الەۋمەتتىك مەديتسينالىق ساقتاندىرۋ قورى استانا قالالىق فيليالىنىڭ حابارلاۋىنشا, اتالعان ورتالىق دارىگەرلەرى كوپتەگەن كلينيكالىق تالداۋ جۇرگىزە كەلە, ناۋقاستىڭ وڭ جامباسىنىڭ وستەوتومياسىن تۇزەتىپ, بلوكاتورلىق پلاستينكامەن سينتەز جاساۋعا, ەكى جىلىنشىگىنىڭ سۇيەكتەرىنىڭ وستەوتومياسىن تۇزەتۋگە, قۇرساۋلايتىن وزەكشەمەن وستەوسينتەزدەۋگە شەشىم قابىلدادى. ۇزاق وڭالتۋدان كەيىن ول اياعىنان تۇردى. ەمدەۋ ءمامس جۇيەسى اياسىندا جۇرگىزىلدى.
قىزىلوردالىق 25 جاستاعى ناۋقاستىڭ ەكى اياعىنىڭ اۋىرۋ تاريحى بالا كەزىنەن باستالعان ەكەن. ول ءوز اياعىمەن جۇرگىسى كەلەتىنىن ايتىپ, كومەك سۇراپ 2014 جىلى العاش رەت ەلورداداعى تراۆماتولوگيا جانە ورتوپەديا ورتالىعىنا كەلگەن. وعان بۇل جەردە كونسەرۆاتيۆتى ەم جۇرگىزىلگەن.
№2 ورتوپەديا بولىمشەسىنىڭ ەمدەۋشى دارىگەرى اسەت نۇراحمەتوۆتىڭ ايتۋىنشا, تەكسەرۋ كەزىندە ناۋقاس مۇگەدەكتەر ارباسىنىڭ كومەگىمەن قوزعالاتىن. ەكى جىلىنشىكتىڭ جانە وڭ جامباستىڭ ءپىشىنى ورەسكەل وزگەرگەنى, كوپ جازىقتى دەفورماتسياسى, ەكى اياقتىڭ بۇلشىق ەتتەرىنىڭ گيپوتروفياسى بايقالاتىن ەدى.
«ناۋقاس بالا كەزىنەن باستاپ ءتۋابىتتى وستەوگەنەز كەمىستىگىمەن, ەكى اياقتىڭ كوپ جازىقتى دەفورماتسياسىمەن اۋىرعان. پاتولوگيالىق سىرقات سالدارىنان اياقتارى بىرنەشە رەت سىنعان. ورتالىق دارىگەرلەرى پاتسيەنتتىڭ جاعدايىن ەگجەي-تەگجەي تەكسەرە كەلە قابىلداعان ەمشارانىڭ ناتيجەسىندە, ۇزاق وڭالتۋدان كەيىن ول ءوز اياعىنا تۇردى», دەپ ءتۇسىندىردى اسەت اسقار ۇلى.
ءوز كەزەگىندە دەرتىنە داۋا تاپقان ناۋقاس جوعارى بىلىكتى دارىگەردىڭ ەڭبەگىن ەرەكشە باعالاپ, زور العىسىن جاۋدىردى.
«اكادەميك ن.ج.باتپەنوۆ اتىنداعى ورتالىق دارىگەرلەرىنىڭ ارقاسىندا, ءمامس سەپتىگىمەن جىلدار بويى وڭالتۋدان ءوتىپ, قازىر ءوز اياعىممەن جۇرەمىن. مەنى اياعىما تۇرعىزعانى ءۇشىن ءومىر بويى العىس ايتامىن. قازىر بەلسەندى ءومىر سالتىن ۇستانامىن, بي بيلەپ, ءتىپتى ساحنادا ءان ايتامىن», دەپ قۋانىشىمەن ءبولىستى قىزىلوردالىق ازامات.
قازىرگى تاڭدا ول تۇرعىلىقتى جەرى بويىنشا ەمحاناداعى تراۆماتولوگ دارىگەردىڭ باقىلاۋىنا اۋىسقان.
بۇل رەتتە الەۋمەتتىك مەديتسينالىق ساقتاندىرۋ قورىنان مەديتسينالىق قىزمەت كورسەتۋگە قوماقتى قاراجات بولىنەتىنىن ايتا كەتكەن ءجون. جىل سايىن مەديتسينالىق ساقتاندىرۋ ەسەبىنەن تراۆماتولوگيا, نەيروحيرۋرگيا, كارديوحيرۋرگيا, ۋرولوگيا, ونكولوگيا جانە باسقا دا سالالار بويىنشا جۇزدەگەن قىمبات وپەراتسيا جاسالادى. مىسالى, 2022 جىلى ەلوردادا جوعارى تەحنولوگيالىق مەديتسينا كومەگىمەن 7 885 وپەراتسيا جاسالدى. وسىنداي ءبىر عانا كۇردەلى وپەراتسيانىڭ قۇنى ورتا ەسەپپەن بىرنەشە ميلليون تۇرۋى مۇمكىن.
سونىمەن قاتار ءمامس جۇيەسىندە كورسەتىلەتىن قىزمەتتەردىڭ ىشىندەگى باسىم باعىتتاردىڭ ءبىرى – وڭالتۋ شارالارى. جىل وتكەن سايىن حالىققا مەديتسينالىق قىزمەت كورسەتەتىن جەكەمەنشىك مەكەمەلەردىڭ ۇلەسى ارتىپ جاتىر. مەديتسينالىق اپپاراتتار سانى, ەمدەۋ تاسىلدەرى كوبەيۋدە. استانادا 2022 جىلى وڭالتۋ كومەگىنە 7,7 ملرد تەڭگە جۇمسالدى. ال 2023 جىلى وڭالتۋ قىزمەتىنە بولىنگەن قارجى 9,2 ملرد تەڭگەنى قۇرايدى.
ورايى كەلگەندە ايتا كەتۋ كەرەك, اتالعان قور ساراپشىلارى تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) اياسىندا جانە مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىندە مەديتسينالىق كومەك الۋ جونىندە كەڭەس بەرەدى, قاجەت بولعان جاعدايدا ماسەلەنى شەشۋ ءۇشىن مەديتسينالىق ۇيىمنىڭ ماماندارىن جۇمىلدىرادى.
