قالالىق دەنساۋلىق ساقتاۋ باسقارماسىنىڭ مالىمەتىنشە, ناۋرىزدىڭ 24-ىنەن 25-ىنە قاراعان ءتۇنى قازاقستاندىق تۋريستەر مىسىردىڭ شارم-ەل-شەيح كۋرورتىنان الماتىعا قايتىپ كەلە جاتقان.
ەگدە جاستاعى ايەلدە جۇرەك تالماسىنىڭ بارلىق بەلگىلەرى بايقالدى. ۇشاق الماتىعا قونعانشا 4 ساعات بويى مەديتسينا قىزمەتكەرلەرى رەانيماتسيالىق شارالاردى جۇرگىزىپ, شۇعىل كومەك كورسەتتى.
ء«بىر كەزدە الدىندا وتىرعان ايەل ابىگەرگە ءتۇستى ءارى ونىڭ قولىندا نارەستە بولدى. سودان كەيىن ستيۋاردتار ۇشاقتا دارىگەرلەر بار-جوعىن سۇرادى. مەديتسينا ۋنيۆەرسيتەتىنىڭ ستۋدەنتتەرى جانە مەن جاۋاپ بەردىك. باستاپقى تەكسەرۋ كەزىندە ميوكارد ينفاركتىسىنىڭ دامۋ قاۋپى بار دەپ كۇدىكتەندىم. ايەل ەس-ءتۇسسىز جاتقان, وعان دەيىن قۇسقان, سۋىق تەر شىقتى, تامىر سوعىسى ارەڭ سەزىلدى, قان قىسىمى تومەن بولدى. سودان كەيىن حاتتاما بويىنشا ارەكەت ەتتىك: تامىرلىق كىرۋ جاسادىم, قۇسۋدان اسفيكسيانى بولدىرماۋ ءۇشىن اۋىز-جۇتقىنشاقتى تازالادىق, سودان كەيىن جۇرەككە تۇسەتىن جۇكتەمەنى ازايتۋ ءۇشىن ناۋقاستىڭ اياعىن 60°-قا كوتەردىك. ناۋقاستى وتتەگى بەرەتىن بوبروۆ اپپاراتىنا قوستىق. ستۋدەنتتەر بەلسەندى تۇردە كومەكتەستى», دەدى الماتى №4 قالالىق كلينيكالىق اۋرۋحانا نەيروحيرۋرگيا بولىمشەسىنىڭ مەڭگەرۋشىسى نۇرجان اجىبەكوۆ.
دەر كەزىندە قابىلدانعان شارالاردىڭ ناتيجەسىندە قان قىسىمى 80/60-تان 130/80-گە, قانىقتىلىق 87-دەن 96-عا كوتەرىلگەن. ايەل ەسىن جيا باستاعان.
قۋانىشقا وراي, دارىگەر جىل سايىنعى ەڭبەك دەمالىسىنا شىعىپ, سول كۇنى وتباسىمەن دەمالىستان كەيىن ۇيىنە قايتىپ بارا جاتقان.
كۋاگەرلەردىڭ ايتۋىنشا, ۇشاقتا بولعان دارىگەر مەن ستۋدەنتتەردىڭ ارقاسىندا ناۋقاس امان قالعان. ۇشاقتا كومەك كورسەتكەن س.د.اسفەندياروۆ اتىنداعى قازۇمۋ ستۋدەنتتەرىنىڭ ەسىمدەرى دە بەلگىلى: قاجىروۆ داۋلەت, جارقىن راحات جانە سايدا بارماعامبەتوۆا.
جاقىندارىنىڭ ايتۋىنشا, كۇلجامال راحمەتتۋللاقىزى قازىرگى تاڭدا ءوزىن جاقسى سەزىنەدى. ۇشاق الماتىعا قونعاننان كەيىن ناۋقاستى بىردەن اۋرۋحاناعا جەتكىزگەن.
