«وسى جىلى جەرگىلىكتى ماڭىزى بار جولدارداعى قۇرىلىس, رەكونسترۋكتسيا جانە جوندەۋگە 353 ملرد تەڭگە ءبولىندى. بولىنگەن قاراجات ەسەبىنەن 4 مىڭ شاقىرىمعا جۇمىس جۇرگىزۋ جوسپارلانىپ وتىر», دەدى كوميتەت وكىلى.
ميمنيسترلىك مامانى كەلتىرگەن مالىمەتتەرگە سۇيەنسەك, 2022 جىلى رەسپۋبليكالىق جەلى بويىنشا 11,6 مىڭ شاقىرىم جول جوندەۋ جۇمىستارىمەن قامتىلعان. ونىڭ ىشىندە 4 مىڭ شاقىرىمىندا قۇرىلىس جانە رەكونسترۋكتسيا ەسكەرىلگەن. سونىڭ 1,2 مىڭ شاقىرىمىندا نەگىزگى جۇمىستار اياقتالدى. كۇردەلى جانە ورتاشا جوندەۋمەن 3 مىڭ شاقىرىم جول قامتىلىپ, ونىڭ 679 شاقىرىمى تاپسىرىلعان.
ال وتكەن جىلى رەسپۋبليكالىق جەلى بويىنشا 11.6 مىڭ جول جۇمىستارىمەن قامتىلعان. سونىمەن قاتار بىلتىر جەرگىلىكتى اۆتوجولدار جەلىسىندە جوندەۋدىڭ بارلىق تۇرلەرىمەن 4,6 مىڭ شاقىرىم جول قامتىلدى, ونىڭ ىشىندە 3 مىڭ شاقىرىمى پايدالانۋعا بەرىلگەن.
جىل قورىتىندىسى بويىنشا نورماتيۆتىك جاعدايداعى جولداردىڭ ۇلەسى رەسپۋبليكالىق جەلى بويىنشا 91 پايىزعا دەيىن, ال جەرگىلىكتى جەلى بويىنشا 85 پايىزعا دەيىن ۇلعايتىلعان.
الداعى ۋاقىتتا مينيسترلىك تاراپىنان رەسپۋبليكالىق ماڭىزى بار ءىرى 3 جوبا جۇزەگە اسىرىلادى. اتاپ ايتقاندا, ۇزىندىعى – 521 شاقىرىمدى قۇرايتىن ورال قالاسىنىڭ وڭتۇستىك-باتىس اينالما جولى بويىنشا «اتىراۋ-ورال» باعىتى, 513 شاقىرىمدى قۇرايتىن «جەزقازعان-قاراعاندى» باعىتى جانە 262 شاقىرىم بولاتىن «اقتوبە-ۇلعايسىن» باعىتى.
سونىمەن بىرگە جول-جوندەۋ جۇمىستارىنىڭ ساپاسى جانە اۆتوجولداردىڭ بۇگىنگى جاي-كۇيىن دياگنوستيكالاۋعا قاتىستى زاڭنامادا بىرقاتار تۇزەتۋلەر قابىلدانعانى بەلگىلى بولدى. ەندى ەلدى مەكەن كوشەلەرىن جوندەۋگە ۆەدومستۆولىق ساراپتاما جۇرگىزۋ وكىلەتتىگى ۇلتتىق ساپا ورتالىعىنا بەرىلەدى.
سونىمەن بىرگە زاڭنامادا جول بويىنداعى قىزمەت كورسەتۋ نىساندارىن سالۋ ءۇشىن جەر بەرۋ ءراسىمىن وڭايلاتۋ جونىندەگى ماسەلەلەرى دە پىسىقتالىپ جاتقاندىعى ايتىلدى.
«قازىرگى تاڭدا رەسپۋبليكالىق ماڭىزى بار اۆتوموبيل جولدارىنىڭ بويىندا 1 634 نىسان بار. سونىڭ 74%-ى ۇلتتىق ستاندارت تالاپتارىنا ساي كەلەدى. بيىل تاعى 78 قىزمەت كورسەتۋ نىسانىن ىسكە قوسۋ كوزدەلگەن, ونىڭ 53 وبەكتىسى جەكە ينۆەستيتسيالاردى تارتۋ ەسەبىنەن جانە رەكونسترۋكتسيالاۋ مەن جوندەۋ شەڭبەرىندە 25 سانيتارلىق-گيگيەنالىق توراپ قويىلماق», دەدى امانگەلدى بەكوۆ.
ەلىمىزدەگى اۆتوموبيل جولدارىنىڭ جالپى ۇزىندىعى 96 مىڭ شاقىرىمدى قۇراپ وتىر. سونىڭ 25 مىڭ شاقىرىمى – رەسپۋبليكالىق ماڭىزى بار جولدار, ال 71 مىڭ شاقىرىمى وبلىستىق جانە اۋداندىق ماڭىزى بار جولدار ساناتىندا. رەسپۋبليكالىق ماڭىزى بار جولدار يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ قاراماعىندا.
مەملەكەتتىك تاپسىرىس اياسىندا دامىتۋ جانە كۇتىپ-ۇستاۋ جونىندەگى جۇمىستاردى ۇيىمداستىرۋدى ۇلتتىق وپەراتور «قازاۆتوجول» ۇلتتىق كومپانياسى جۇزەگە اسىرادى. ال وبلىستىق جانە اۋداندىق ماڭىزى بار اۆتوجولداردى, سونداي-اق كوشە-جول جەلىسى جەرگىلىكتى اتقارۋشى ورگانداردىڭ قاراۋىندا.
