«تاعى ءبىر ماسەلە – سۋ قاۋىپسىزدىگىن قامتاماسىز ەتۋ. بۇل – ستراتەگيالىق ماڭىزى بار مىندەت. الداعى ۋاقىتتا سۋ ماسەلەسى ۋشىعىپ كەتۋى مۇمكىن. سول سەبەپتى بىزگە ونىڭ الدىن الۋ قاجەت. قازىر ۇكىمەت سۋ كودەكسىنىڭ جاڭا جوباسىن ازىرلەپ جاتىر», دەدى پرەزيدەنت.
مەملەكەت باسشىسىنىڭ ايتۋىنشا, سۋ رەسۋرستارىن ءتيىمدى باسقارۋعا جانە ولاردى قورعاۋعا باسا نازار اۋدارۋ كەرەك.
«وسى جۇمىستا عىلىمي ۇستانىمدى, يننوۆاتسيانى, حالىقارالىق وزىق تاجىريبەنى باسشىلىققا العان ابزال. ءبىزدىڭ ەلدە سۋدىڭ 65 پايىزى اۋىل شارۋاشىلىعى سالاسىنا جۇمسالادى. سونىڭ 60 پايىزعا جۋىعى قۇمعا ءسىڭىپ كەتەدى. مۇنداي ىسىراپشىلدىققا جول بەرۋگە بولمايدى. جاڭا تاريف ساياساتىنا كوشۋ قاجەت. ونى دەرەۋ قولعا الماساق, احۋال ودان ءارى كۇردەلەنە تۇسەتىنى انىق», دەپ اتاپ ءوتتى ول.
