«بۇگىنگى باسقوسۋدىڭ «اپات جانە توتەنشە جاعدايلار مەنەدجمەنتى, گۋمانيتارلىق كومەك» دەگەن تاقىرىپتا ءوتۋى بەكەر ەمەس. قازىر جەر جۇزىندە تابيعي جانە تەحنوگەندىك اپاتتار كوبەيىپ جاتىر. بۇل جاعداي وتە وزەكتى حالىقارالىق ماسەلەنىڭ بىرىنە اينالدى. وسىنداي كۇردەلى كەزەڭدە قازاقستان گۋمانيتارلىق شارالاردان شەت قالعان ەمەس. ەلىمىز تابيعي اپاتتان زارداپ شەككەن ەلدەرگە ۇنەمى قولداۋ كورسەتەدى», دەدى مەملەكەت باسشىسى.
سونداي-اق پرەزيدەنت تابيعي اپات كەزىندە قارجىلاي جانە تاۋار تۇرىندە گۋمانيتارلىق كومەك بەرۋمەن عانا شەكتەلىپ قالمايتىنىن جەتكىزدى.
«بۇدان بولەك, قۇتقارۋشىلاردى جىبەرىپ, اپات سالدارىن جويۋعا بەلسەنە اتسالىسامىز. جالپى, تۇركى ەلدەرى توتەنشە جاعداي كەزىندە ءتيىمدى ارەكەت ەتە ءبىلۋى كەرەك. سونداي-اق ۇيىم حاتشىلىعى جانە مۇشە مەملەكەتتەر اراسىنداعى بايلانىستاردى نىعايتا ءتۇسۋ قاجەت», دەدى قاسىم-جومارت كەمەل ۇلى.
