وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, زاڭدى بەلدەن باسقان شەتەلدىكتەر «ميگرانت» جەدەل پروفيلاكتيكالىق ءىس-شاراسى كەزىندە ءجيى انىقتالادى. جاقىندا اتىراۋ وبلىسىندا 900-دەن استام شەتەلدىكتىڭ قۇجاتسىز جۇرگەنى بەلگىلى بولدى. ماسەلەن, 583 وزگە ەلدىڭ ازاماتى ەلىمىزدىڭ كوشى-قون زاڭناماسىن بۇزعانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 517-بابىنىڭ 3, 4, 5, 6 جانە 7-بولىگىمەن اكىمشىلىك جاۋاپقا تارتىلعان. ال شەتەلدىڭ 31 ازاماتىنا اتالعان قۇجاتتىڭ 519-بابىمەن, 372 زاڭسىز «قوناققا» 518-بابىمەن اكىمشىلىك حاتتاما تولتىرىلعان. سونداي-اق اكىمشىلىك قۇقىق بۇزعان 31 شەتەلدىك ازاماتتىق ءىس جۇرگىزۋ جانە اكىمشىلىك تارتىبىمەن ەل اۋماعىنان شىعارىلدى. جەكە باسىن انىقتايتىن قۇجاتتاردىڭ بولماۋىنا بايلانىستى وزبەكستان رەسپۋبليكاسىنىڭ 91 ازاماتى قابىلداۋ-تاراتۋ ورنىنا ورنالاستىرىلدى.
– «ميگرانت» ءىس-شاراسى كەزىندە اتىراۋ قالالىق پوليتسيا باسقارماسى №2 پوليتسيا ءبولىمىنىڭ ۋچاسكەلىك پوليتسيا ينسپەكتورى نۇرسۇلتان كەڭەسوۆ قۇجاتسىز جۇرگەن 72 جاستاعى شەتەلدىكتى انىقتادى. وزبەكستان رەسپۋبليكاسىنىڭ ازاماتى قازاقستانعا 2000-جىلدارى كەلىپ, قازاقستاندىق ايەلمەن وتباسىن قۇرعان. قازىر ەرلى-زايىپتىلاردىڭ ورتاق بەس بالاسى بار. شەتەلدىكتىڭ ايتۋىنشا, سول جىلدارى ازاماتتىق الۋ ءۇشىن قۇجات دايىنداماق بولعانىمەن, بۇل ءىستى سوڭىنا دەيىن جەتكىزبەگەن, – دەپ حابارلادى دەپارتامەنتتىڭ ءباسپاسوز قىزمەتى.
اتىراۋ قالالىق پوليتسيا باسقارماسى كوشى-قون قىزمەتى ءبولىمىنىڭ قىزمەتكەرلەرى ەلدە بولۋ زاڭدىلىعىن بۇزعان ەگدە جاستاعى وزبەكستاندىققا قاتىستى ءىس-قۇجاتتاردى جيناقتادى. ناقتىلاي ايتقاندا, 1951 جىلعى شەتەلدىكتىڭ جەكە باسىن انىقتاپ, ەلىنە قايتارۋ ءۇشىن ءتيىستى قۇجاتتار تىزبەسىن وزبەكستان رەسپۋبليكاسىنىڭ اقتاۋ قالاسىنداعى كونسۋلدىعىنا جولدادى. ءدال وسىعان ۇقساس دەرەك قىزىلقوعا اۋدانىندا انىقتالىپ وتىر. اۋداندىق پوليتسيا ءبولىمىنىڭ ۋچاسكەلىك پوليتسيا ينسپەكتورى قايىربەك قامالادەنوۆ اكىمشىلىك اۋماقتاعى تۇرعىن ۇيلەردى تەكسەرۋ كەزىندە وزبەكستاندىق ايەلدى انىقتاپ, كوشى-قون قىزمەتى توبىنا جەتكىزدى. اتالعان توپ قىزمەتكەرلەرى شەتەلدىك ايەلدىڭ قازاقستان رەسپۋبليكاسىنىڭ اۋماعىنا 2010-جىلدارى كىرگەنىن انىقتادى. سودان بەرى قۇجاتىنىڭ ەلدە بولۋ مەرزىمى بىتكەنىن بىلە تۇرا, قازاقستان اۋماعىنان ءوز ەركىمەن شىعىپ كەتپەگەن. وزبەكستاندىق ايەل قازاقستان ازاماتىنا كۇيەۋگە شىعىپ, زاڭدى نەكەگە وتىرعان. ەكى بالانى دۇنيەگە اكەلگەن. شەتەلدىكتىڭ تۇسىندىرۋىنشە, قازاقستان رەسپۋبليكاسىنىڭ ازاماتتىعىن الۋعا نيەتى بولعان. بىراق 13 جىلدان بەرى ازاماتتىق الۋعا قاجەتتى قۇجاتتاردى تولىق جيناقتاپ تاپسىرماعان.
قازىر كوشى-قون قىزمەتى توبىنىڭ قىزمەتكەرلەرى شەتەلدىكتىڭ كوشى-قون زاڭدىلىعىن بۇزعانىنا بايلانىستى حاتتاما تولتىردى. جيناقتالعان ءىس-قۇجاتتارى قىزىلقوعا اۋداندىق سوتىنا جىبەرىلدى.
اتىراۋ وبلىسى
