وسىعان بايلانىستى سۋ تاس قىنى قاۋپى ءتونۋى مۇمكىن 51 ەلدى مەكەن تىركەلگەن. قازىر 15 ەلدى مەكەندە قاۋىپ سەيىلگەن. ال 36 ەلدى مەكەندە قاۋىپ ساقتالىپ وتىر. ونىڭ ىشىندە 26 ەلدى مەكەن جايىق وزەنىنىڭ بويىندا ورنالاسقان. بۇل ەلدى مەكەندەردە تىركەلگەن 17 مىڭ 30 تۇرعىن ۇيدە 86 مىڭنان استام تۇرعىن بار.
دەپارتامەنت باستىعىنىڭ مىندەتىن ۋاقىتشا اتقارۋشى, ازاماتتىق قورعاۋ پولكوۆنيگى نۇرلان جاڭاباەۆتىڭ ايتۋىنشا, جەرگىلىكتى مەنشىكتەگى ەرالى سۋ تورابى قىزىلقوعا اۋدانىندا ورنالاسقان. بۇل سۋ تورابىنىڭ جاعدايى قاناعاتتانارلىق دەڭگەيدە دەلىنىپ وتىر. ارنايى بەكىتىلگەن جول كارتاسىنا 2021 جىلى جايىق وزەنىنىڭ ماحامبەت اۋدانىنداعى ماحامبەت اۋىلىنىڭ تۇسىندا ۇزىندىعى 4,5 شاقىرىم, العا اۋىلىنىڭ ماڭىندا 3,2 شاقىرىم جاعالاۋدى نىعايتۋ جۇمىستارى ەنگىزىلگەن.
اتىراۋ قالاسى مەن وعان تاياۋ ورنالاسقان جۇمىسكەر, گەولوگ, اقساي, اتىراۋ, ەركىنقالا, دامبى, بالىقشى, قايىرشاقتى, كەڭوزەك ەلدى مەكەندەرىندەگى قورعانىس بوگەتىنە كۇردەلى جوندەۋ جۇمىستارى جۇرگىزىلەدى. جايىق وزەنى مەن كاسپي تەڭىزىنىڭ جاعالاۋىنداعى 86 شاقىرىمنان استام قورعانىس بوگەتى بار.
سۋ باسۋ قاۋپى بار اۋداننىڭ ءبىرى – يندەر. اۋدان اكىمى دارىن شامۇراتوۆتىڭ ايتۋىنشا, قازىر سۋ باسۋ قاۋپىنىڭ الدىن الۋ جۇمىستارى جۇرگىزىلىپ جاتىر.
– بيىل قار مول جاۋدى. كۇن كۇرت جىلىنىپ, جاۋىن جاۋسا, اۋداننىڭ بىرقاتار اۋىلىندا ەرىگەن قاردىڭ سالدارىنان قيىندىق تۋىنداۋى ىقتيمال. سول سەبەپتەن, اۋدان اۋماعىندا قار سۋىنىڭ ۇيگە كىرمەۋىن قامتاماسىز ەتۋ ءۇشىن 18 تەحنيكا جۇمىلدىرىلدى. قازىر يندەربور كەنتىندە, جارسۋات, ورلىك, ەلتاي اۋىلدىق وكرۋگتەرىندەگى تۇرعىن ۇيلەردى سۋ باسۋ قاۋپى بولۋى مۇمكىن اۋماقتار ناقتىلاندى. كۇشەيتىلگەن رەجىمدە ۇيىمداستىرىلعان جۇمىستاردىڭ ناتيجەسىندە جارسۋات اۋىلدىق وكرۋگىندە قاۋىپ سەيىلدى, – دەپ حابارلادى د.شامۇراتوۆ.
اكىمنىڭ مالىمەتىنشە, يندەر اۋدانىندا ەلدى مەكەندەردەن 11 مىڭ تەكشە مەتر قار شىعارىلعان. كوشەلەردەن 22 موتوپومپامەن ەرىگەن قار سۋى سورىلىپ جاتىر. بۇل جۇمىسقا توتەنشە جاعدايلار قىزمەتىنىڭ سۋ سوراتىن ەكى كولىگى تارتىلعان.
