سۋرەتتەردى تۇسىرگەندەر امانقۇل دۇيسەنباەۆ, ەركەبۇلان ۇكىباەۆ
پرەزيدەنت ۇلتىمىزدىڭ دۇنيەتانىمىندا ايەلدىڭ ورنى ەرەكشە ەكەنىن ايتا كەلە, سۇلۋلىق پەن نازىكتىك, مەيىرىم مەن شاپاعات – ءبارى دە ايەلدەردەن باستاۋ الاتىنىن جەتكىزدى.
– شىن مانىندە, ءاربىر ادام ءۇشىن انادان ۇلى, انادان قىمبات ەشكىم جوق. ەڭ قاستەرلى قۇندىلىقتارىمىز «جەر-انا», «وتان-انا» ۇعىمدارىمەن تىعىز بايلانىستى. «اتا ۇلدى, انا ۇلتتى تاربيەلەيدى» دەيدى. بۇل ءسوزدىڭ ايرىقشا ءمان-ماڭىزى بار. ۇلت بولاشاعى ۇرپاق تاربيەسىنەن باستالادى. ءار بالانىڭ جەتىستىگى – انا ماحابباتىنىڭ جەمىسى. ۇلى اباي ايتقان «تولىق ادامعا» ءتان اسىل قاسيەتتەر ۇرپاقتىڭ بويىنا انا ارقىلى داريدى. قازىر ەلىمىز دامۋدىڭ ماڭىزدى كەزەڭىنە قادام باستى. ادىلەتتى قازاقستاندى قۇرۋ ءۇشىن اۋقىمدى رەفورمالاردى قولعا الدىق. ەڭ باستىسى, ەل ىشىندە وتانشىلدىق, مەملەكەتشىلدىك رۋح مىقتى بولۋى كەرەك. ءبىز كوك بايراعىمىزدى بيىك ۇستايتىن, ءبىلىمدى, ۇلتجاندى ۇرپاق ءوسىرۋىمىز كەرەك, – دەدى پرەزيدەنت.
قاسىم-جومارت توقاەۆ «جاستارعا سالىنعان قاراجات – ەڭ ۇتىمدى ينۆەستيتسيا» ەكەنىن جانە قوعامداعى ايەلدەردىڭ رولىنە ەرەكشە توقتالدى.
– قازىر قىزدارىمىز الەمنىڭ ەڭ ۇزدىك ۋنيۆەرسيتەتتەرىندە ءبىلىم الىپ جاتىر. جاھاندىق كومپانيالاردا جۇمىس ىستەيدى. سان ءتۇرلى كاسىپتى مەڭگەرگەن ايەلدەر قوعامنىڭ ءتۇرلى سالاسىندا تابىستى ەڭبەك ەتىپ ءجۇر. ولاردىڭ اراسىندا مۇعالىم, دارىگەر, مەملەكەتتىك قىزمەتشى, تاربيەشى, تىگىنشى جانە باسقا دا ماماندىق يەلەرى بار. حالىقارالىق جارىستاردا كوك تۋىمىزدى بيىككە كوتەرگەن سپورتشى ارۋلارىمىز دا از ەمەس. قانشاما قىز-كەلىنشەكتەر بيزنەسپەن اينالىسىپ, مىڭداعان ادامعا جۇمىس ۇسىنىپ وتىر. مەن بارشاڭىزدى ماقتان ەتەمىن! سىزدەرگە شىنايى ريزاشىلىعىمدى بىلدىرەمىن, – دەدى مەملەكەت باسشىسى.
پرەزيدەنتتىڭ ايتۋىنشا, ايەلدەر ءادىل, دانا ءارى تاپقىر باسشى بولا الاتىنىن ءومىردىڭ ءوزى دالەلدەپ وتىر. قازىر شاعىن جانە ورتا بيزنەستەگى ايەلدەردىڭ ۇلەسى 42 پايىزعا جەتتى.
