مىڭجىلدىقتارعا ۇلاسىپ جاتقان دالا تاريحىنىڭ ەرتە كەزەڭدەرىنەن سىر شەرتەتىن باعا جەتپەس كونە جادىگەرلەردىڭ ىشىندە ءۇش بىردەي «التىن ادام» بار. ونىڭ ىشىندەگى ەڭ ايگىلىسى – وتكەن عاسىرداعى الپىسىنشى جىلداردىڭ اياعىندا اتاقتى ارحەولوگ-عالىم كەمال اقىشەۆ جەتەكشىلىك ەتكەن قازبا جۇمىستارى كەزىندە ەسىك قورعانىنان تابىلعان «التىن ادام».
ءبىزدىڭ داۋىرگە دەيىنگى ءىV-ءىىى عاسىرلاردان جەتكەن ساق كوسەمىنىڭ اسكەري كيىمى بارىس, بۇلان, تاۋتەكە, ارقار, سايگ ۇلىك كەيپىندەگى 4 مىڭعا جۋىق التىن اشەكەيمەن بەزەندىرىلگەن. قۇندى جادىگەر ۇلى دالا تاريحىنىڭ التىن وڭدەۋ تەحنولوگياسى مەن زەرگەرلىك ونەر دامىعان كونە كەزەڭدەردەن سىر شەرتىپ تۇرعانداي.
كورمەگە قويىلعان ەكىنشى «التىن ادام» – 1999 جىلى بەلگىلى عالىم زەينوللا ساماشەۆ جەتەكشىلىك ەتكەن ارحەولوگيالىق زەرتتەۋ جۇمىستارىنىڭ ناتيجەسىندە اتىراۋ وڭىرىندەگى ارالتوبە وباسىنان تابىلعان سارمات كوسەمى.
تاريحي-تانىمدىق ءمانى زور ەكسپوزيتسيانىڭ ءۇشىنشى ءبولىمى «تاقساي قازىنالارى» دەپ اتالادى.
«2012 جىلى عالىم مۇرات سىدىقوۆ باستاعان ارحەولوگيالىق قازبا جۇمىستارى كەزىندە «تاقساي» كەشەنىندە جۇرگىزىلگەن قازبا جۇمىستارى بارىسىندا ەجەلگى سارمات كەزەڭىنە جاتاتىن اقسۇيەك ايەلدىڭ جەرلەنگەن ورنى تابىلعان. قابىردە ايەل ادامنىڭ التىن اشەكەي بۇيىمدارى, ەرەكشە شوشاق توبەلى التىنداعان باسكيىم قالدىعى, سوعىس كورىنىسى بەينەلەنگەن تاراق, وزگە دە زاتتار بولعان ەكەن. تابىلعان التىن بۇيىمداردىڭ سالماعى 3 كگ-عا جۋىق. جالپى, قازاقستان اۋماعىندا بۇگىنگە دەيىن سەگىز التىن كيىمدى ادامنىڭ جەرلەنگەن ورنى انىقتالىپ وتىر», – دەيدى وبلىستىق تاريحي-ولكەتانۋ مۋزەيىنىڭ ديرەكتورى باتىرحان جۇماباەۆ.
ۇيىمداستىرۋشىلاردىڭ ايتۋىنشا, « ۇلى دالا امىرشىلەرى» كورمەسى 21 ساۋىرگە دەيىن جۇمىس ىستەيدى.
قوستاناي وبلىسى
