حالىقارالىق ءبىلىم جەتىستىكتەرىن باعالاۋ قاۋىمداستىعى (IEA) 1995 جىلدان باستاپ TIMSS زەرتتەۋىن ءتورت جىلدىق تسيكلمەن وتكىزىپ كەلەدى. اۋقىمدى زەرتتەۋگە الەمنىڭ 60-تان اسا ەلى قاتىسادى. ال قازاقستان 2007 جىلدان بەرى تۇراقتى قاتىسىپ كەلەدى.
ءبىلىم بەرۋ سالاسىنداعى ساپانى قامتاماسىز ەتۋ كوميتەتىنىڭ اقپاراتى بويىنشا, بيىل ءساۋىر ايىنان باستاپ TIMSS-2023 حالىقارالىق زەرتتەۋىنىڭ نەگىزگى كەزەڭى باستالادى. وعان رەسپۋبليكالىق ماڭىزى بار 3 قالا مەن 17 وڭىردەگى 195 مەكتەپتەن 12 مىڭنان استام وقۋشى قاتىسادى.
«زەرتتەۋدىڭ ماقساتى – باستاۋىش جانە نەگىزگى مەكتەپ وقۋشىلارىنىڭ جاراتىلىستانۋ جانە ماتەماتيكالىق دايىندىعىنىڭ ساپاسىن باعالاۋ. زەرتتەۋگە ءتورتىنشى جانە سەگىزىنشى سىنىپ وقۋشىلارى, مەكتەپ اكىمشىلىگى, ماتەماتيكا جانە جاراتىلىستانۋ پاندەرىنىڭ مۇعالىمدەرى, ءتورتىنشى سىنىپ وقۋشىلارىنىڭ اتا-انالارى قاتىسادى. وقۋشىلار تەستىلەۋ مەن ساۋالنامادان وتەدى. اتا-انالار, اكىمشىلىك جانە مۇعالىمدەر اراسىندا ساۋالناما جۇرگىزىلەدى. TIMSS زەرتتەۋى 2023 جىلدان باستاپ كومپيۋتەرلىك فورماتتا وتكىزىلەدى», دەپ ءتۇسىندىردى كوميتەت توراعاسى ەرنۇر داۋەنوۆ.
TIMSS زەرتتەۋى مەكتەپتەگى ساباقتاستىقتى باعالاۋعا مۇمكىندىك بەرەتىنىن ايتا كەتۋ كەرەك. ماسەلەن, TIMSS-2023-كە قاتىساتىن سەگىزىنشى سىنىپ وقۋشىلارى TIMSS-2019-دا ءتورتىنشى سىنىپتا وقىدى. پەداگوگيكالىق قوعامداستىق باستاۋىش جانە نەگىزگى مەكتەپ اراسىنداعى ساباقتاستىقتى قامتاماسىز ەتۋ ءۇشىن جاراتىلىستانۋ-ماتەماتيكالىق تسيكل پاندەرىن وقىتۋدىڭ جاڭا ادىستەمەلەرىن پايدالانا الادى.
سونداي-اق TIMSS زەرتتەۋى وقۋشىلاردىڭ ءبىلىم دەڭگەيىنە اسەر ەتەتىن فاكتورلاردى انىقتاۋعا كومەكتەسەدى. زەرتتەۋ ناتيجەلەرى بويىنشا قازاقستاننىڭ بۇعان دەيىنگى تسيكلدەرگە قاتىسۋ قورىتىندىلارىن ەسكەرىپ, ۇلتتىق ەسەپ جاريالايتىن بولادى.
