جانتۇرشەگەرلىك وقيعا وتكەن جىلدىڭ 16 ناۋرىزىندا بولعان.
سول كۇنى 44 جاستاعى ەر ادام كورشىسىنە كەلىپ, ونىڭ ەسىگىن قاققان. ەسىكتى اشقان ساتتە ول 32 جاستاعى ايەل مەن ونىڭ 4 جاسار بالاسىنىڭ ۇستىنە كەروسين قۇيىپ, ورتەپ جىبەرگەن.
پوليتسيا قىزمەتكەرلىرنىڭ ايتۋىنشا, بۇل ارەكەتكە كورشىلەر اراسىندا تۋىنداعان كەلىسپەۋشىلىك سەبەپ بولعان.
ايەلدىڭ قولىن كۇيىك شالعان, ال بالا 40%-دىق كۇيىكپەن جانساقتاۋ بولىمىنە ءتۇستى. وعان 10-نان استام وتا جاسالعان.
ال بۇگىن قوستانايدا وسى وقيعاعا قاتىستى سوت ۇكىمى شىقتى.
بۇل قىلمىستى 1979 جىلى تۋعان گەننادي ميللەر جاساعانى انىقتالدى.
«قىلمىستىق ءىس جۇرگىزۋ كودەكسىنىڭ 520, 521-باپتارىن باسشىلىققا الا وتىرىپ, سوت گەننادي ميللەردى قىلمىستىق كودەكستىڭ 24-بابى, 3-بولىگى, 99-بابى 2-بولىگى, 1-تارماعى, 24-بابى 3-بولىگى, 99-بابى 3-بولىگىندە كوزدەلگەن زاڭمەن تىيىم سالىنعان قىلمىستىق ءىس-ارەكەتتى اقىل-ەسىنىڭ كەمىستىگىنەن جاسادى دەپ تانىدى. الەۋمەتتىك قاۋىپتى ارەكەتتى جاساۋ كەزىندە گەننادي ميللەردىڭ اقىل-ەسىنىڭ دۇرىس بولماۋىنا بايلانىستى ول قىلمىستىق جاۋاپكەرشىلىكتەن بوساتىلسىن. وعان ءجىتى باقىلاناتىن پسيحياتريالىق ستاتسيوناردا ەمدەۋ تۇرىندەگى مەديتسينالىق ماجبۇرلەۋ شارالارى تاعايىندالسىن», دەپ سۋديا ۇكىم شىعاردى.
وعان قوسا قىلمىسكەر جابىرلەنۋشى تاراپقا مورالدىق زيان كەلتىرگەنى ءۇشىن 2,5 ملن تەڭگە كولەمىندە وتەماقى تولەۋگە مىندەتتەلدى.
