دەگەنمەن قازاق ءتىلى جانە ادەبيەت پانىنەن ءدارىس بەرەتىن اياجان عانيدى ۇزدىك ۇستازداردىڭ قاتارىنا قوسۋعا بولادى. ويتكەنى وزگە ەتنوس جاستارىنا مەملەكەتتىك ءتىلدى تەرەڭدەتە وقىتۋعا اتسالىسىپ ءجۇر. مۇنى ول ءوزىنىڭ پەرزەنتتىك بورىشى سانايدى.
– تۋعان جەرىم – قىزىلقوعا اۋدانىنداعى جاسقايرات اۋىلى. ۇلكەن شاھاردان شالعايدا ورنالاسقانىمەن, ءبىزدىڭ اۋىلدا ۇلتتىق قۇندىلىقتاردى ۇرپاعىنىڭ ساناسىنا ءسىڭىرۋدى ويلاعان ونەگەلى وتباسىلار تۇرادى. باسقاشا ايتقاندا, كىندىك قانىم تامعان اۋىلىمدى قازاقىلىقتىڭ قايماعى بۇزىلماعان ورتاسى دەي الامىن. سول سەبەپتەن بولار اۋىلىمدى اركەز ساعىنىپ جۇرەمىن, – دەيدى ول.
ونىڭ انا ءتىلىن ارداقتاۋعا دەگەن قۇلشىنىسى بالا كەزىنەن ويانعان. مەكتەپتە وقىپ ءجۇرىپ, اۋداندىق, وبلىستىق ءپان وليپيادالارىنا, ءتۇرلى بايقاۋلارعا قاتىسىپ, جەڭىمپاز اتانعان. سول جەتىستىگىن جالعاستىرۋ ءۇشىن جوعارى ءبىلىم الدى. قازىر اتىراۋ قالاسىنداعى №30 مەكتەپ-گيمنازيادا قازاق ءتىلى مەن ادەبيەت پانىنەن ساباق بەرەدى.
– ۇستاز رەتىندە العا قويعان ماقساتىم – وزىندىك وي-پىكىرىن ەركىن جەتكىزە الاتىن, مەملەكەتتىك ءتىلدى ارداقتايتىن, ءبىلىمدى شاكىرت تاربيەلەۋ. شاكىرتتىڭ ءبارى بىردەي ءبىر ءپاندى وقۋعا ىنتالى بولماۋى مۇمكىن. سول سەبەپتەن ءار وقۋشىنىڭ پانگە دەگەن قىزىعۋشىلىعىن وياتۋ قاجەت, – دەيدى جاس ۇستاز.
جاس ۇستاز دەيتىنىمىز, ونىڭ ەڭبەك جولى باستالعانىنا ءالى بەس جىل تولا قويعان جوق. سوعان قاراماستان, پەداگوگيكالىق جەتىستىگى از ەمەس. ماسەلەن, وتكەن جىلى «مىڭ بالا» مادەني-اعارتۋشىلىق بايقاۋىنىڭ وبلىستىق كەزەڭىنە قاتىسىپ, ءبىرىنشى ورىندى يەلەندى. ول بۇل بايقاۋعا «قازاق ءتىلى ساباعىندا دەڭگەيلەپ-سارالاپ وقىتۋ تەحنولوگياسىن قولدانۋ» باعدارلاماسىن ۇسىنعان ەدى.
– «مىڭ بالا» جوباسىندا ۇزدىك اتانعان پەداگوگتەردىڭ «قازاق ءتىلى ساباعىندا دەڭگەيلەپ-سارالاپ وقىتۋ تەحنولوگياسىن قولدانۋ» اۆتورلىق باعدارلاماسى نەگىزىندە ءۇش نۇسقاۋلىق كىتاپ دايىندالدى. ونىڭ ءبىرى – اۆتورلىق باعدارلامانىڭ مازمۇنى, ەكىنشىسى – مۇعالىمگە ارنالعان نۇسقاۋلىق, ال ءۇشىنشىسى – وقۋشىنىڭ جۇمىس داپتەرى نەمەسە دەڭگەيلىك تاپسىرمالار. بۇل جوبادا جاڭارتىلعان باعدارلاما نەگىزىندە دياگنوستيكالىق تالداۋلار جۇرگىزىپ, ارنايى قۇراستىرىلعان تاپسىرمالار كومەگىمەن وقۋشىلاردىڭ قازاق ءتىلى مەن ادەبيەتى پانىنەن ساۋاتتىلىق دەڭگەيىن ارتتىرۋ كوزدەلىپ وتىر. مۇنداي جاڭاشىل تاجىريبە دەڭگەيلەپ-سارالاپ وقىتۋ تەحنولوگياسىن قولدانۋ ارقىلى وقۋشىلاردىڭ قازاق تىلىنە دەگەن قىزىعۋشىلىعىن, مەڭگەرۋ تۇرعىسىنداعى بەلسەندىلىگىن ارتتىرۋعا جول اشادى, – دەيدى ا.عاني.
