ازىرگە جەتى جوبا...

بيىلعى جىلى قاراتاۋ قالاسىندا جىلىنا 15,0 مىڭ توننا ناتري ءتسيانيدىن وندىرەتىن زاۋىت ىسكە قو­سىلادى. جوبانىڭ قۇنى – 12,9 ملرد. تەڭگە. ءوندىرىس ورنىنىڭ اشىلۋىنا «بيزنەستىڭ جول كارتاسى-2020» باعدارلاماسى بويىنشا 4,5 ملرد. تەڭگە, ال, ينفراقۇرىلىمدى دامىتۋ بويىنشا 1 469 ملن. تەڭگە  ءبولىندى. زاۋىت ىسكە قوسىلعاندا 491 ادام جۇمىسپەن قامتىلادى دەپ جوسپارلانۋدا. جالپى العاندا بيىل جامبىل وبلىسىندا ۇدەمەلى يندۋستريالىق-يننوۆاتسيالىق باعدارلاما بويىنشا 25,4 ملرد. تەڭگەنى قۇرايتىن 7 جوبانى ىسكە اسىرۋ كوزدەلىپ وتىر. وسىنىڭ ارقاسىندا 1 147 ادام جۇمىسپەن قامتىلادى. سونىڭ ىشىندە قورداي اۋدانىندا قۇنى 6,4 ملرد. تەڭگەنى, قۋاتى 21 مۆت-تى قۇرايتىن جەل ەلەكتر ستانساسىن, جامبىل اۋدانىندا قۇنى 2,6 ملرد. تەڭگەنى قۇرايتىن ەت وڭدەۋ كومبيناتىن ەرەكشە ايتۋعا بولادى. بۇل كومبينات جىلىنا 1800 تونناعا جۋىق ەت وڭدەيدى. ال, قورداي اۋدانىنداعى التىن وڭدەۋ زاۋىتى ىسكە قوسىلعاننان كەيىن جىلىنا 500 توننا تازا التىن, مويىنقۇم اۋدانىندا اشىلعالى وتىرعان بالىق ەتىن وڭدەيتىن كومبينات جىلىنا 1200 توننا ءونىم وندىرەدى. سونداي-اق, نەمىس تەحنولوگياسى بويىنشا جابدىقتالعان ءۇي قۇرىلىسى كومبيناتى مەن اليۋميني رادياتورلارىن شىعاراتىن ءوندىرىس ورىندارى دا وسى سالانىڭ جۇمىسىنا ۇلكەن قارقىن قوساتىنى انىق. ورالحان ءداۋىت, «ەگەمەن قازاقستان». جامبىل وبلىسى.