مالايزيا مال فەرماسىن كوبەيتپەك

جاقىندا جامبىل وبلىسىنىڭ اكىمدىگى مالايزيانىڭ «AGROSTAN FARMS SDN BHD» كوم­پانياسىمەن مەموراندۋمعا قول قويدى. ناقتىراق ايتساق, مامىر ايىندا مالايزيا پرەمەر-ءمينيسترى نادجيب تۋن رازاكتىڭ ەلىمىزگە كەلگەن رەسمي ساپارى بارىسىندا بيزنەستىك قۇرىلىمدار اراسىندا جالپى مولشەرى 1,1 ملرد. دوللاردان اساتىن ءۇش كەلىسىمشارتقا قول قويىلعان بولاتىن. بۇل جو­بالاردىڭ ەكەۋى ماڭعىستاۋ, بىرەۋى جامبىل وبلىسىندا جۇزەگە اساتىن بولىپ كەلىسىلدى. شەتەلدىك كومپانيا جامبىل جەرىندە ءىرى قارا مال سانىن كوبەيتىپ, 500 فەرما اشۋدى ماقسات تۇتىپ وتىر. بۇل كەلىسىمشارت سونداي-اق, وڭىردەگى ەت جانە ءسۇت شارۋاشىلىعىن دامىتۋعا ۇلكەن سەرپىن بەرەتىنى انىق. ينۆەستورلار ءسۇت پەن ەت ءونىم­دەرىن وڭدەۋ ءۇشىن قاجەتتى ينفراقۇرىلىمداردى تارتىپ, وسى سالانى دامىتۋعا جاعداي جاسايتىن بولادى. سونداي-اق, سەلەك­تسيالىق جولمەن ءىرى قارا مالىنىڭ گەنەتيكالىق الەۋەتىن جەتىلدىرۋ ءىسى دە قولعا الىنباق. وبلىستىق اۋىل شارۋاشىلىعى باسقارماسى باسشىسىنىڭ ورىنباسارى كەمەلحان ابىلەكوۆتىڭ ايتۋىنا قاراعاندا, بۇل ءۇشىن مالازيالىق كومپانيا 50 مىڭ ءىرى قارا مالىن اكەلۋدى جوسپارلاۋدا. كومپانيا العاشقى كەزەڭدە ەل ەكونوميكاسىنا 350 ملن. اقش دوللارىن سالادى. ءسويتىپ, بيىلعى جىلى جەمشوپ بازاسىن دايىنداۋ جۇمىستارى جۇرەدى. ال, كەلەسى جىلدان باستاپ 10 مىڭنان 30 مىڭ باسقا دەيىن مال اكەلىنىپ, 20 مىڭى شۋ اۋدانىنا, قالعان 30 مىڭ باس «باتىس ەۋروپا-باتىس قىتاي» حالىقارالىق جولىنىڭ بويى­نان اشىلاتىن شاعىن فەرمالارعا بەرىلمەك. مالايزيا – شەتەلگە ەت ەكسپورتتايتىن ەڭ الەۋەتتى مەملەكەتتىڭ ءبىرى. بۇل ەلدە ازىق-ت ۇلىكتىڭ قاۋىپسىزدىگىن قامتاماسىز ەتۋ ماقساتىندا بارلىق شارالار قاراستىرىلعان. «AGROSTAN FARMS SDN BHD» كومپانياسى دا وسىنىڭ ارقاسىندا جۇمىسىن ورىستەتىپ وتىر. بۇل كوم­پانيانىڭ جامبىل جەرىندە قولعا العالى وتىرعان جوباسى ىسكە اسقان جاعدايدا جەرگىلىكتى جەردە وڭدەلگەن ەت پەن ءسۇت ونىمدەرى شەتەلگە ەكسپورتتالىپ, ءتىپتى, وبلىس تۇرعىندارىنىڭ سۇرانىسىن قاناعاتتاندىراتىن بولادى. جانە وسى تىرلىكتىڭ ارقاسىندا قانشاما جاننىڭ جۇمىسپەن قام­تىلاتىنى ايتپاسا دا تۇسىنىكتى. «قايراتتى ەردە مال تۇرار, ونەرلى ەردە باق تۇرار» دەگەن, جامبىلدىڭ شارۋاعا بەيىم, قايراتتى جىگىتتەرىنىڭ شيراق قيمىلداپ, ۇلكەن ءبىر تىرلىكتى باستاۋعا وسى جوبا زور مۇمكىندىك بەرەتىنى ءسوزسىز. ورالحان ءداۋىت, «ەگەمەن قازاقستان». جامبىل وبلىسى.