– بۇل – ايەلدەر كاسىپكەرلىگىنە مەملەكەت تاراپىنان كورسەتىلگەن جۇيەلى قولداۋدىڭ ناتيجەسى. بىلتىر ءوز كاسىبىن اشقىسى كەلەتىن 6 مىڭنان استام كوپبالالى اناعا ارنايى گرانت بەرىلدى. اۋىلداعى قىز-كەلىنشەكتەر بيزنەسپەن بەلسەندى اينالىساتىن بولدى. مىڭداعان ايەل بيزنەس جوباسىن جۇزەگە اسىرۋعا مەملەكەتتەن سۋبسيديا الاتىن بولادى. بۇل ماقساتقا جالپى سوماسى 250 ميلليارد تەڭگە جۇمسالدى, – دەدى پرەزيدەنت.
مەملەكەت باسشىسى ءوزىنىڭ تاپسىرماسىمەن وتباسى جانە گەندەرلىك ساياسات تۋرالى جاڭا تۇجىرىمداما قابىلدانعانىن, اتالعان قۇجات ايەلدەردىڭ ءوزىن-ءوزى دامىتۋىنا مول مۇمكىندىك بەرۋگە باعىتتالعانىن اتاپ ءوتىپ, ءاربىر ايەل وتباسىندا باقىتتى, قىزمەتتە تابىستى, قوعامدا بەلسەندى بولۋعا لايىقتى ەكەنىن ايتتى.
سالتاناتتى جيىن سوڭىندا مەملەكەت باسشىسى «ارۋانا» ۇزدىك ايەلدەر جوباسى بايقاۋىنىڭ جەڭىمپازدارىن ماراپاتتادى. بۇل ماراپات ءارتۇرلى سالادا الەۋمەتتىك ماڭىزى بار جوبالارمەن اينالىسىپ, ازاماتتىق قوعامنىڭ دامۋىنا ەلەۋلى ۇلەس قوسىپ جۇرگەن ىسكەر ايەلدەرگە ون نوميناتسيا بويىنشا تابىستالدى.
حالىقارالىق ايەلدەر كۇنىنە وراي وتكىزىلگەن «ارۋانا» ۇزدىك ايەلدەر جوباسى بايقاۋى جەڭىمپازدارىنىڭ قاتارىندا «اگروبيزنەس سالاسىنداعى ۇزدىك جوبا» اتالىمى بويىنشا – ايگۇل ساعىمبەكقىزى اقشالوۆا, «ۇزدىك IT جوبا» اتالىمى بويىنشا – فاريدا امانتايقىزى اقشولاقوۆا, «كرەاتيۆتى يندۋستريا سالاسىنداعى ۇزدىك جوبا» اتالىمى بويىنشا – ساۋلە حالەلقىزى ساليحوۆا, «جاڭا مەديا سالاسىنداعى ۇزدىك جوبا» اتالىمى بويىنشا – اسەم بولاتجانقىزى نۇرعاليەۆا, «ايەلدەر مەن بالالار قۇقىعىن قورعاۋ سالاسىنداعى ۇزدىك جوبا» اتالىمى بويىنشا – نەسىبەلى زاريۆانقىزى باسەنوۆا, «ينكليۋزيۆتى دامۋ سالاسىنداعى ۇزدىك جوبا» اتالىمى بويىنشا – ارايلىم ماعاشقىزى ءالىمجانوۆا, «عىلىم جانە يننوۆاتسيا سالاسىنداعى ۇزدىك جوبا» اتالىمى بويىنشا – مارينا ۆلاديميروۆنا دەركاچ, «ايەلدەر مەن بالالاردىڭ بەلسەندى قۇقىق قورعاۋشىسى» اتالىمى بويىنشا – ءلاززات بەكمۇحانبەتقىزى راكيشەۆا, «كاسىپورىننىڭ ۇزدىك ايەل-باسشىسى» اتالىمى بويىنشا – فاتيما نابيدۋللاقىزى تولەەۆا, «ايەلدەر قۇقىقتارىن قورعاۋ سالاسىنداعى ۇزدىك ۇكىمەتتىك ەمەس ۇيىم» اتالىمى بويىنشا – ولگا ۆلاديميروۆنا رىل بار.
