پرەزيدەنت جاڭا ۇكىمەتكە تاپسىرما بەردى

«ۇكىمەت پەن پارلامەنت ەكونوميكانى دامىتىپ، حالىقتىڭ ءال-اۋقاتىن ارتتىرۋ ءۇشىن بارلىق كۇش-جىگەرىن جۇمىلدىرۋعا ءتيىس. ءبىز از ۋاقىتتىڭ ىشىندە اۋقىمدى ساياسي رەفورما جۇرگىزدىك. تۇبەگەيلى وزگەرىستەر ەلىمىزدىڭ جاڭا داۋىرگە قادام باسۋىنا جول اشتى. بۇل جۇمىس جالعاسا بەرەدى. بىراق ەكونوميكالىق وزگەرىستەر ساياسي جاڭعىرۋ ۇدەرىسىنەن كەنجە قالماۋى كەرەك. سوندىقتان ۇكىمەت الەۋمەتتىك-ەكونوميكالىق رەفورمالاردى باتىل جۇزەگە اسىرۋعا ءتيىس. بۇل – وتە جاۋاپتى جۇمىس»، دەدى پرەزيدەنت.

وسى رەتتە ول ازاماتتار ۇكىمەتكە زور ءۇمىت ارتىپ، جوعارى تالاپ قوياتىنىن ايتىپ ءوتتى

«ەل سەنىمىن اقتاۋ – بارىمىزگە سىن. مەن كەشە پارلامەنت سەسسياسىنىڭ اشىلۋىندا ناقتى مىندەتتەرگە توقتالدىم. ۇكىمەت ستراتەگيالىق باعدارىمىزدى جۇزەگە اسىرا وتىرىپ، بىرقاتار ماسەلەگە باسا ءمان بەرۋگە ءتيىس:

ءبىرىنشى. تۇراقتى ەكونوميكالىق ءوسىمنىڭ جىلىنا كەم دەگەندە 4 پايىز بولۋىن قامتاماسىز ەتۋ كەرەك. سوندىقتان ەكونوميكانىڭ دامۋ ۇلگىسىن تۇبەگەيلى وزگەرتۋىمىز كەرەك. ول ءۇشىن ءارتاراپتاندىرۋ جۇمىسىن جۇيەلى جۇرگىزىپ، نارىق قاعيدالارىن نىعايتۋ ماڭىزدى. تۇپكى ماقساتىمىز – جوعارى تەحنولوگياعا نەگىزدەلگەن، ءوزىن-ءوزى تولىق قامتاماسىز ەتەتىن جانە باسەكەگە قابىلەتتى ەكونوميكا قۇرۋ.

ەكىنشى. ينفلياتسيانى تەجەۋ قاجەت. بيىل ونى كەمىندە ەكى ەسەگە تومەندەتۋ كەرەك.

ەڭ الدىمەن، ازىق-ت ۇلىكتىڭ باعاسىن رەتتەۋ اسا ماڭىزدى. سول سەبەپتى اگروونەركاسىپ كەشەنىن جانە ساۋدا-ساتتىقتى دامىتۋ – نەگىزگى باسىمدىقتىڭ ءبىرى. ىشكى نارىقتى ءوز ونىمدەرىمىزبەن بارىنشا قامتاماسىز ەتۋ قاجەت. سونداي-اق اۋىل شارۋاشىلىعى ونىمدەرىنىڭ كولەمىن جانە ونىڭ قوسىمشا قۇنىن ارتتىرۋ كەرەك

ءۇشىنشى. ينفراقۇرىلىمدى دامىتۋ قاجەت. ەنەرگەتيكا، سۋ جانە كولىك قاۋىپسىزدىگىن قامتاماسىز ەتۋگە باعىتتالعان كەشەندى شارالار قابىلدانۋعا ءتيىس. ەنەرگەتيكالىق اكتيۆتەردى جاڭعىرتۋعا جاقىن ارادا جاڭا ينۆەستيتسيا تارتۋ كەرەك. بۇل جۇمىستى ء«تاريفتى ينۆەستيتسياعا ايىرباستاۋ» باعدارلاماسى ارقىلى ىسكە اسىرۋعا بولادى.

قازىر تاۋار گازىنىڭ تاپشىلىعى كۇشەيىپ بارادى. ۇكىمەت ەلىمىزدىڭ گاز وڭدەۋ قۋاتىن ارتتىرۋ ءۇشىن جاڭا جوبالاردى جۇزەگە اسىرۋعا ءتيىس. سونىمەن بىرگە 25 سۋ قويماسىن سالىپ، سۋدى بارىنشا ۇنەمدەۋ كەرەك.

قازاقستان تۇراقتى دامۋ ءۇشىن ازيا مەن ەۋروپانى جالعايتىن الەمدىك كولىك حابىنا اينالۋى قاجەت. بۇعان دەيىن قولعا الىنعان كولىك جانە لوگيستيكا جوبالارىن تۇگەل ۋاقتىلى ءبىتىرۋ وتە ماڭىزدى.

