جالپى, جۇرت اۆتوبان اتاپ كەتكەن اۆتوجولدىڭ بويىندا تىنباي جۇمىس ىستەيتىن قىزمەتكەرلەر شايلىققا جەتپەيتىن ايلىق ماسەلەسىن كوتەرىپ, ءتىپتى بىرنەشە كۇن جۇمىسقا شىعۋدان دا باس تارتقان. ولاردىڭ سوزىنە سەنسەك, زەينەتاقى قورى مەن مەديتسينالىق ساقتاندىرۋ شوتىنا ءتيىستى قاراجات اۋدارىلماعان كورىنەدى. كەيىنگى بىرنەشە ايدىڭ بەدەرىندە ارنايى كيىم كيگەن قىزمەتكەرلەردىڭ باس كوتەرۋى وڭىردە تۇراقتى جاعدايعا اينالا باستاعان سەكىلدى. ولاردىڭ بارلىعى دا جالاقىنىڭ ماردىمسىز ەكەنىن العا تارتىپ, جانايقايىن جەتكىزىپ جاتادى. جاعدايى جاقسى بولسا, قاراپايىم ازاماتتار باس كوتەرىپ قايتسىن؟ الەۋمەتتىك تەڭسىزدىكتەن ابدەن قاجىعاننان كەيىن ازاماتتار امالسىز ايلىق ماسەلەسىن العا تارتىپ ءجۇر عوي. اۋليەاتالىقتاردىڭ اشىنعان داۋسىن ەستيتىن ادام بار ما؟
«قوقىستان بولەك, ولگەن يت پەن قۇستى دا تازالاپ جاتامىز. جول بويىنداعى بەلگىلەردى قالىپقا كەلتىرەمىز. قىستىڭ كوزى قىراۋدا جولداعى قاردى تازالايمىز. كۇننىڭ سۋىعىنا دا قارامايمىز. ايلىعىمىز سوعان ساي بولسا دەگەن تىلەگىمىز بار», دەيدى جۇمىسشىلاردىڭ ءبىرى دانيار سۇلتانقۇلوۆ جاعدايدى ءتۇسىندىرىپ.
راسىندا دا, كۇرە جولدىڭ بويىنداعى قوقىستى قىسى-جازى تازالاپ جۇرگەن ازاماتتاردىڭ ەڭبەگى ادال ەكەنى اقيقات. قاي كەزدە دە قىزمەتىن لايىقتى اتقاراتىن قاراپايىم حالىقتىڭ ماقساتى ايقىن. قىمباتشىلىق قوس بۇيىردەن قىسقان شاقتا جالاقىنىڭ كوتەرىلگەنىن قالايدى. ولاردا باسقا وي دا, ارمان دا جوق. سول ءۇشىن دە شىرىلداپ باس كوتەرىپ ءجۇر. ءتىپتى, كەيدە بۇل ارەكەتتەرى باسشىلارعا جاقپاي قالادى.
جاۋاپتى سەرىكتەستىكتىڭ جەتەكشىلەرى جۇمىسشىلار ايتقان ارىزدى جوققا شىعارا الماي وتىر. جۇمىستىڭ قالىپتى ىرعاقپەن جۇرۋىنە جاعداي جاساي الماعان ماماندى جازالاعان دا ەكەن. الايدا ماسەلە مۇنىمەن شەشىلە سالسا مەيلى عوي...
ء«بىز وزىمىزگە تيەسىلى كولەمدى تەندەر ارقىلى ۇتىپ العان ەدىك. باسشىلار مەن زاڭگەر بار, ەسەپشى بار, بارلىعى وتىرىپ قارجىلىق جاعدايدى تالقىلايدى. ويتكەنى كورسەتىلگەن مەرزىمگە, ياعني ەكى جىلعا جەتكىزۋ كەرەك. ال قازىر جۇمىسشىلار سۇراپ وتىرعانداي جالاقىنى 30 پايىزعا ارتتىرساق, العان كولەمىمىزدى جىل اياعىنا دەيىن جەتكىزە المايمىز. وسىنى ەسكەرگەن ءجون شىعار», دەيدى «شىمكەنتسپەتسستروي» جشس ديرەكتورىنىڭ ورىنباسارى رۋسلان بەكتۇرسىنوۆ.
جاعدايدى مۇقيات زەردەلەگەن «قازاۆتوجول» كومپانياسىنىڭ وكىلدەرى تاراپتاردىڭ داۋىنا تۇبەگەيلى ارالاسا المايدى. ويتكەنى مەردىگەرگە كەلىسىمشارت نەگىزىندەگى قارجىنى ۋاقتىلى اۋدارىپ وتىرادى. ال قالعان ماسەلەنى سەرىكتەستىك باسشىلارى وزدەرى شەشەدى. قىسقاسى, جۇمىسشىلار مەن سەرىكتەستىك باسشىلارى ءوزارا كەلىسىمگە كەلمەسە, جاعدايدىڭ جەدەل رەتتەلە قويۋى ەكىتالاي سەكىلدى.
اۆتوبانداعى ايقايعا نۇكتە قويا الاتىن ادام بار-جوعىن كىم ءبىلسىن؟ قالاي الىپ قاراساق تا, مەردىگەر كومپانيا كورشى وڭىردە تىركەلگەن. ولاردىڭ باسشىلارىنا ءبىزدىڭ جەرگىلىكتى اتقارۋشى بيلىكتىڭ پارمەنى وتە مە, وتپەي مە, ول جاعىن بىلمەدىك. الايدا جەرگىلىكتى تۇرعىنداردىڭ تالابى بيلىك باسىنداعىلاردىڭ نازارىنان تىس قالماسا دەيسىڭ.
«ارقا جايلى بولسا, ارقار اۋىپ نەسى بار» دەگەن ءسوز وسىندايدا ويعا ورالا بەرەتىنى راس. جاعدايى جاقسى بولسا, جامبىلدىڭ جايساڭ حالقى دا باس كوتەرمەس ەدى عوي. ايلىقتىڭ ازدىعى ولاردى وسىنداي قادامعا بارۋعا يتەرمەلەپ وتىرعانى ءسوزسىز. سەرىكتەستىك باسشىلارى جۇمىسشىلارمەن كەلىسىمگە كەلىپ, جاعدايدى رەتتەۋگە كۇش سالسا دەگەن تىلەك بار. ويتكەنى قارا جۇمىسقا جەگىلگەن جۇرتتىڭ ادال ەڭبەگى لايىقتى باعالانۋعا ءتيىس.
جامبىل وبلىسى