قىزىلقوعا اۋدانىنىڭ اكىمى قانات ءازمۇحانوۆتىڭ دەرەگىنە قاراعاندا, 7 ناۋرىزعا قاراعان ءتۇنى نوسەر جاڭبىر جاۋعان. جاڭبىر مەن ەرىگەن قاردىڭ سالدارىنان ميالى اۋىلدىق وكرۋگىندە سۋ دەڭگەيى كوتەرىلگەن. بۇل اۋىلىشىلىك سۋ باسۋ قاۋپىن تۋىنداتقان.
– وسىعان بايلانىستى قىزىلقوعا اۋدانىنىڭ اكىمدىگى تاراپىنان جەدەل جۇمىستار ۇيىمداستىرىلدى. ءبىرىنشى كەزەكتە سۋ باسقان ۇيلەردى قۇتقارۋ جۇمىستارى جۇرگىزىلدى. ميالى اۋىلىندا 4 ۆاكۋم, 6 موتوپومپا, 5 «كاماز» اۆتوكولىگى, 2 تيەگىش تەحنيكا جانە باسقا دا ارنايى قۇرالدار تارتىلدى, دەيدى ق.ءازمۇحانوۆ.
ونىڭ ايتۋىنشا, تولاسسىز جاۋعان جاڭبىر ساعىز اۋىلىنىڭ ىشىمەن وتەتىن نوعايتى وزەنىنىڭ ارناسىن تولتىرىپ جىبەرگەن. سول سەبەپتەن, وزەن جاعالاۋىن بەكىتۋ ءۇشىن 80-نەن استام تۇرعىن جۇمىلدىرىلعان. قازىر نوعايتى وزەنىندەگى سۋ دەڭگەيى بىرتىندەپ تومەندەپ كەلەدى. ال ساعىز وزەنىندە اعىس باسەڭدەگەن.
جاڭبىر مەن ەرىگەن قار سۋى «ميالى-ساعىز» باعىتىنداعى جولدىڭ 35-شاقىرىمىنداعى تۇسىن باسقان. بۇل – سوركول اۋىلىنىڭ تۇسى. ءدال وسى جەردە 7 ناۋرىزدا جەڭىل كولىك جولدان شىعىپ, ەرىگەن قار سۋىنا باتىپ كەتتى. بۇل دەرەكتى اتىراۋ وبلىسى اكىمى مەن وبلىستىق پوليتسيا دەپارتامەنتىنىڭ ءباسپاسوز قىزمەتتەرى دە راستادى.
«جەرگىلىكتى ۋاقىتپەن ساعات 06:30 شاماسىندا قىزىلقوعا اۋدانىنداعى جانگەلدين اۋىلىنان شىققان تاكسي جۇرگىزۋشىسى كولىگىمەن سوركول اۋىلىنىڭ تۇسىندا جولدان شىعىپ, جيەكتەگى سۋعا ءتۇسىپ كەتكەن. وعان جۇرگىزۋشىنىڭ جىلدامدىقتى اسىرىپ, باسقارۋ جۇيەسىن يگەرە الماعانى سەبەپ بولعان. كولىكتەگى جولاۋشىلار زارداپ شەككەن جوق. جولاۋشىلار سوركول, ساعىز اۋىلدارىنا جەتكىزىلدى» دەپ ءمالىم ەتتى وبلىس اكىمىنىڭ ءباسپاسوز قىزمەتىنەن.
بىراق اتالعان جولدا كولىك قوزعالىسىنا شەكتەۋ قويىلمادى. ويتكەنى ەرىگەن قاردىڭ سۋىنان جولعا ءتونىپ تۇرعان قاۋىپ جوق. ال پوليتسيا دەپارتامەنتى كولىك جۇرگىزۋشىلەرىنە ساقتىق شارالارىنا اسا مۇقيات بولۋدى ەسكەرتىپ وتىر.
اتىراۋ وبلىسى
