ماسەلەن, ءبىرتالاي مەكتەپ, بالاباقشا, كوللەدج عيماراتتارىندا ارنايى كۇزەت قىزمەتى جوق, تۋرنيكەت, دابىل نۇكتەسى ءتارىزدى ساقتانۋ قۇرىلعىلارى ورناتىلماعان. ال سىرتتاي بەينەباقىلاۋ جۇيەسى بەكىتىلگەن تالاپقا ساي ەمەس. 159 ءبىلىم مەكەمەسىندەگى بەينەباقىلاۋ قۇرىلعىلارى اۋىستىرۋدى قاجەت ەتەدى.
تاياۋدا پروكۋراتۋرا مەن قالالىق ءبىلىم ءبولىمى وبلىس ورتالىعىندا ورنالاسقان بىرنەشە مەكتەپكە تەكسەرۋ جۇرگىزىپ, ونداعى مامانداندىرىلعان كۇزەت قىزمەتىنىڭ قىراعىلىعىن سىناپ كورگەن. ناتيجە كوڭىل كونشىتپەيدى. تەكسەرۋ وتكەن 5 مەكتەپتە دە كۇزەت قىزمەتىنىڭ سالعىرت جۇمىس ىستەيتىنى انىقتالدى.
قوستاناي قالالىق پروكۋراتۋراسىنىڭ اعا پروكۋرورى ەلميرا نۇرقانوۆا ءوزى تەكسەرىپ شىققان مەكتەپتىڭ بىرىنە سومكەسىنە جالعان گراناتا سالىپ كىرىپ كەتكەنىن ايتتى. ءبىلىم ورداسىنا كەلگەن بەيساۋات جاننىڭ سومكەسىندە نە جاتقانى ەشكىمدى قىزىقتىرماعان.
– مەنىڭ ارىپتەسىم, ءتىپتى, «گراناتاسىن» سومكەگە جاسىرماي-اق, قولىنا ۇستاپ ءوتىپ كەتتى. تالاپ بويىنشا, مەكتەپكە كەلگەن سىرت ادامدى كۇزەتشى مەتالل ىزدەيتىن قۇرىلعىنىڭ كومەگىمەن تەكسەرىپ شىعۋعا ءتيىس. ەگەر قۇرىلعى بەلگى بەرسە, كۇزەتشىنىڭ الگى ادامنىڭ, ماسەلەن, سومكەسىن تەكسەرۋگە قۇقى بار. الايدا مۇنىڭ ءبىرىن دە ىستەگەن جوق. سونىمەن قاتار سىرتقا شىعاتىن ەۆاكۋاتسيالىق جولداردى تەكسەردىك. م.گوركي اتىنداعى №19 گيمنازيانىڭ ەۆاكۋاتسيالىق ەسىگى ق ۇلىپتاۋلى بولىپ شىقتى. پۋلتتىك كۇزەت قىزمەتى دە ءوز مىندەتتەرىن دۇرىس اتقارمايدى. كەلىسىمشارت بويىنشا قىزمەت كورسەتەتىن پۋلتتىك كۇزەت شاقىرتۋ تۇسىرگەن نىسانعا 5-10 مينۋتتىڭ ىشىندە جەتۋگە ءتيىس. ال №14 مەكتەپتىڭ پۋلتتىك كۇزەت قىزمەتى دابىل نۇكتەسى باسىلعاننان كەيىن, 27 مينۋتتان سوڭ عانا كەلدى, – دەيدى اعا پروكۋرور.
پروكۋراتۋرا تەكسەرۋ بارىسىندا انىقتالعان كەمشىلىكتەردى ءتىزىپ كورسەتىپ, قالالىق ءبىلىم بولىمىنە ەسكەرتپە حات جولداعان. ءبىلىم ءبولىمى وكىلدەرىنىڭ ايتۋىنشا, مەكتەپتەردەگى مامانداندىرىلعان كۇزەت قىزمەتى تاياۋدا عانا جۇمىس ىستەي باستاعان. قازىر كۇزەت قىزمەتىندەگى كەم-كەتىكتەردىڭ ورنىن تولتىرۋ جۇمىستارى ءجۇرىپ جاتىر. مىسالى, مەكتەپ كۇزەتشىلەرىنە جاسىنا قاراي شەكتەۋ قويىلدى. بۇدان بىلاي جاسى 50-دەن اسقان ازاماتتار ءبىلىم مەكەمەلەرىن كۇزەتۋ جۇمىسىنا قابىلدانبايدى.
ال ەندى بەينەباقىلاۋ ماسەلەسىنە كەلسەك, وبلىستىق ءبىلىم باسقارماسىنىڭ ەسەبىنشە, ەسكىرگەن بەينەقۇرىلعىلاردى جاڭارتۋعا 166 ملن تەڭگە قاجەت ەكەن. بۇعان دەيىن وسى ماقساتقا بولىنگەن 99,5 ملن تەڭگە 99 مەكتەپتى جاڭا قۇرىلعىمەن قامتاماسىز ەتۋگە جەتەدى. قالعان نىساندارعا بەينەباقىلاۋ ورناتا قوياتىنداي قارجى بولماعاندىقتان, باسقارما وبلىس بيۋدجەتىنەن 66,3 ملن تەڭگە ءبولۋدى سۇراپ وتىر. بۇل قارجى بولىنسە, وڭىردەگى بالاباقشالار مەن مەكتەپ, كوللەدجدەردىڭ بەينەكامەرالارى تولىقتاي جاڭارتىلاتىن بولادى.
قوستاناي وبلىسى
