اتشاباردىڭ تۇساۋكەسەر راسىمىندە اتتىڭ قۇلاعىندا ويناعان قىز-جىگىتتەر قازاقتىڭ ءداستۇرلى قىز قۋ, تەڭگە ءىلۋ سەكىلدى ۇلتتىق ات سپورتى تۇرلەرىنەن ونەرلەرىن پاش ەتتى. سودان سوڭ كەزەك تەاترلاندىرىلعان كورىنىسكە جەتىپ, ەلىمىزدىڭ ءار ءوڭىرىنىڭ سالت-ءداستۇرىن ناسيحاتتايتىن باتىس پەن شىعىستىڭ, سولتۇستىك پەن وڭتۇستىك ولكەلەرىنىڭ اتىنان شىققان كوش كەرۋەنى مىنبەردەگى جۇزدەگەن كورەرمەننىڭ الدىنان ءجۇرىپ ءوتتى. اتقا جەگىلگەن كۇيمە, اسەم بەزەندىرىلگەن تۇيەلەرمەن ماڭ-ماڭ باسىپ ءجۇرىپ وتكەن كەرۋەن ىشىندەگىلەر ءار ءوڭىردىڭ تۋمالارى مەن تانىمال ازاماتتارى جانە بەلگىلى ونەرپازدارى مەن سپورتشىلارى بولدى. ماسەلەن, باتىس كەرۋەنىن ەلىمىزگە بەلگىلى ءانشى ت.اسار باستاسا, شىعىس كەرۋەنىن ءداستۇرلى ءانشى ا.بالاجانوۆا ءوزىنىڭ اسەم انىمەن سوڭىنان ىلەستىردى. سولتۇستىك ايماقتىڭ كەرۋەنىنىڭ الدىندا ءان سالىپ شىعۋ تانىمال ەسترادا ءانشىسى م.سادۋاقاسوۆاعا بۇيىردى, ال وڭتۇستىكتىڭ كەرۋەنىن ءداستۇرلى ءانشى ن.سەرىكباەۆا تىزگىنىنە الدى. مۇنان كەيىن ات سپورتىنىڭ مايتالمان جىگىتتەرى اكروباتيكالىق تاسىلمەن ءبىرىنىڭ ۇستىنە ءبىرى مىنگەسىپ, كوك تۋىمىزدى توبەلەرىنە كوتەرىپ بايگە الاڭىنىڭ كورەرمەن وتىرعان تۇسىنان الىپ ءوتتى.
سالتاناتتى شارادا شىمكەنت قالاسىنىڭ اكىمى مۇرات ايتەنوۆ پەن وسى الىپ اتشاباردى شاھارعا تارتۋ رەتىندە سالىپ بەرگەن وتاندىق «BI GROUP» قۇرىلىس كومپانياسىنىڭ باس ديرەكتورى ايدىن راحىمباەۆ قۇتتىقتاۋ ءسوز سويلەدى.
ءسوز تىزگىنىن ءبىرىنشى العان كومپانيا باسشىسى ا.راحىمباەۆ «وسىدان ءبىر جارىم جىل بۇرىن مەگاپوليس حالقىنا زاماناۋي, حالىقارالىق ستاندارتتارعا ساي كەلەتىن جاپ-جاڭا يپپودروم سالىپ بەرەمىز دەپ ۋادە بەرگەن ەدىك. سول ۋادەمىزدە تۇرىپ, بۇگىن مىنە ونىڭ اشىلۋ سالتاناتىن تويلاپ وتىرمىز. بىلە بىلسەك, بۇل قازاقستانداعى ەڭ ۇلكەن اتشابار كەشەنى بولىپ سانالادى», دەدى.
ءوز كەزەگىندە قالا اكىمى م.ايتەنوۆ وسىناۋ الىپ اتشاباردى ءوز قارجىسىنا تۇرعىزىپ, ءسويتىپ, شىمكەنتتىكتەردىڭ يگىلىگىنە پايدالانۋعا تاپسىرعان «BI GROUP» كومپانياسىنىڭ جومارتتىعى مەن ساۋاپتى ىسىنە العىسىن ءبىلدىردى.
«ناۋرىز مەيرامىنىڭ قارساڭىندا ۇلتتىق سپورتتىڭ دامۋىنا ۇلكەن ۇلەس قوساتىن زاماناۋي يپپودرومنىڭ اشىلۋىنا وراي بارشامىز باس قوسىپ وتىرمىز. ءبىزدىڭ بۇگىنگى قۋانىشىمىزعا ورتاقتاسىپ كەلگەنى ءۇشىن كەزىندە شىمكەنتتىڭ, تۇتاس وڭتۇستىك ءوڭىرىنىڭ اياققا تۇرۋىنا ايانباي تەر توككەن ەڭبەك ارداگەرلەرىنە, قادىرمەندى اقساقالدارعا العىسىمدى ايتامىن. ەندەشە, ناۋرىز مەرەكەسى بارشامىزعا قۇتتى بولسىن! شىن مانىندە, بۇل وقيعا قالا تاريحىندا ءوزىنىڭ وشپەس ءىزىن قالدىرارى ءسوزسىز. ال يپپودرومنىڭ اشىلۋ سالتاناتىنا وراي ۇلتتىق سپورت تۇرلەرىنەن حالىقارالىق جارىس ۇيىمداستىرىلاتىن بولادى. وعان 1 مىڭنان استام سپورتشى, سونىڭ ىشىندە 126 شەتەلدىك ورەن قاتىسپاق. الداعى ۋاقىتتا, جاڭا يپپودروم ۇلتتىق ات سپورتىنىڭ دامۋىنا, تۇرلەنۋىنە تىڭ سەرپىن بەرەتىنى ءسوزسىز», دەدى شاھار باسشىسى.
