وسىدان ءبىر كۇن بۇرىن ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا قۇجاتتى دەپۋتاتتارعا تانىستىردى. ءسوز بارىسىندا مينيستر جاڭا الەۋمەتتىك ساياسات مەملەكەت باسشىسى جاريالاعان اۋقىمدى وزگەرىستەردىڭ ءبىرى ەكەنىن اتاپ ءوتتى.
«بۇل وزگەرىستەردىڭ نەگىزى نازارلارىڭىزعا ۇسىنىلىپ وتىرعان الەۋمەتتىك كودەكس جوباسىندا كورىنىس تاپتى. بىرىنشىدەن, مەملەكەتتىك الەۋمەتتىك قولداۋ جۇيەسىنىڭ پاراديگماسىن تۇبەگەيلى وزگەرتۋ ۇسىنىلادى: ياعني ول الەۋمەتتىك سىن-قاتەرلەردىڭ سالدارىن جويۋعا ەمەس, كەرىسىنشە ومىرلىك قيىن جاعدايلاردىڭ الدىن الۋعا كوبىرەك باعىتتالاتىن بولادى. ەكىنشىدەن, الەۋمەتتىك سالانى تسيفرلاندىرۋدى تەرەڭدەتۋ جانە سونىڭ ارقاسىندا الەۋمەتتىك قولداۋدى الۋدىڭ بۇگىنگى ءوتىنىش بەرۋ نىسانىنان, ادرەستى انىقتاۋ نىسانىنا جانە ونى پرواكتيۆتى فورماتتا كورسەتۋ جۇيەسىنە كوشۋ قاراستىرىلعان. ۇشىنشىدەن, ازاماتتاردى الەۋمەتتىك قامسىزداندىرۋ بويىنشا جاۋاپكەرشىلىك تەك مەملەكەتكە عانا ەمەس, جۇمىس بەرۋشىگە جانە ازاماتتىڭ وزىنە دە جۇكتەلەتىن بولادى. بۇل جاڭا الەۋمەتتىك كونتراكت نەگىزىندە ىسكە اسىرىلادى. تورتىنشىدەن, ناتيجەلى جانە فورمالدى جۇمىسپەن قامتۋدى ىنتالاندىرۋعا باعىتتالعان ساقتاندىرۋ جۇيەسىن دامىتۋ كوزدەلىپ وتىر», دەدى تامارا دۇيسەنوۆا.
سونىمەن قاتار ەحاقم باسشىسى الەۋمەتتىك كودەكستى ازىرلەۋ بارىسىندا حالىقارالىق تاجىريبە مۇقيات زەردەلەنگەنىن ايتتى. سونىڭ ناتيجەسىندە الەۋمەتتىك كودەكستىڭ قۇرىلىمى باسشىلىققا الىنىپ, ءوز ەلىمىزدىڭ ەرەكشەلىكتەرى جان-جاقتى ەسكەرىلدى.
