فورۋمنىڭ اشىلۋ سالتاناتىنا قاتىسقان قالا اكىمى مۇرات ايتەنوۆ ءسوزىنىڭ باسىن بارشا ايەلدەر قاۋىمىن كوكتەمنىڭ العاشقى كۇن شۋاعىمەن بىرگە كەلەتىن 8 ناۋرىز مەرەكەسىمەن قۇتتىقتاۋمەن باستادى.
«ايەل ادام – ءومىردىڭ ءنارى. ولارسىز تىرشىلىك تە ءمانسىز. گۇلدەي قۇلپىرعان نازىك جاندىلار دۇنيەگە جاڭا كۇش, جارىق نۇر سىيلايدى. ودان قۋاتتانعان بۇكىل ءتىرى جان يەسى جوعارى بيىككە ۇمتىلۋعا كۇش-قۇدىرەت الادى. سوندىقتان كوكتەم مەزگىلىندەگى شۋاقتى مەرەكەنىڭ دۋمانى سىزدەردىڭ قۋانىشتارىڭىزبەن باستالادى. شاڭىراقتىڭ شىراقشىسى, مەيىرىم مەن سۇلۋلىقتىڭ سيمۆولى وزدەرىڭىز بولىپ تابىلاسىزدار. ءيا, تاريحتا قازاق قىزدارى جاساعان ەرلىك, قالدىرعان ماڭگى وشپەس ءىز جەتەرلىك. مىنە, وسىنداي داڭقتى ارۋلارىمىزدىڭ اسقاق جولىن سىزدەر ار-يبا, ابىرويمەن جالعاپ كەلەسىزدەر», دەدى ول.
تىلەگىنىڭ سوڭىندا اكىم قىز-كەلىنشەكتەر ءۇشىن شاھاردا ءوزىن-ءوزى دامىتۋعا بار جاعداي جاسالعانىن, اشىلماعان تالاي جاڭا مۇمكىندىكتەردىڭ بار ەكەنىن باياندادى.
قالا باسشىسى مالىمدەگەندەي, بۇگىندە مەملەكەتتىك ساياسات وتباسى ينستيتۋتىن, كوپبالالى انالاردى, ايەلدەر كاسىپكەرلىگىن قولداۋعا جانە گەندەرلىك تەڭدىكتى قامتاماسىز ەتۋگە باسا ءمان بەرىپ وتىر.
سونىمەن بىرگە فورۋم قىزىعىن تاماشالاۋعا «بيزنەس ينكۋباتور» بايقاۋىنىڭ جەڭىمپازى اتانعان ستۋدەنت قىزدار, «اتامەكەن», «دامۋ» كورپوراتسياسىنان گرانت ۇتىپ العان ايەلدەر مەن وتباسىلىق بيزنەسكە ەندى قادام باسقان كوپبالالى انالار دا كەلدى. بارلىعى دا باسقوسۋ اياسىندا كوشباسشى ايەلدەرمەن جۇزدەسىپ تابىسقا جەتۋ جولدارىنىڭ تاجىريبەسىمەن تانىسىپ ۇيرەنەدى. ءوز كەزەگىندە تابىستى, ىسكەر ايەلدەر ءوزىن-ءوزى دامىتۋ, مانساپتىق ءوسۋ, قارجىنى دۇرىس يگەرۋ, دەنساۋلىق كۇتىمى مەن جەكە ومىرگە قاتىستى باسقا دا پايدالى جاقتار بويىنشا اقىل-كەڭەستەرىن ۇسىندى.
ال فورۋمدا تورگە وزعان قوناقتار اراسىنان جۇرت مەرۋەرت وتەكەشەۆا, مايرا مۇحامەدقىزى, ءلايلا سۇلتانقىزى, ارايلىم اۋەلبەكوۆا, حانزادا ەسەنوۆا, ايكا الەمي جانە جانيا دابىردى تانىدى. ولاردىڭ بارلىعى دا كينويندۋستريا, ونەر, مەديا, ءسان الەمى جانە كاسىپكەرلىك سالاسىندا كوشباسشى بولىپ جۇرگەن جاندار.
