«وقۋدى بىتىرۋىنە ەكى اي قالعان». ساپيەۆپەن جانجالداسقان سپورتشى جازالاندى

بۇل تۋرالى تانىمال قازاقستاندىق بوكسشى ايدا ساتىبالدينوۆا Instagram-پاراقشاسىندا ايتتى. ونىڭ سوزىنشە، بالۋاننىڭ سپورت كوللەدجىن بىتىرۋىنە 2 اي قالعان. 

سونىمەن قاتار ءالى راستالماعان اقپارات بويىنشا، مۇسيحانوۆتىڭ تۋىستارى دا جۇمىستان قۋىلعان. 

«وليمپيادا چەمپيونى مەن زەليمحان مۇسيحانوۆتىڭ توبەلەسىن ءبارىمىز كوردىك. جىگىتتەر قول الىسىپ، جانجال سونىمەن ءبىتتى دەپ ويلاپ ەدىك. وسى وقيعادان كەيىن نە بولدى؟ زەليمحان ءبىلىم الىپ جۇرگەن سپورت كوللەدجىنەن شىعارىلدى... ونىڭ اعاسى جۇمىستان قۋىلعان. ونىڭ اتا-اناسى دا جۇمىستان قۋىلعان دەگەن اقپارات بار، بىراق ناقتى سولاي دەپ ايتا المايمىن. ارتىنان الەكساندر گولتسمان (مۇسيحانوۆتىڭ جاتتىقتىرۋشىسى) وسى ىسكە ارالاسىپ، زەليمحاندى قايتادان وقۋعا الدىرۋعا تىرىسادى، سەبەبى ول جىگىتتى وسى وقيعاعا بولا وقۋدان شىعارۋ قاتە. امالىن تاۋىپ ونى قايتادان الدىردى»، دەيدى ساتىبالدينوۆا.  

ەسكە سالايىق، Batyrball ويىنى (كۇرەس ارالاس باسكەتبول) كەزىندە سەرىك ساپيەۆ بالۋانمەن جانجالداسىپ قالدى. بالۋان زەليمحان مۇسيحانوۆ ساپيەۆكە قارسى كۇرەس ءادىسىن قولدانعان، بۇل بوكسشىعا ۇناماي قالعان، كەيىن توبەلەس باستالعان. وزگە ويىنشىلار سپورتشىلاردى اجىراتىپ ۇلگەرگەن.

بۇعان دەيىن سەرىك ساپيەۆ الماتىدا وتكەن Naiza 49 تۋرنيرىندە جەكپە-جەكتەن كەيىن بالۋانمەن جانجالداسىپ قالعانىن حابارلاعان ەدىك. كەيىنىرەك اتالعان وقيعاعا قاتىستى بالۋاننىڭ جاتتىقتىرۋشىسى الەكساندر گولتسمان تۇسىنىكتەمە بەرگەن بولاتىن.