قىلمىستىق كودەكستىڭ 366-بابىنىڭ 2-تارماعى, 367-بابىنىڭ 2-تارماعى بويىنشا پارا الۋ جانە بەرۋ تۋرالى ءىس 2022 جىلعى قاراشادا قارالا باستاعان. اباي اۋدانىنىڭ سوتى قىلمىستىق ءىستى قاراپ, ۇكىم شىعاردى.
سوتتىڭ ءباسپاسوز قىزمەتىنىڭ مالىمەتىنشە, ك ەسىمدى ازامات سەمەي قالاسىنىڭ جۇمىسپەن قامتۋ, الەۋمەتتىك باعدارلامالار جانە ازاماتتىق حال اكتىلەرىن تىركەۋ باسقارماسىنىڭ باستىعى بولا وتىرىپ, يۋ-دان ءوزىنىڭ لاۋازىمدىق وكىلەتتىگىنە كىرەتىن ارەكەتتەرى ءۇشىن 1,7 ملن تەڭگە كولەمىندە پارا العان. قىزمەتكەر 1 جاستان 6 جاسقا دەيىنگى از قامتىلعان وتباسىلاردان شىققان بالالارعا كەپىلدەندىرىلگەن الەۋمەتتىك پاكەتتى ۇسىنعان. سوت وتىرىستارى بارىسىندا سوتتالۋشىلاردىڭ كىناسى ءىس بويىنشا جينالعان دالەلدەمەلەرمەن: سوتتالۋشىلاردىڭ ايعاقتارىمەن, جەدەل ءىس-شارالار ماتەريالدارىمەن جانە جاسىرىن تەرگەۋ ارەكەتتەرىمەن, سونداي-اق سوتتالۋشىلاردىڭ جەكە تەكسەرۋ حاتتاماسىمەن تولىق دالەلدەندى.
«سوت جازا تاعايىنداۋ كەزىندە قىلمىستىق جاۋاپتىلىق پەن جازانى جەڭىلدەتەتىن جانە اۋىرلاتاتىن ءمان-جايلاردى ەسكەرگەن. سوت جۇمىسپەن قامتۋ, الەۋمەتتىك باعدارلامالار جانە سەمەي ازاماتتىق حال اكتىلەرىن تىركەۋ باسقارماسىنىڭ بۇرىنعى باسشىسىنا 85 500 000 تەڭگە كولەمىندە ايىپپۇل تاعايىندادى. ال پارا بەرۋشىگە 51 300 000 تەڭگە كولەمىندە 30 رەت ايىپپۇل سالىندى», دەدى № 2 سوتتىڭ ءباسپاسوز قىزمەتى.