ءتورتىنشى. اۋماقتىق ساياسات جان-جاقتى ويلاستىرىلىپ جۇرگىزىلۋگە ءتيىس. ايماقتار قۋاتتى بولسا، بۇكىل مەملەكەت ءوسىپ-وركەندەيدى. سوندىقتان ەلىمىزدىڭ اكىمشىلىك-اۋماقتىق قۇرىلىمى وڭتايلى ءارى ءتيىمدى بولۋى كەرەك. بۇل – وتە ماڭىزدى ماسەلە.

بىلتىر جاڭادان اباي، ۇلىتاۋ جانە جەتىسۋ وبلىستارى قۇرىلعانىن بىلەسىزدەر. بۇل قادام وسى ايماقتاردى تىڭ قارقىنمەن دامىتۋعا جول اشتى. ءبىز ايماقتار اراسىنداعى ەكونوميكالىق تەڭسىزدىكتى ازايتۋ ءۇشىن ءتيىمدى شارالار قابىلداۋىمىز كەرەك. وسى رەتتە ۇكىمەت اكىمدەرمەن بىرلەسىپ، ءاربىر وبلىستىڭ الەۋەتىن ارتتىرۋعا ءتيىس.

ءار ايماقتىڭ وزىنە ءتان مۇمكىندىگىن تولىق پايدالانۋ قاجەت. مەن مۇنى بىرنەشە رەت ايتتىم. سونداي-اق اگلومەراتسيالاردى دامىتۋ ماسەلەسىنە باسا نازار اۋدارعان ءجون. ۇكىمەت وسىعان قاتىستى زاڭنىڭ مۇلتىكسىز ورىندالۋىن جانە جوسپارلانعان جۇمىستىڭ ءتيىمدى اتقارىلۋىن قامتاماسىز ەتۋگە ءتيىس.

بەسىنشى. ادامي كاپيتالدىڭ ساپاسىن دايەكتى جانە جۇيەلى تۇردە ارتتىرۋ قاجەت. «جايلى مەكتەپ» جوباسىن ءتيىمدى ىسكە اسىرۋدى قامتاماسىز ەتۋ جانە جوو بازاسىندا اكادەميالىق ارتىقشىلىق ورتالىقتارىن قۇرۋدى جالعاستىرۋ قاجەت.

وتاندىق عىلىمنىڭ دامۋى مەنىڭ جەكە باقىلاۋىمدا بولادى. سونىمەن قاتار دەنساۋلىق ساقتاۋدى ساپالى جاڭا دەڭگەيگە شىعارۋ قاجەت. ول ءۇشىن الەۋمەتتىك مەديتسينالىق ساقتاندىرۋ جۇيەسىنىڭ تيىمدىلىگىن ارتتىرۋ كەرەك. مۇندا تسيفرلىق شەشىمدەردىڭ كومەگىمەن شىعىنداردى باقىلاۋدى كۇشەيتۋ وتە ماڭىزدى. جالپى تسيفرلاندىرۋ ەكونوميكانىڭ بارلىق سالالارىن قامتۋى، ازاماتتارىمىزدىڭ ءومىرىنىڭ بارلىق سالالارىنا ەنۋى ءتيىس. ول ءۇشىن اقپاراتتىق تەحنولوگيالار نارىعىن بارىنشا ارتتىرۋ قاجەت.

التىنشى. مەملەكەتتىك اپپاراتتىڭ جۇمىسىن قايتا قاراپ، ونى جاڭعىرتۋ كەرەك. ايتپەسە كوزدەگەن ماقساتىمىزعا جەتۋ قيىنعا سوعادى. ۇكىمەت اكىمشىلىك رەفورمانى جالعاستىرىپ، بيۋروكراتيانى بارىنشا ازايتۋى كەرەك. مەملەكەتتىك ورگانداردىڭ تاپسىرمانى ۋاقتىلى ءارى ساپالى ورىنداۋ جەتكىلىكسىز.

ەكونوميكانىڭ ءوسىمىن قامتاماسىز ەتەتىن تىڭ باستامالار كوتەرىپ، جاڭا يدەيالار ۇسىنىپ وتىرۋ قاجەت. مينيسترلەر مەن اكىمدەردىڭ قىزمەتىن باعالاعان كەزدە ولاردىڭ وسى باعىتتاعى جۇمىسى باستى نازاردا بولادى.

سونداي-اق قوعامنىڭ مەملەكەتكە دەگەن سەنىمىن ارتتىرۋ – وتە ماڭىزدى مىندەت. بيلىكتىڭ وزگەرىس جاساۋعا ىقىلاستى جانە دايىن ەكەنىن جۇرت كورۋى كەرەك. ءبىر سوزبەن ايتقاندا، شىن مانىندە «حالىق ۇنىنە قۇلاق اساتىن مەملەكەت» قالىپتاستىرۋ قاجەت. ەل باسقارۋ جانە شەشىم قابىلداۋ ىسىنە ازاماتتاردى بارىنشا تارتقان ءجون»، دەدى مەملەكەت باسشىسى.