ەلىمىزدىڭ دۇنيەجۇزىلىك ساۋدا ۇيىمىنا كىرۋى جونىندەگى كەلىسسوزدەر مارەسىنە جەتتى

استانا. 1 شىلدە. ەلىمىزدىڭ دۇنيەجۇزىلىك ساۋدا ۇيىمىنا كىرۋىنە بايلانىستى جۇرگىزىلىپ جاتقان كەلىسسوزدەر اياقتالدى. بۇل تۋرالى nur.kz حابارلادى. اتالعان ماسەلە جونىندە ەكونوميكا جانە بيۋدجەتتىك جوسپارلاۋ ۆيتسە-ءمينيسترى تيمۋر جاقسىلىقوۆ بەرلين ەۋرازيالىق كلۋبىنىڭ 10-شى وتىرىسىندا: «2012 جىلى كلۋبتىڭ 2-ءشى وتىرىسى اياسىندا ءبىز شاراعا قاتىسۋشىلاردى قازاقستاننىڭ دۇنيەجۇزىلىك ساۋدا ۇيىمىنا كىرۋى بويىنشا كەلىسسوزدەر ۇدەرىسى جايىندا قۇلاعدار ەتتىك. سول ساتتەن باستاپ ءبىز ناقتى پروگرەسكە قول جەتكىزدىك. ەكىجاقتى فورماتتا جۇرگىزىلەتىن تاۋارلار مەن قىزمەتتەر نارىعىنا ارنالعان قولجەتىمدىلىك شارتتارى بويىنشا كەلىسسوزدەردىڭ اياقتالعانىن اتاپ وتۋگە بولادى», – دەدى. تيمۋر جاقسىلىقوۆتىڭ ايتۋىنشا,  تاۋارلار نارىعىنا قولجەتىمدىلىك بويىنشا 30 ەلمەن كەلىسسوز جۇرگىزىلگەن. بۇل كەلىسسوزدەردىڭ اياقتالعاندىعى تۋرالى حاتتاماعا قول قويىلدى. وتكەن كەزەڭ ىشىندە ەلىمىزدىڭ دۇنيەجۇزىلىك ساۋدا ۇيىمىنا كىرۋى جونىندەگى جۇمىس توبىنىڭ 18 وتىرىسى ۇيىمداستىرىلعان. وندا زاڭنامالارداعى وزگەرىستەر, قازاقستاننىڭ ىشكى كوممەرتسيالىق جانە ساۋدا ساياساتىنا قاتىسى بار حالىقارالىق كەلىسىمشارتتار تالقىلانعان. جولدىباي بازار. دەرەككوز: nur.kz. فوتو: bsr.org.