتاردىڭ، بيزنەس-قاۋىمداستىقتار مەن ازاماتتاردىڭ سىندارلى ۇسىنىستارىن ەسكەرەمىز. ورتا مەرزىمدى كەزەڭدە ەكونوميكانىڭ ءوسىمىن 5%-عا دەيىن جەتكىزۋ، وسى جىلدىڭ اياعىنا دەيىن ينفلياتسيانى 2 ەسە تومەندەتۋ – ءبىز ءۇشىن اسا ماڭىزدى مىندەت»، دەدى ءاليحان سمايىلوۆ.

ۇكىمەت باسشىسىنىڭ ايتۋىنشا، كاسىپكەرلىكتى قولداۋ جانە بيزنەس-كليماتتى جاقسارتۋ جونىندەگى كەشەندى شارالار، سونداي-اق بيزنەستىڭ تۇيتكىلدى ماسەلەلەرىن شەشۋ، حالىقتى جۇمىسپەن قامتۋ جانە ازاماتتاردىڭ ناقتى تابىسىن ءوسىرۋ – نەگىزگى باعىتتاردىڭ ءبىرى.

ەكونوميكانى ارتاراپتاندىرۋعا، ىشكى نارىقتى وتاندىق تاۋارلارمەن قامتاماسىز ەتۋگە جانە قوسىلعان قۇنى جوعارى شيكىزاتتىق ەمەس تاۋارلار ءوندىرىسىن ۇلعايتۋعا باسىمدىق بەرىلەدى.

«ەل ەكونوميكاسىنا، ءبىرىنشى كەزەكتە، وڭدەۋشى سالالارعا اۋقىمدى ينۆەستيتسيالار تارتۋ بويىنشا شارالار قابىلدانادى. اۋىل شارۋاشىلىعىن دامىتۋ جانە ازىق-ت ۇلىك قاۋىپسىزدىگىن قامتاماسىز ەتۋ ءۇشىن كەشەندى جۇمىس اتقارىلادى.

سونىمەن قاتار ەنەرگەتيكا سالاسىن دامىتۋ جانە كوممۋنالدىق ينفراقۇرىلىمدى جاڭعىرتۋ ماسەلەلەرى وتە ماڭىزدى. ىشكى نارىقتى جانار-جاعارمايمەن قامتاماسىز ەتۋگە ەرەكشە نازار اۋدارىلادى. «تاريف ورنىنا – ينۆەستيتسيا» باعدارلاماسىن ىسكە اسىرۋ ەلەكتر جانە كوممۋنالدىق جەلىلەردىڭ توزۋىن تومەندەتۋگە مۇمكىندىك بەرەدى.

«اۋىل – ەل بەسىگى» جوباسى اياسىندا اۋىلدىق ينفراقۇرىلىمدى جاڭعىرتۋ كەڭەيتىلەدى. كولىك جانە لوگيستيكا سالاسىندا وتكىزۋ قابىلەتىن ارتتىرۋعا جانە حالىقارالىق دالىزدەردى دامىتۋعا باسىمدىق بەرىلەدى. ءبىلىم بەرۋ جانە دەنساۋلىق ساقتاۋ سالالارىندا قىزمەتتەردىڭ تيىمدىلىگى مەن ساپاسىن جاقسارتۋ، سونىمەن قاتار تسيفرلاندىرۋدى ءارى قاراي جالعاستىرۋ جانە مەملەكەتتىك بىرىڭعاي تسيفرلىق پلاتفورمانى ەنگىزۋ ءبىزدىڭ جۇمىسىمىزدىڭ ماڭىزدى باعىتتارى بولادى. ۇكىمەتتىڭ الدىندا قويىلعان مىندەتتەردى شەشۋ ءۇشىن ءتيىستى شارالار قابىلدانادى. پارلامەنت دەپۋتاتتارىمەن ءوزارا بىرلەسىپ، ۇيلەسىمدى جانە ناتيجەلى جۇمىس جاسايمىز دەپ سەنىم بىلدىرەمىن»، دەدى پرەمەر-مينيستر ءوز سوزىندە.