سكولكوۆو ماسكەۋ باسقارۋ مەكتەبىنىڭ پرورەكتورى, ايەلدەر باعدارلامالارىنىڭ ديرەكتورى مارينا كاربان فورۋمنىڭ سىيلى قوناعى بولدى. ول قاتىسۋشىلارمەن ونلاين رەجىمدە تىلدەسىپ, قازاقستاندىق قىز-كەلىنشەكتەردىڭ بارلىق باستاماسىنا جەڭىس پەن ساتتىلىك تىلەدى.
جوعارىدا ايتقانىمىزداي, SEN فورۋمىنىڭ باستى مىندەتىنىڭ ءبىرى – نازىك جاندىلاردىڭ العا قويعان ماقساتتارىنا جەتۋلەرىنە كومەكتەسۋ, سول جولدا ولاردىڭ الەۋەتتەرىن تولىق اشۋ, سونىمەن قاتار ءوزارا تانىسۋعا, تاجىريبە الماسۋعا اشىق الاڭ ۇسىنۋ.
سونىمەن بىرگە جيىندا ءبىر-بىرىمەن اڭگىمە-دۇكەن قۇرىپ, تانىسىپ-بىلىسكەن سپيكەرلەر مەن قاتىسۋشىلار كەيىن دە ۇزاق ۋاقىتقا بايلانىس ورناتىپ, ونىڭ سوڭى ءتيىمدى ارىپتەستىك قارىم-قاتىناسقا ۇلاسادى دەگەن ءۇمىت باسىم. سوندىقتان قوس تاراپ تا الداعى ۋاقىتتا وتباسى, پسيحولوگيا, قوعامداعى قارىم-قاتىناس جانە تۇلعا بولىپ قالىپتاسۋ سەكىلدى ماسەلەلەر توڭىرەگىندە ارنايى وسى تاقىرىپتارعا باعىتتالعان قاۋىمداستىقتار اشۋعا, ولاردىڭ جۇمىسىن جۇيەلەۋگە ءبىر-بىرىنە قولعابىس تيگىزەدى دەگەن ويدامىز.
سول سەبەپتى ۇيىمداستىرۋشىلار فورۋمنىڭ بەرەر پايداسى مول دەپ ەسەپتەيدى. ول بىرىنشىدەن قازاقستانداعى قىز-كەلىنشەكتەردىڭ قوعامنان ءوز ورنىن تابۋىنا, ءارى قاراي ءوسىپ-جەتىلۋىنە قولداۋ كورسەتەدى. ەكىنشىدەن وسىنداي جيىن, ءىس-شارالار ارقىلى ولاردىڭ دا بويىندا ءوز-وزدەرىنە دەگەن سەنىم مەن كۇش پايدا بولادى. تابىستى بولۋدىڭ جاڭا مۇمكىندىكتەرىن قاراستىرا باستايدى. سوندىقتان ايەلدەر قاۋىمىنىڭ ىشكى جان تۇراقتىلىعى وتە ماڭىزدى ءرول وينايدى. ويتكەنى قوعام وتباسىدان قۇرالادى دەسەك, ال شاڭىراقتىڭ وتىن جاققان, وتباسىنىڭ بەرەكەسىن كىرگىزەتىن ايەلدەر ەكەنىن ۇمىتپاعان ابزال. بالا تاربيەسىنە دە ءبىرىنشى كەزەكتە تىكەلەي جاۋاپتى ايەل ادام سانالادى. مىنە, قوعامداعى ءوزىنىڭ ورنىن جوعالتپاۋعا, ساناسىنىڭ سەرگەك, اقىلىنىڭ وياۋ بولۋىنا كومەكتەسەتىن وسىنداي جىلىشىرايلى باسقوسۋلار مەن ءمانى زور فورۋمدار.
