بۇل – ميالى اۋىلىن تاسقىن سۋدان قورعاۋ ءۇشىن جاسالعان ارەكەت. وسىدان سوڭ يندەر – قاراباۋ – ميالى – ساعىز تاس جولىنىڭ 248-260 شاقىرىمىندا كولىك قوزعالىسى شەكتەلدى. جولدىڭ بۇل بولىگى ميالى مەن جانگەلدين اۋىلدارىنىڭ اراسىن جالعايدى.
ال وبلىس اكىمى ءباسپاسوز قىزمەتىنىڭ اقپاراتىنا سۇيەنسەك, بۇل – بىلتىر جىرىلعان جولدىڭ ءبىر بولىگى. بىلتىر توپىراق توسەلىپ, كولىك وتەتىندەي ەتىپ عانا جاسالعان. ەرىگەن قار سۋىنىڭ كوپتىگىنە بايلانىستى 11 ناۋرىزدا تاڭعى ساعات 04:45-تە توپىراق توسەلگەن جولدى قايتا جىرۋعا شەشىم قابىلدانعان. جول جىرىلعان سوڭ تاسقىن سۋ جارىپشىققان وزەنىنىڭ ارناسىمەن اعىپ كەتكەن.
«جوسپارعا سايكەس جىرىلعان جولدىڭ بولىگىنە سۋ وتكىزەتىن ارنايى قۇبىر قويىلادى. بىلتىر جولدىڭ بۇل بولىگىنە اسفالت توسەلگەن جوق. جول تەك توپىراق توسەلگەن كۇيىندە تۇر», دەپ ءمالىم ەتتى وبلىس اكىمىنىڭ ءباسپاسوز قىزمەتىنەن.
وبلىستىق توتەنشە جاعدايلار دەپارتامەنتى باسشىسىنىڭ مىندەتىن اتقارۋشى نۇرلان جاڭاباەۆتىڭ ايتۋىنشا, قىزىلقوعا اۋدانىنداعى ساعىز, نوعايتى وزەندەرىنىڭ ارناسىن تەرەڭدەتۋ جۇمىستارىن جۇرگىزىپ, ارنالارىنا بوگەت تۇرعىزعان ءجون. ال ميالى – اتىراۋ – يندەر تاس جولىندا ميالى اۋىلىنان شامامەن 600 مەتر قاشىقتاعى سۋ وتكىزگىش تۇربا ورناتۋدىڭ قاجەتتىگى تۋىنداعان.
بىراق جەرگىلىكتى بيلىك بىلتىرعى كوكتەمدە ميالى اۋىلىنا تاسقىن سۋدان تونگەن قاۋىپتىڭ سالدارىنان ساباق الماعانى, ناتيجە شىعارماعانى بايقالىپ وتىر. سودان بەرى جىرىلعان جولعا اسفالت تا توسەلمەگەن, سۋ وتكىزەتىن قۇبىر دا سالىنباعان. سوندا قىزىلقوعا اۋدانىنىڭ اكىمدىگى ءبىر جىلدان بەرى تۇك بىتىرمەي, قول قۋسىرىپ وتىرعان با؟
– تاسقىن سۋدان تونگەن قاۋىپتىڭ الدىن الۋ ءۇشىن جۇمىس ىستەگەن ەرىكتىلەردىڭ ەكپىنى ويىل وزەنىنىڭ اعىسىنان دا قاتتى بولدى. نەگىزگى جۇمىس ەكى جەردە ءجۇردى. ءبىرىنشى توپ تۇسقايتا ىسكە كىرىسىپ, ويىلدىڭ كەنەن جاقتان قاراسۋعا قۇياتىن ارناسىن تۇنگى ساعات 01:00-گە دەيىن بىتەدى. وعان كوبىنە مەكەمەلەردەن جينالعان ەرىكتىلەر باردى. ەكىنشى توپ جىرىلعان جولدىڭ ماڭىندا قاپشىققا توپىراق سالىپ, ونى سوناۋ ەسكى جانارماي بەكەتىنەن ساقال اتا قورىمى جاققا دەيىن تاسىدى. ءسويتىپ, اۋىلدى اينالدىرا بوگەت سالدى. وسى جۇمىستاردى ەرىكتى جاستار اتقاردى. ولارعا جاندوس تىلەكباەۆ جەتەكشىلىك ەتتى, دەيدى جەرگىلىكتى تۇرعىن دۋلات عۇبايدۋللين.
ونىڭ ايتۋىنشا, بوگەت سالۋعا 100-دەن استام ادام جۇمىلعان. ەرىكتىلەر ۇيىنەن كۇرەگى مەن قاپشىعىن اكەلگەن. ال جانگەلدين اۋىلىنىڭ ىبىراي ۋاحيتوۆ بۋلدوزەرى تراكتورىمەن كەلسە, ءالفارابي تولەنوۆ, جامبىل بەركىن ۇلى, ناۋرىزبەك قانات ۇلى «گازەل», «ۋاز» كولىكتەرىمەن توپىراق تاسىعان.
اتىراۋ وبلىسى
