«سامۇرىق-قازىنا» قورىنىڭ باسقارۋشى ديرەكتورى عيبرات اۋعانوۆتىڭ ايتۋىنشا, بۇل جوباعا 1 ملرد تەڭگەدەن استام قاراجات بولىنگەن. 2022 جىلى «Samruk-Kazyna Trust» قورى ارقىلى ماڭعىستاۋ وڭىرىندە قۇنى 1,8 ملرد تەڭگەنى قۇرايتىن 8 الەۋمەتتىك جوبا جۇزەگە اسىرىلعان.
– ءبىزدىڭ قور قايىرىمدىلىق كومەك كورسەتۋ بارىسىندا جوبالاردىڭ جۇيەلىلىگى جانە كومپانيالار توبىنىڭ كاسىپورىندارى بار وڭىرلەردى قامتۋ, تۇرعىنداردىڭ ءال-اۋقاتىن جاقسارتۋعا ايرىقشا نازار اۋدارادى. ناۋرىز ايىنىڭ سوڭىنا دەيىن قولدانىسقا بەرىلەتىن سپورت الاڭدارى حالىق يگىلىگىنە قىزمەت ەتەدى دەگەن سەنىمدەمىن, دەيدى عيبرات اۋعانوۆ. ياعني ناۋرىز ايىنىڭ سوڭىنا دەيىن 400-دەن 1200 شارشى مەترگە دەيىنگى اۋماقتى قۇرايتىن تاعى دا 18 الاڭنىڭ قۇرىلىسى اياقتالىپ, قولدانىسقا بەرىلەدى.
جاڭاوزەن قالاسى اكىمىنىڭ ورىنباسارى جاڭاباي ايماعانبەتوۆ «سامۇرىق-قازىنا» اق كومپانيالار توبى اتىنان قايىرىمدىلىقتىڭ بىرىڭعاي وپەراتورى «Samruk-Kazyna Trust» قورى جاڭاوزەن قالاسىندا كوپتەگەن الەۋمەتتىك ماسەلەنى شەشۋدە قولداۋ كورسەتىپ كەلەتىنىن ايتادى.
– وتكەن جىلى جاڭاوزەندىك مەكتەپتەردى جاڭا پارتالار جيىنتىعىمەن جانە ينتەراكتيۆتى تاقتالارمەن جابدىقتاۋعا, وڭالتۋ ورتالىعىنىڭ, بەيىمدەلگەن سپورت سەكتسيالارى مەن كەشەنىنىڭ اشىلۋىنا كومەكتەستى. بۇل قالانىڭ دامۋىنا جانە بالالارىمىزدىڭ جارقىن بولاشاعىنا قوسقان باعا جەتپەس ۇلەس دەپ باعالايمىن. ءارى قاراي دا ىنتىماقتاستىعىمىز تۇراقتى جانە تابىستى بولادى دەپ ۇمىتتەنەمىز, دەدى جاڭاباي ايماعانبەتوۆ.
تۇرعىنداردىڭ ايتۋىنشا, كولەمى 1200 شارشى مەترگە دەيىنگى ويىن الاڭدارى ساپا جاعىنان بارلىق تالاپتارعا ساي بولىپ جوسپارلانىپ, قۇرىلىس جۇمىستارى جاڭاوزەن قالاسى مەن جەتىباي اۋىلىندا وتكەن جىلدىڭ اقپان ايىندا باستالعان.
– «سامۇرىق-قازىنا» ۇلتتىق ءال-اۋقات قورىنىڭ قارجىلاندىرۋىمەن سالىنىپ, پايدالانۋعا بەرىلىپ وتىرعان نىسان جاستار مەن بالالار ءۇشىن بوس ۋاقىتىن ءتيىمدى ءارى پايدالى وتكىزىپ, دەنساۋلىعىن شىنىقتىراتىن تاپتىرماس ورىن بولماق. تۇرعىنداردىڭ اتىنان ۇلكەن العىسىمىزدى بىلدىرەمىز. ەندى وسى جەردى اركىم, اسىرەسە اتا-انالار جاعى كوزىنىڭ قاراشىعىنداي كۇتىپ ۇستاسا ەكەن, دەدى جاڭاوزەندىك قوعام بەلسەندىسى, ۇەۇ وكىلى رۋحيا قالدىباي. سونداي-اق شاراعا كەلگەن «قازمۇنايگاز» ۇك» اق قاراستى «Oil Services Company» جشس قىزمەتكەرى ادىلەت ءمۇتالى تاماشا الاڭعا كۋا بولىپ, مۇنايشى جاستار اتىنان العىس ءبىلدىردى.
ماڭعىستاۋ وبلىسى
