بۇگىن سىرىم اۋدانىنداعى ولەڭتى اۋىلىندا سۋ باسقان ەكى ۇيدەن التى ادام قاۋىپسىز جەرگە كوشىرىلدى. مۇنداعى باسقا دا تۇرعىن ۇيلەردى سۋ باسۋ قاۋپى ساقتالادى.
⠀
13 ناۋرىزدا بقو توتەنشە جاعدايلار دەپارتامەنتىنىڭ باسشىسى ەرنۇر وتەگەنوۆ ساعات 13:00-دە بقو ءبورلى اۋدانى, اقبۇلاق اۋىلىندا (اقساي قالاسىنان 25 شاقىرىم جەردە) ەرىگەن سۋدىڭ ارناسىنان اسىپ كەتكەنىن حابارلادى.
قازىرگى ۋاقىتتا اقبۇلاق اۋىلىنداعى اقبۇلاق كوشەسى مەن جەلتوقساندى سۋ باسقان. الدىن الا مالىمەت بويىنشا, 11 ءۇيدى سۋ باسىپ, 44 ادام قاۋىپسىز جەرگە كوشىرىلدى.
تۇرعىن ۇيلەردى سۋ باسقان جەردە توتەنشە جاعدايلار دەپارتامەنتىنىڭ جەكە قۇرامىنىڭ 40 ادامى, بەس تەحنيكا, ءۇش موتوپومپا, جەرگىلىكتى اكىمدىكتەردىڭ قىزمەتكەرلەرى جۇمىس ىستەپ جاتىر. بوگەت جارىلعان جەرگە 200 قۇم سالىنعان قاپ توسەلىپ, 10 توننا قۇم دايىندالعان.
⠀
ەرنۇر وتەگەنوۆتىڭ ايتۋىنشا, وبلىستاعى تاعى ءبىر ەلدى مەكەندە سۋ باسقان ۇيلەردەن ادامداردى كوشىرۋ جۇمىستارى جۇرگىزىلگەن.
بارلىق ادامدار تۋىستارىنىڭ ۇيىنە ورنالاستىرىلدى. جەكە قوسالقى شارۋاشىلىقتاعى مال – 12 باس ءىرى قارا, 30 ۇساق مال كورشى اۋلالارعا تاراتىلادى.
⠀
«ولەڭتى اۋىلىنداعى ۇيلەردەگى ەرىگەن سۋ ىرگەتاستىڭ ۇستىنە كوتەرىلدى, قازىرگى ۋاقىتتا ونىڭ ازايۋى بايقالادى. ەكى ءۇيدىڭ قابىرعالارى سامان بولعاندىقتان جاعداي قيىندادى», دەيدى وبلىستىق توتەنشە جاعدايلار دەپارتامەنتىنىڭ باسشىسى.
⠀
بقو اكىمىنىڭ ورىنباسارى ەرجان بالتاەۆتىڭ ايتۋىنشا, بۇل وڭىردە بۇرىن 1979 جانە 1993 جىلدارى وسىنداي تابيعي اپات بولعان. بۇعان ءۇش فاكتور: كۇزگى جاۋىن-شاشىن, توپىراقتىڭ قاتۋى جانە قالىڭ قاردىڭ ەرۋى اسەر ەتەدى.
