قاردىڭ كۇرت ەرۋى – قاشاندا قاۋىپتى. قوڭىر كۇزدەن بەرى قاربالاسا قامدانعانمەن جىلعا ىزدەگەن توپان سۋدىڭ قاي تاراپتان قۇيىلارىن كۇنى بۇرىن بولجاپ ءبىلۋ استە مۇمكىن ەمەس. وبلىس ورتالىعىن جارىپ وتەتىن قىلشاقتى وزەنىندەگى سۋ دەڭگەيى لىقسي تولقىپ, ارناسىنان اسىپ كەتۋگە شاق تۇر. جەكەلەگەن اۋدانداردا سۋ باسۋ قاۋپى بار. قازىر كوممۋنالدىق قىزمەت سۋ تاسقىنىنا قارسى ءتيىستى شارالاردى اتقارۋدا. ارىقتار مەن سۋوتكىزگىش قۇبىرلار تازارتىلىپ, وزەندەگى مۇز قوپسىتىلۋدا. كەيبىر جەر ۇيلەردىڭ جانىندا پايدا بولعان قىزىل سۋ سورىلىپ, تازارتىلىپ جاتىر.
– بۇل سۋ وزەن اڭعارىمەن ەمەس, قۇبا جوننان ىلديلاي قۇيىلىپ كەلدى, دەيدى وبلىستىق توتەنشە جاعدايلار دەپارتامەنتىنىڭ باستىعى نۇرلان اتىعاەۆ, – قازىر باقىلاۋ بەكەتتەرى ارقىلى قاداعالاۋدامىز.
وبلىس ورتالىعىنىڭ كوشەلەرى قاردان ارىلعانىمەن, يەن دالاداعى تاۋ-تەڭىز قاردىڭ مۇرتى بۇزىلا قويعان جوق. قازىرگى تاڭدا استانا ماڭىنداعى قوياندى, شۇبار, قاراوتكەل, تالاپكەر, راقىمجان قوشقارباەۆ اۋىلدارىندا قىزىل سۋدى قاۋىپسىز ايماققا اعىزىپ جىبەرۋ جۇمىستارى جۇرگىزىلۋدە. تۇرعىندار كوشەلەردى كولكىگەن سۋدان ارىلتۋ حاقىندا وتىنىشتەرىن ءجيى تۇسىرۋدە.
ەگىندىكول جانە استراحان اۋداندارىندا ءبىرشاما قاۋىپ بار. استراحان اۋدانىنىڭ ەسكى كولۋتون, ياگودنوە, جاڭا تۇرمىس, جالتىر جانە قوسكول اۋىلدارىندا كولكىگەن كوك سۋ مول. قاۋىپ تە جوعارى. سەبەبى, بۇل ەلدى مەكەندەر سۋ ايدىندارىنا جاقىن ورنالاسقان.
– جەرگىلىكتى بيۋدجەتتەن كوكتەمگى سۋ تاسقىنىن الدىن الۋعا 8 ميلليون تەڭگە قاراستىرىلعان, دەيدى استراحان اۋدانى اكىمىنىڭ ورىنباسارى رۋسلان مۇقانوۆ, – سول قاراجاتقا قاجەتتى ينەرتتى ماتەريالدار مەن جانار-جاعار ماي ساتىلىپ الىندى. اۋدان اكىمشىلىگى الداعى ۋاقىتتا سەكسەنگە جۋىق ارنايى تەحنيكا ساتىپ الۋدى جوسپارلاپ وتىر.
سۋلى, نۋلى قورعالجىن اۋدانىندا 8 ەلدى مەكەندى سۋ باسۋ قاۋپى بار. ونىڭ ىشىندە نۇرا وزەنىن جاعالاي قونعان ۇيالى مەن وركەندەۋ اۋىلدارىنىڭ تۇرعىندارى الاڭداپ وتىر. قاۋىپتى ايماقتا 194 ءۇي مەن 13 ماڭىزدى نىسان بار.
– ءبىزدىڭ وڭىردە اۆتوموبيل جولدارىن دا سۋ باسىپ قالۋى مۇمكىن. مۇنداي جولداردىڭ قاشىقتىعى 800 مەتردى قۇرايدى. بىلتىر قورعالجىن اۋىلىنىڭ راقىمجان مادين جانە شوقمەت اۋباكىروۆ اتىنداعى كوشەلەردىڭ بويىنداعى ارنالار كەڭەيتىلدى. وركەندەۋ مەن ۇيالى اۋىلدارىنداعى وزەن اڭعارلارى نىعايتىلدى, – دەيدى قورعالجىن اۋدانى اكىمىنىڭ ورىنباسارى عابدى-سابىر مۇحامەددي.
سابىندى, ۇيالى, وركەندەۋ اۋىلدارىندا س-28 ەلەكتر دابىلقاققىشتارى دا ورناتىلىپتى. 117 جولاستى سۋ وتكىزۋ قۇبىرلارى قاردان ارشىلعان. قىزىل سۋدىڭ قاۋپىنەن ساقتانۋ جۇمىستارى ارشالى اۋدانىندا دا جۇرگىزىلۋدە. ەلدى مەكەندەردەن 528 669 تەكشە مەتر قار شىعارىلعان. تۇرگەن اۋىلىنىڭ جانىن جاناي وتەتىن ەسىل وزەنىنىڭ ءۇش اڭعارىندا جارىلىس جۇمىستارى جۇرگىزىلىپ, اعىن سۋدىڭ جولى اشىلدى. جىبەك جولى اۋىلىندا 300 توننا, باتپاقكول سۋ ايدىنىنىڭ جاعالاۋىن بەكىتۋ ءۇشىن 400 توننا ينەرتتى ماتەريالدار ازىرلەنگەن.
كۇن قاباعىنا قاراعاندا كوكتەم كۇشىنە ەنىپ كەلەدى. كوكشەنىڭ ساي-سالاسى دا قىزىل سۋعا مەلدەكتەي تولاتىن ۋاقىت الىس ەمەس. سوندىقتان مەيلىنشە ساق بولعان ءجون.
اقمولا وبلىسى
