مادەنيەت جانە سپورت ءمينيسترى اسحات ورالوۆ سپورتتىق جانە باتۋت گيمناستيكاسىنان الەم كۋبوگىنىڭ كەزەڭدەرىندە التىن مەدال جەڭىپ العان قازاقستاندىق گيمناستتار: ناريمان قۇربانوۆ, ميلاد كاريمي, پيرمامماد اليەۆ جانە دانيل مۇساباەۆپەن كەزدەستى.
ءىس-شاراعا جاتتىقتىرۋشىلار, مەديتسينا قىزمەتكەرلەرى جانە قازاقستان گيمناستيكا فەدەراتسياسىنىڭ پرەزيدەنتى ءاليا يۋسۋپوۆا قاتىستى. مينيستر ولاردى سوڭعى جەتىستىكتەرىمەن قۇتتىقتاپ, العىس حات تابىستاپ, مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىدى.
«سىزدەردى تاريحي جەڭىستەرىڭىزبەن قۇتتىقتايمىن. قازاقستاندىق سپورتشىلاردىڭ زور الەۋەتى بار جانە مەنىڭ مينيستر رەتىندەگى مىندەتىم — ولارعا لايىقتى قولداۋ كورسەتۋ. سپورتشىلاردى بارلىق قاجەتتىلىكتەرمەن قامتاماسىز ەتۋ, سونىڭ ىشىندە جاتتىعۋ بازالارى, تاماقتانۋ, لايىقتى ەڭبەكاقى جانە باسقا جاعدايلار جاساۋ. شىنىندا دا, سپورتتاعى جەتىستىكتەرگە قىسقا مەرزىمدە قول جەتپەيدى, بۇل ولار ءۇشىن ومىرلىك موتيۆاتسيا. وسى جەتىستىككە قاتىسقان بارلىق قىزمەتكەرلەرگە العىس ايتقىم كەلەدى. ءبىز ءبارىمىز بۇل ۇلكەن جولدىڭ باسى دەپ ۇمىتتەنەمىز جانە جاقىن ارادا وتەتىن ازيا مەن وليمپيادادا ساتتىلىك تىلەيمىز. ءبىز سىزدەردى قولدايمىز جانە سىزدەردىڭ ونەرلەرىڭىزدى مۇقيات تاماشالايمىز!», دەدى اسحات ورالوۆ.
ءاليا يۋسۋپوۆا ءوز كەزەگىندە مەملەكەت تاراپىنان گيمناستتارعا كورسەتىلەتىن قولداۋدىڭ ماڭىزدىلىعىن اتاپ ءوتىپ, سپورتشىلارىمىزدىڭ وليمپيادالىق ليتسەنزيالاردى جەڭىپ الۋ مۇمكىندىگىنە باعا بەردى.
«مادەنيەت جانە سپورت مينيسترلىگىنە قولداۋىڭىز ءۇشىن العىس ايتقىم كەلەدى. تەك قارجىلىق ەمەس, مورالدىق تۇرعىدا قولداۋ كورسەتۋ ماڭىزدى. اسىرەسە سپورتشىلار ءۇشىن قاجەت. ولار الاڭعا شىققاندا, ءوز مۇمكىندىكتەرىنىڭ شەگىندە جۇمىس ىستەيدى, شارشى الاڭعا شىققان سپورتشىلارعا ەلدىڭ قولداۋى قوسىمشا موتيۆاتسيا مەن قوسا, كۇش-جىگەر بەرەدى. بالالاردىڭ سپورت جانە باتۋتتىق گيمناستيكادا زور الەۋەتى مەن لايىقتى ناتيجەلەرى بار. سوندىقتان وليمپيادا ليتسەنزيالارىن الۋ مۇمكىندىگىمىز وتە جوعارى», دەپ اتاپ ءوتتى قازاقستان گيمناستيكا فەدەراتسياسىنىڭ پرەزيدەنتى.
