مۇندا شىعارىلاتىن ونىمدەردىڭ اراسىندا سۇيىتىلعان كومىرسۋتەكتى گازدار, اۆتوموبيل جانارمايى, ديزەل, رەاكتيۆتى قوزعالتقىشتارعا ارنالعان, پەش پەن كەمە وتىندارى, ۆاكۋمدىق گازويل, مازۋت, مۇناي كوكستارى, تەحنيكالىق كۇكىرت, پاراكسيلول مەن بەنزول سەكىلدى ونىمدەر بار. زاۋىتتىڭ مۇناي وڭدەۋ قۋاتى جىلىنا 5,5 ملن توننانى, ال وڭدەۋ تەرەڭدىگى 86,4 پايىزدى قۇراپ وتىر.
– بىلتىر كاسىپورىننىڭ 32 تەحنولوگيالىق قوندىرعىسىنا كەڭ اۋقىمدى جوسپارلى جوندەۋ جۇمىستارى جۇرگىزىلدى. بىراق سوعان قاراماستان, زاۋىتتا 5 ملن 224 مىڭ توننا شيكى مۇناي وڭدەلدى. كومىرسۋتەكتى شيكىزاتتى وڭدەۋ ارقىلى 1 ملن 262 مىڭ توننا اي-92, اي-95, اي-98 ماركالى جانارمايلار شىعارىلدى. بۇعان قوسا 1 ملن 469 مىڭ توننا ديزەل وتىنى, 132 مىڭ توننا رەاكتيۆتى وتىن, 126 مىڭ توننا سۇيىتىلعان گاز تۇتىنۋشىعا ۇسىنىلدى. بۇل ونىمدەردىڭ ءبارى ك-4 جانە ك-5 ەكولوگيالىق كلاستارىنىڭ تالاپتارىنا سايكەس كەلەدى, دەيدى زاۋىتتىڭ باس ديرەكتورى مۇرات دوسمۇراتوۆ.
باس ديرەكتوردىڭ مالىمەتىنشە, اتموسفەراعا 10 400 توننا لاستاۋشى زاتتار شىعارىلعان. بىراق كورسەتكىش 2021 جىلدىڭ كورسەتكىشىمەن سالىستىرعاندا 1 400 تونناعا از. اعىندى سۋلاردى جىبەرۋ كولەمى 6 مىڭ توننانى قۇراعان.
– بيىل زاۋىت جۇمىسىنىڭ تيىمدىلىگىن ارتتىرىپ, ىشكى نارىقتى ساپالى مۇناي ونىمدەرىمەن ۇزدىكسىز قامتاماسىز ەتۋدى كوزدەپ وتىرمىز. زاۋىتتا جىل سوڭىنا دەيىن وڭدەلەتىن كومىرسۋتەكتى شيكىزات كولەمى 5 ملن 400 مىڭ تونناعا دەيىن جەتكىزىلەدى. ال مۇناي وڭدەۋ تەرەڭدىگىن 80,15 پايىزعا دەيىن ۇلعايتۋ, تەحنولوگيالىق وتىندى جاعۋ كورسەتكىشىن 12,17 پايىزعا دەيىن جەتكىزۋ جوسپارى بار, دەيدى م.دوسمۇراتوۆ.
مۇناي وڭدەۋ سالاسىنداعى ءىرى كاسىپورىن بىلتىر 113 ملرد تەڭگە سالىق تولەگەن. ونىڭ ىشىندە 22,6 ملرد تەڭگە رەسپۋبليكالىق بيۋدجەتكە, ال 90,4 ملرد تەڭگە جەرگىلىكتى بيۋدجەتكە اۋدارىلعان.
وسىنداي كورسەتكىشتەرى جىل سايىن ارتىپ وتىرعان زاۋىتتىڭ بىرنەشە تسەحى اۋتسورسينگكە بەرىلىپ كەتكەن. بىراق وزگەنىڭ باسقارۋىندا بولعان تسەحتاردىڭ جاعدايى بۇرىنعىدان جاقسارا قويعان جوق. سول سەبەپتەن, بىلتىرعى 29 جەلتوقساندا وتاندىق ەكونوميكانى مونوپولياسىزداندىرۋ جونىندەگى كوميسسيا مۇشەلەرى اتىراۋ مۇناي وڭدەۋ زاۋىتىنىڭ بۇرىن اۋتسورسينگكە بەرىلگەن تەحنيكالىق سەرۆيستىك فۋنكتسيالارىن كەرى قايتارۋ جونىندە شەشىم شىعاردى. سوعان سايكەس ءۇش تسەح پەن ءبىر ورتالىقتى كەرى قايتارۋ شارالارىن جۇزەگە اسىرۋ ءۇشىن «قازمۇنايگاز» ۇك» اق وكىلدەرىمەن بىرلەسكەن جۇمىس توبى قۇرىلدى.
بيىلعى 1 ناۋرىزدا اتىراۋ مۇناي وڭدەۋ زاۋىتىنىڭ قۇرامىنا تەحنولوگيالىق ۇدەرىستەرگە ىقپال ەتەتىن ءۇش تسەح پەن ءبىر ورتالىق كەرى قايتارىلدى. بۇلاردا 650-دەن اسا ادام جۇمىس ىستەيدى.
زاۋىت باسشىلارىنىڭ پىكىرىنە سۇيەنسەك, وندىرىستىك اكتيۆتىڭ كەرى قايتارىلعانى مۇناي وڭدەۋشىلەر مۇمكىندىگىن بۇرىنعىدان دا ارتتىرا تۇسەدى. ويتكەنى جوندەۋ-مەحانيكالىق تسەحىنىڭ كاسىبي ماماندارى تەحنولوگيالىق جانە ديناميكالىق جابدىقتاردىڭ, مەتالل كونسترۋكتسيالارى مەن عيماراتتاردىڭ جۇمىسىن قامتاماسىز ەتەدى. ال ەنەرگەتيكتەر توبى جۇمىس ىستەيتىن تسەح ەلەكتر جابدىقتارى مەن ەلەكتر جەلىلەرىنىڭ جۇمىسى توقتاماۋىنا ىقپال ەتەدى. سونداي-اق ءۇشىنشى تسەح قىزمەتكەرلەرى باقىلاۋ-ولشەۋ اسپاپتارى مەن اۆتوماتيكا قۇرالدارىن جوندەپ, تەحنيكالىق قىزمەت كورسەتەدى. جوبالىق-كونسترۋكتسيالىق ورتالىعىنىڭ ماماندارى جوبالىق-سمەتالىق قۇجاتتاردى ازىرلەيدى.
اتىراۋ وبلىسى
