كوكتەمگى ەگىس جۇمىستارى بىلتىرعى جىلمەن سالىستىرعاندا ەرتەرەك باستالاتىنى دا بەلگىلى بولىپ وتىر. بۇيىرتسا, 5 مامىردا ديقاندار ءدان سەبۋگە كىرىسەدى. وعان دەيىن قاجەتتى جانار-جاعارماي مەن تۇقىم, گەربيتسيدتەر ساتىپ الىنىپ, ىلعال جابۋ, العاشقى وڭدەۋ جۇمىستارى رەتتەلىپ قويىلسا قۇپ...
وڭىرلىك اۋىل شارۋاشىلىعى باسقارماسىنىڭ باسشىسى مارات اقتاەۆتىڭ ايتۋىنشا, كوكتەمگى ەگىس جۇمىستارىن جۇرگىزۋ ءۇشىن پاۆلودارلىق فەرمەرلەرگە 23,8 مىڭ توننا ارزانداتىلعان ديزەل وتىنى ءبولىندى.
– تراكتور وتىنىنا سۇرانىسىمىز بىلتىرعىدان 2 مىڭ تونناعا جوعارى. وپەراتورلىق قىزمەتتى ەسەپكە العاندا ءبىر توننا جانار-جاعارمايدىڭ قۇنى 228 مىڭ تەڭگەگە نەمەسە ءليترى ءۇشىن 191 تەڭگەگە شىعادى. بۇل – نارىقتاعى باعادان 17 پايىزعا ارزان. رەسپۋبليكا بويىنشا ەڭ ارزان ديزەل وتىنى ءبىزدىڭ وڭىرگە تيەسىلى ەكەنىن ايتىپ وتكەنىمىز ابزال. بۇل كولەم الداعى ايلارعا ءبولىنىپ بەرىلەدى. ونىڭ ىشىندە ەڭ كوبى 9,6 مىڭ توننا ءساۋىر ايىنا ءتۇسىپ وتىر. «LF TRADE» جانە «تك پارناس» سەرىكتەستىكتەرى وپەراتور رەتىندە تاڭداپ الىندى. سوڭعى مالىمەتتەرگە سۇيەنسەك, وتىننىڭ 67 پايىزىنا فەرمەرلەر اقشالارىن الدىن الا تولەپ قويىپتى. بيىل جاڭا باعدارلاماعا كوشىپ, سالدارىنان العاشقىدا تەحنيكالىق ماسەلەلەر تۋىنداعان ەدى. دەي تۇرعانمەن قازىر شارتتار جاسالىپ, وپەراتورلار جانار-جاعارمايدى وبلىسقا جەتكىزىپ تە قويدى. كەستەدەن كەشىككەن جوقپىز, – دەيدى ول.
شارۋالاردى قولداۋعا 3,6 ملرد تەڭگە ءبولىنىپتى. قاراجات مينەرالدى تىڭايتقىشتار مەن پەستيتسيدتەردىڭ قۇنىن, سۋارمالى جەرلەرگە سۋ جەتكىزۋ قىزمەتىنىڭ باعاسىن سۋبسيديالاۋعا, تۇقىم شارۋاشىلىعىن دامىتۋعا باعىتتالادى. ديقاندار وعان قوسا جەڭىلدەتىلگەن نەسيەلەرگە ءۇمىت ارتا الادى. «بايتەرەك» ۇبح» كومپانياسىنىڭ قۇرىلىمدىق بولىمشەلەرى 30 ملرد تەڭگەدەن استام سوماعا نەسيە بەرۋدى جوسپارلاپ وتىر. ونىڭ ىشىندە «قازاگروقارجى» اق ارقىلى – 17 ملرد, «اگرارلىق كرەديتتىك كورپوراتسيا» اق ارقىلى 13 ملرد تەڭگە باعىتتالادى. وسى ۋاقىتقا دەيىن جالپى سوماسى – 1,6 ملرد تەڭگەگە 50 نەسيە رەسىمدەلىپ ۇلگەرىپتى.
– «ازىق-ت ۇلىك كورپوراتسياسى» ۇك» اق بيىل كوكتەمگى دالا جۇمىستارىن جۇرگىزۋ ءۇشىن اوك سۋبەكتىلەرىن قارجىلاندىرۋدىڭ ەكى تەتىگىن ىسكە قوساتىنىن جاريالاعانى ءمالىم. ەگىس بارىسىن قارجىلاندىرۋ كورپوراتسيانىڭ فورۆاردتىق ساتىپ الۋ جانە تاۋارلىق كرەديتتەر بەرۋ جولىمەن, سونداي-اق الەۋمەتتىك-كاسىپكەرلىك كورپوراتسيالارى مەن ەكىنشى دەڭگەيلى بانكتەردىڭ كەپىلدىگىمەن جوسپارلانادى. قازىرگى ۋاقىتتا الەۋەتتى ءونىم بەرۋشىلەردىڭ ءتىزىمىن قاراۋ جانە بەكىتۋ ءۇشىن ۇيلەستىرۋ كەڭەسى قۇرىلدى. بۇل باعىتتاعى جۇمىس جالعاسىپ جاتىر, – دەپ اتاپ ءوتتى م.اقتاەۆ.
ايتا كەتەيىك, وبلىستا استىق كوپ وسىرىلەتىن وڭىرلەرگە تەرەڭكول, ەرتىس, ۋسپەن, جەلەزين, شارباقتى اۋداندارى ەنەدى. «پاۆلودار اۋىل شارۋاشىلىعى تاجىريبەلىك ستانساسىنىڭ» عالىمدارى ەگىس جۇمىستارىن 3 ماۋسىمعا دەيىن اياقتاۋعا كەڭەس بەرىپ وتىر.
پاۆلودار وبلىسى
