ەلىمىزدە ترانسۇلتتىق قىلمىستىق توپتىڭ قىزمەتى توقتاتىلدى

جەدەل ۋاكىلدەر زەرتحانادا سينتەتيكالىق پرەپاراتتاردى ءوندىرۋ ءۇشىن قولدانىلاتىن پرەكۋرسورلاردى جەتكىزۋ ارنالارىن انىقتاۋ بويىنشا ارنايى وپەراتسيالار جۇرگىزدى. توپتىڭ ءاربىر مۇشەسىنىڭ ءرولىن جانە باسقا ادامداردىڭ قاتىسۋىن انىقتاۋ ءۇشىن «ارنايى جۇك» بۇكىل مارشرۋت بويى باقىلاۋدا بولدى. وعان اۋە ارقىلى بارلاۋ دا قولدانىلدى.

وتكەن جىلدىڭ قازان ايىندا ارنايى وپەراتسيانىڭ باستاپقى كەزەڭىندە، سونداي-اق وسى جىلدىڭ ناۋرىز ايىندا پرەكۋرسورلاردىڭ كونترابانداسىنا قاتىسقان ءۇش شەتەلدىك ازامات ەلدەن تىس جەرلەردە ۇستالدى.

وپەراتسيانىڭ سوڭعى كەزەڭىندە 21 ناۋرىز كۇنى الماتىدا وسى ءىس بويىنشا قالعان فيگۋرانتتار – كورشىلەس ەلدەردىڭ ەكى ازاماتى جانە قازاقستاندىق ۇستالدى. ولاردان ءارتۇرلى سالماقتا مەفەدرون، شەتەلدىك پوليتسيا قىزمەتكەرىنىڭ جالعان كۋالىگى، زيپ-پاكەتتەر، ەلەكتروندىق تارازىلار، كالاشنيكوۆ اۆتوماتىنىڭ 7،62 مم كاليبرلى پاتروندارى تاركىلەندى.

قويمالاردى ءتىنتۋ بارىسىندا ءىىم جانە الماتى قالاسى پوليتسيا دەپارتامەنتىنىڭ قىزمەتكەرلەرى سينتەتيكالىق ەسىرتكىلەردى دايىنداۋ ءۇشىن قولدانىلاتىن پرەكۋرسورلاردى، سونداي-اق ەكى رەاكتوردى، ياعني سينتەتيكالىق ەسىرتكىلەردى دايىنداۋعا ارنالعان ارنايى زەرتحانالىق جابدىقتى تاركىلەدى.

تاركىلەنگەن پرەكۋرسورلاردىڭ جالپى كولەمى 72،7 توننا. وسىلايشا 8 توننا سينتەتيكالىق ەسىرتكى وندىرۋگە جول بەرىلمەدى. بۇل 8 ميلليون ءبىر رەتتىك دوزا. قازىر تەرگەۋ ارەكەتتەرى ءجۇرىپ جاتىر. ءىىم سينتەتيكالىق ەسىرتكى وندىرىلگەنگە دەيىن پرەكۋرسورلاردى جويۋ جۇمىسىن جالعاستىرادى.