دەپۋتات بولۋ وڭاي ەكەن دەپ ويلاماۋ كەرەك – كارىمبەك قۇرماناليەۆ

- «بۇل ءان – بۇرىنعى اننەن وزگەرەك» دەگەندەي بيىلعى سايلاۋدىڭ ءجونى بولەك.  بىلتىر بۇكىلحالىقتىق رەفەرەندۋمدا مەملەكەت باسشىسى ۇسىنعان كونستيتۋتسيالىق رەفورمالاردى قولداپ، داۋىس بەردىك. سول كونستيتۋتسيالىق رەفورمالارعا سايكەس جاڭادان وتكىزىلىپ وتىرعان سايلاۋدىڭ وزىندىك ەرەكشەلىكتەرى بار. بىرىنشىدەن، بۇل تەك قانا پارتيالىق تىزىممەن عانا ەمەس، موجاريتارلىق جۇيەمەن جۇزەگە اسقالى جاتىر. ياعني، ءبىر مانداتتىق وكرۋگتان ءوزىڭدى-ءوزىڭ ۇسىنۋ ارقىلى دەپۋتات بولا الاتىن مۇمكىندىك تۋىنداپ وتىر. وسى رەتتە حالىق پەن بيلىكتىڭ اراسىندا التىن كوپىر بولىپ جۇرگەن، ەلدىڭ ءسوزىن سويلەپ جۇرگەن، ۇكىمەتكە اڭگىمە ايتا الاتىن تۇلعالار دەپۋتات بولا الادى. بۇل جاڭاشىلدىقتى دەموكراتيالىق وزگەرىستەرىمىزدىڭ، جاڭا قازاقستاننىڭ، ادىلەتتى قازاقستاننىڭ جارقىن جولىنا باستاۋ دەپ باعالاۋىمىز كەرەك.

دەپۋتات بولىپ سايلانۋ بار دا ونى ارى قاراي جاۋاپكەرشىلىكپەن اتقارۋ بار. جاڭا زاڭنامالارعا سايكەس دەپۋتات بولىپ سايلانعاننىڭ وزىندە حالىقتىڭ ءسوزىن ايتپاي، ەلدىك ءسوز سويلەمەي، ءىرى ىستەرگە وي-پىكىرىڭىزبەن ارالاسا الماساڭىز، جىلى ورنىڭىزدان ايىرىلىپ قالۋىڭىز ابدەن مۇمكىن. ويتكەنى كانديداتتى تاڭداعان سايلاۋشىلار ۇمىتكەرىنىڭ ىستەپ جاتقان جۇمىسىنا قاناعاتتانباسا، سايلانعان ادامدى كەرى قايتارىپ الۋ مۇمكىنشىلىگى بار. سول سەبەپتەن دەپۋتات بولۋ وڭاي ەكەن دەپ ويلاماۋ كەرەك. ناعىز ۇلتقا قىزمەت ەتەتىن، جاۋاپكەرشىلىكتىڭ جوعارى دەڭگەيىن كورسەتەتىن تۇعىرلى تۇلعالار عانا دەپۋتات اتانۋى كەرەك. سول سەبەپتەن مەن 19-ناۋرىزدا وتەتىن سايلاۋعا بارلىق داۋىس بەرۋشىلەردى بەلسەندى قاتىسۋعا شاقىرامىن. لايىقتى كانديداتتارعا داۋىس بەرىپ، ادىلەتتى قازاقستان مەن جاڭا قازاقستاننىڭ جارقىن بولاشاعى ءۇشىن ءۇنىڭىزدى قوسىڭىز، بەلسەندى بولىڭىز، داۋىس بەرىڭىز!، -  دەدى كارىمبەك قۇرماناليەۆ.