«قۇرمەتتى دوستار! بارشاڭىزدى امال مەرەكەسىمەن شىن جۇرەكتەن قۇتتىقتايمىن!
امال – جىلدىڭ باسى, قىستىڭ قاھارى قايتىپ, حالىق جايماشۋاق كوكتەممەن قاۋىشاتىن ەرەكشە ءسات.
ءبىر كەزدەرى ەلىمىزدىڭ باتىس وڭىرلەرىندە عانا تويلاناتىن بۇل مەيرام بۇگىندە كەڭ بايتاق قازاقستاننىڭ ءار قيىرىندا اتالىپ وتەدى. بۇعان سوڭعى جىلداردا ءاز-ناۋرىزدىڭ مازمۇنىن بايىتۋ تۇرعىسىنان جاسالعان ماڭىزدى قادامداردىڭ دا وڭ اسەرى بولعانى ءسوزسىز.
وسى كۇندەرى الىس-جاقىنداعى اعايىن ارقا-جارقا بولىپ, قول الىسىپ, ءتوس قاعىستىرىپ, ءبىر-بىرىنە ىزەت-قۇرمەت كورسەتىپ, مەيىرىمدىلىك تانىتادى. سوندىقتان مۇنداي يگى ءداستۇردىڭ ۇلتىمىزدىڭ ىرىسىن ارتتىرۋعا, حالقىمىزدىڭ بىرلىگىن بەكەمدەۋگە قوسار ۇلەسى مول, ۇرپاققا بەرەر تاعىلىمى زور دەپ ەسەپتەيمىز.
بارشاڭىزدى جان جادىراتار وسىناۋ كوكتەم مەرەكەسىمەن قۇتتىقتاي وتىرىپ, ءار شاڭىراققا جاقسىلىق, قۋانىش جانە باق-بەرەكە تىلەيمىن! امالدان امالعا امان-ەسەن جەتە بەرەيىك! جىل قۇتتى بولسىن, اعايىن!», دەلىنگەن سەنات توراعاسىنىڭ قۇتتىقتاۋىندا.