وسىلايشا, يپپادرومنىڭ اشىلۋ سالتاناتىنا ارنالعان مەرەكەلىك باعدارلاما سوڭى جاپپاي «قاراجورعا» بيىنە ۇلاستى.
ال يپپودرومنىڭ وزىنە كەلسەك, مۇنداعى بايگە الاڭى ەلىمىز بويىنشا ەڭ ۇلكەنى. ونىڭ اۋماعىندا 1 500 كورەرمەنگە ارنالعان تريبۋنا, ات ارەناسى بار مانەجدەر, جابىق ستەند عيماراتى, ۆەتەرينارلىق بلوك بار جانە 300-دەن استام كولىككە ارنالعان تۇراق قاراستىرىلعان. تريبۋنانىڭ جوعارى قاباتىندا اشىق تەرراسا جايعاسقان. ۇزىندىعى 2012 مەترلىك جارىس جولى بىردەن كوزگە تۇسەدى. كوكپار مەن كونكۋر سپورتىنا ارنالعان الاڭدارعا ارنايى كۆارتس قۇمى توسەلىپ, تابيعي تاستارمەن بەزەندىرىلگەن. سوندىقتان ءسوز جوق الەمدىك ستاندارتتارعا ساي سالىنعان يپپودروم مەگاپوليستەگى حالىقارالىق دارەجەدەگى ۇلتتىق ويىن-ساۋىق جارىستارىن وتكىزەتىن ۇلكەن سپورت الاڭىنا اينالىپ وتىر.
ءوز كەزەگىندە اتشابارداعى ۇلىستىڭ ۇلى كۇنى «GREAT QAZAQ GAMES» ياعني قازاقتىڭ ۇلتتىق ويىندارىمەن جالعاسىن تاپتى. وسى سپورتتىق جارىستا ەلىمىزدىڭ بارلىق وڭىرىنەن جانە تۇركيا, قىتاي, موڭعوليا, وزبەكستان, قىرعىزستان, تاجىكستان, رەسەي, ساۋد ارابياسى مەن يوردانيادان كەلگەن سپورتشىلار باق سىناسادى. ولار 3 كۇن بويىنا كوكپار, بايگە, قىز قۋ, تەڭگە ءىلۋ, اۋدارىسپاق, قازاق كۇرەسى, ءداستۇرلى ساداق اتۋ, جامبى اتۋ, توعىزقۇمالاق جانە وزگە دە ۇلتتىق سپورت تۇرلەرى بويىنشا جۇلدەگە تالاسادى.
ماسەلەن, تۇركيادان كەلگەن سپورتشى ەنيس مۋستافا يۋردوكوك توعىز جىلدان بەرى جامبى اتۋمەن اينالىسادى. بۇل سپورت تۇرىنە دەگەن ماحاببات دوسى ەلدوس قازاقستانعا قوناققا شاقىرعان ساتتەن باستالىپتى. سپورتشىنىڭ جاسى – قازىر 65-تە. بىراق سوعان قاراماستان, ءوزىن تىڭ سەزىنەدى جانە جەڭىسكە دەگەن قۇلشىنىسى باسىم. قازاقستاننان جۇلدەسىز قايتپايمىن دەپ وزىنە سەنىم ءبىلدىرىپ وتىر. قوناققا جاڭادان اشىلعان يپپودروم ەرەكشە ۇناپتى. ات سپورتىن دامىتۋعا بارلىق جاعدايدىڭ جاسالعانىن كوزبەن كورگەن. ءوزىنىڭ ايتۋىنشا, تۇركيادا دا ۇلتتىق سپورت تۇرلەرىنە ەرەكشە قامقورلىق كورسەتىلەدى. مەملەكەت پەن جەكە ازاماتتار تاراپىنان ۇلتتىق سپورتتىڭ كەڭ ەتەك جايۋىنا, ەل ىشىندە ناسيحاتتالۋىنا ىقىلاس جوعارى. تۇركيالىق سپورتشىنىڭ ءوزىنىڭ دە جەكە سپورت كلۋبى, مەكتەبى بار ەكەن. ول سوندا بالالاردى جاتتىقتىرۋمەن اينالىسادى.
سول سەكىلدى مۋاز اتتاميمي ءوزىنىڭ سەرىكتەسى ابدۋللا اتتاميميمەن سوناۋ ساۋد ارابياسى جەرىنەن ساداق اتۋ جارىسىنان قوماقتى جۇلدە الىپ كەتۋ ءۇشىن ات ارىتىپ كەلىپ وتىر. جاس سپورتشى دجيددا قالاسىنداعى ۋنيۆەرسيتەتتە ءدىنتانۋ فاكۋلتەتىندە وقيدى. الايدا اتقا ءمىنۋ, ساداق تارتۋ ونىڭ قولى بوس كەزدە اينالىساتىن سۇيىكتى ءىسى ەكەن. وعان كونە زامانداعى باتىرلاردىڭ ءىزىن جالعاۋعا اكەسى رۋحاني دەمەۋ بەرگەن.
