– اۋىلعا كىرەبەرىستە ۇزىندىعى 50 مەتردەي جول سۋ استىندا قالدى. ودان ءارى 100 مەتر وتكەن سوڭ, تاعى 100-150 مەتر گرەيدەردى سۋ باسىپ جاتىر. سول ەكى جەر تەلەگەي-تەڭىز. بۇل ەندى قازىر كەپپەيدى. جۇرتتىڭ ءبارى كولدى اينالىپ ءوتىپ جاتىر. بىراق دالا ءالى دۇرىس كەبە قويعان جوق. اۋىلدان شىققان كولىكتەر ءار جەردە باتىپ قالىپ جاتىر, دەيدى احمەت اۋلىنىڭ تۇرعىنى ناريمان شورمان.
جول ۇستىندەگى سۋدىڭ تەرەڭدىگى شامامەن جارتى مەترگە دەيىن بارادى. مۇندا قازىر وبلىستىق توتەنشە جاعداي دەپارتامەنتىنەن كەلگەن 3 تەحنيكا, 14 قۇتقارۋشى, جەرگىلىكتى اكىمدىك بولگەن 4 تەحنيكا مەن 30 ادام جۇمىس ىستەپ جاتىر. وقيعا ورنىنا كەلگەن وبلىستىق توتەنشە جاعداي دەپارتامەنتى باستىعىنىڭ مىندەتىن اتقارۋشى, ازاماتتىق قورعانىس پولكوۆنيگى ازامات ورىنباەۆتىڭ ايتۋىنا قاراعاندا, سوڭعى كۇندەرى ۇلى جىلانشىق وزەنىندەگى سۋ دەڭگەيى بىرتىندەپ تومەندەي باستاعان. سوندىقتان الداعى 4-5 كۇننىڭ ىشىندە سۋ تومەندە تۇرعان اقكولگە قاراي تارتىلىپ, كوپ كەشىكپەي جول دا اشىلادى دەگەن بولجام بار.
اقكولدىڭ اينالاسى اق تەڭىزگە اينالعانىمەن ەلدى مەكەندەر مەن شارۋاشىلىققا قاۋىپ ءتونىپ تۇرعان جوق. سۋ تارتىلعانشا جاعدايدى قۇتقارۋشى ماماندار باقىلاپ وتىراتىن بولادى.
ال جەرگىلىكتى تۇرعىندار جول قاتىناسىنىڭ قيىنداپ كەتكەنىنە قىنجىلعانىمەن, سۋدىڭ مول كەلگەنىن جاقسىلىققا بالاپ وتىر. باياعىدا تەڭىز بولىپ تولىسىپ جاتاتىن اقكولدىڭ سۋى جىل ساناپ ازايىپ, تارتىلىپ, جاعادان ۇزاپ كەتكەن ەدى. بىرنەشە جىلعا سوزىلعان قۇرعاقشىلىقتىڭ سالدارىنان احمەت اۋىلىنىڭ اينالاسى دا قۋ تاقىرعا اينالىپ, جۇرت اۋىلدان 110 شاقىرىمعا دەيىن ۇزاپ بارىپ ءشوپ شاۋىپ اكەلەتىن جاعدايعا جەتكەن.
وبلىس ورتالىعىنان 700 شاقىرىم الىس, قياندا جاتقان ەكى اۋىلدىڭ تۇرمىس-تىرشىلىگى ۇلى جىلانشىق وزەنى مەن اقكولگە قاراپ وتىر. كولدىڭ جان-جاعىندا بىرنەشە شارۋا قوجالىقتارى بار. ولار باعىپ وتىرعان مالدىڭ قوڭدى-قوڭسىز بولۋى دا اقكولگە بايلانىستى.
– مەن وسى اۋىلدىڭ بايىرعى تۇرعىنىمىن. جاسىم – 81-دە. مىناۋ – اللانىڭ كوپتەن كورسەتكەن سۋى. سوڭعى رەت 2005 جىلى كەلىپ ەدى. بيىل تاعى قاپتاپ كەلىپ, بۇكىل اۋىل قۋانىپ جاتىر. ءاۋ باستا سەل باسىپ كەتە مە دەگەن قورقىنىش بولىپ ەدى. قازىر وزەن تارتىپ كەتتى. ءبارى ورنىنا كەلەيىن دەپ تۇر. ەشقانداي قاۋىپ جوق. ءبىزدىڭ قامىمىزدى ويلاپ وبلىستان كەلىپ جاتقان قۇتقارۋشىلارعا كوپ-كوپ راحمەت. بۇگىن اۋدان اكىمى دە كەلىپ, جاعدايدى ءوز كوزىمەن كورىپ كەتتى. بيىل جولدىڭ سۋ باسقان تۇسىن بيىكتەتىپ, سۋ وتكىزگىش قۇبىر سالامىز دەپ ۋادە ەتتى. قازىرگى جاعدايىمىز جامان ەمەس. تاسىعان سۋ اقكولگە قۇيىلىپ جاتىر. بۇل كول ءبىزدىڭ ىرىسىمىز. اقكولدىڭ سۋى مول بولسا, بالىق تا, ءشوپ تە مول بولادى, دەيدى احمەت اۋىلىنىڭ تۇرعىنى قاسقىرباي كەنجەعۇلوۆ.
وبلىستىق توتەنشە جاعداي دەپارتامەنتىنىڭ مالىمەتىنشە, قازىرگى تاڭدا وبلىس اۋماعىنداعى ەلدى مەكەندەرگە سۋ تاسقىنىنان قاۋىپ ءتونىپ تۇرعان جوق. وڭتۇستىككە قاراي ورنالاسقان ارقالىق, امانگەلدى, جانگەلدين اۋداندارىندا قاردىڭ 95 پايىزى ەرىگەن. قىزىل سۋ وزەن ارنالارىنا ءتۇسىپ, سۋ تاسىپ جاتىر. بىراق سۋدىڭ دەڭگەيى بىرتە-بىرتە تومەندەپ كەلەدى.
قوستاناي وبلىسى