جاڭاشىل ۇستاز بىلىكتىلىگىن ارتتىرۋ ءۇشىن ءتۇرلى بايقاۋلارعا قاتىسىپ ءجۇر. ماسەلەن, 2021 جىلى «Bilim orkenieti» ۇلتتىق يننوۆاتسيالىق عىلىمي-زەرتتەۋ ورتالىعى وتكىزگەن رەسپۋبليكالىق «ۇزدىك جاس مامان – 2021» بايقاۋىندا ءبىرىنشى جۇلدەگە يە بولعان. ال «انا ءتىلدىڭ ايبىنى» دەگەن رەسپۋبليكالىق بايقاۋدا دا باعى جانىپ, ءبىرىنشى جۇلدەنى يەلەندى. سونداي-اق ء«ححى عاسىر كوشباسشىسى» حالىقارالىق ءبىلىم يننوۆاتسيالىق ورتالىعىنىڭ ۇيىمداستىرعان «ۇلاعاتتى ۇستاز» اتتى ءى حالىقارالىق مۇعالىمدەر سايىسىنا دا قاتىستى. قاشىقتان وتكىزىلگەن بايقاۋدا شىعارماشىلىق جاڭاشىلدىعى بار جاس ۇستازدىڭ تالپىنىسى «ۇزدىك قازاق ءتىلى مەن ادەبيەتى ءپانى مۇعالىمى – 2021» اتالىمىنىڭ ءۇشىنشى جۇلدەسىمەن اتالىپ ءوتتى. بىلتىر اتىراۋ قالالىق «ۇزدىك سىنىپ جەتەكشىسى» بايقاۋىندا ەكىنشى ورىنعا تۇراقتادى.
انا ءتىلىن ارداقتاۋدى كۇندەلىكتى مىندەتىنە اينالدىرعان جاس ۇستاز ۇلى ويشىل ابايدىڭ ۇلاعاتتى ءتالىمىن دارىسىنە ءجيى قولدانادى. ءتىپتى «QAZAN.Info» سايتى اباي قۇنانباي ۇلىنىڭ 175 جىلدىعىنا وراي « ۇلى دالانىڭ ۇلى تۇلعاسى – اباي» جانە ءابۋ ناسىر ءال-ءفارابيدىڭ 1150 جىلدىعىنا ارنالعان رەسپۋبليكالىق وليمپياداسىنان ءبىرىنشى جۇلدەسىنە يە بولدى. بۇل جاس ۇستازدىڭ شىڭدالا تۇسكەنىن بايقاتادى.
– وقۋشىلارىمنىڭ ءبارى دەرلىك ءبىلىمدى بولعانىن قالايمىن. سول سەبەپتەن ءار ءدارىسىمدى «قازاق ءتىلى ساباعىندا دەڭگەيلەپ-سارالاپ وقىتۋ تەحنولوگياسىن قولدانۋ» باعدارلاماسىمەن وتكىزەمىن. باعدارلامادا وقۋشىلاردىڭ جاس ەرەكشەلىگىنە وراي ويلاۋ دارەجەسىن, بەلسەندىلىگىن ارتتىرۋعا, شىعارماشىلىق قابىلەتىن دامىتۋعا مول مۇمكىندىك بەرىلىپ وتىر. نەگىزگى قۇرال – دەڭگەيلەپ-سارالاپ وقىتۋعا نەگىزدەلگەن وقۋشىلارعا ارنالعان تاپسىرمالار. بۇل ارقىلى وقۋشىلاردىڭ ءار ساباقتا العان تەوريالىق ءبىلىمىن دەڭگەيلىك تاپسىرمالاردى ورىنداۋ ارقىلى تالداۋعا بولادى, – دەپ ءتۇسىندىردى ول.
اتىراۋ وبلىسى
