سۋرەتتى تۇسىرگەن ۇلان سىدىقوۆ
اۋلەتتىڭ ىشىنەن العاش بولىپ 1988 جىلى كاسىپورىنعا اقزيرا قۇسايىنوۆا جۇمىسقا تۇرعان. سەبەبى تۇرىپ جاتقان ەلەك ەلدى مەكەنى زاۋىتقا جاقىن ەدى. اقزيرا اپا فەرروقورىتپا زاۋىتىنىڭ اكىمشىلىك-شارۋاشىلىق بولىمىندە تەحنيكالىق قىزمەتشى بولىپ 21 جىل ءۇزىلىسسىز ەڭبەك ەتىپ, 2019 جىلى زەينەتكە شىقتى. ارادا از ۋاقىت وتكەندە وسى زاۋىتقا اقزيرا اپايدىڭ قىزى گۇلزادا كەلدى.
«2000 جىلى جۇمىس ىستەپ جاتقان مەكەمەم جابىلعان سوڭ, زاۋىتقا كەلدىم, – دەيدى ەنەرگەتيكالىق تسەحتىڭ مامانى گۇلزادا تەمىروۆا. – سول ۋاقىتتا قازىرگى 900 ورىندىق تۇرمىستىق كورپۋستىڭ ورنىندا جوندەۋ-قۇرىلىس تسەحى بولاتىن. ول بولىمشەدە عيماراتتار مەن پەشتەردى جوندەۋ جۇمىستارىمەن اينالىستىق. ايەلدەردەن قۇرالعان سىرلاۋشىلار بريگاداسىندا 10 جىل جۇمىس ىستەدىم. كەيىن بولىمشە تاراتىلىپ, قىزمەتكەرلەر باسقا تسەحتارعا اۋىسا باستادى. مەن ەنەرگەتيكالىق تسەحتىڭ كونديتسيونەر ءماشينيسى قىزمەتىنە كىرىستىم. ال ەكى جىل بۇرىن اتالعان قۇرىلعىنىڭ اپپاراتشىسى اتاندىم, سونىسىمەن جاۋاپكەرشىلىگىم دە ارتتى».
پاندەميا باستالعالى گۇلزادانىڭ دا جۇمىسى كوبەيدى. سەبەبى ول قالانىڭ اۋرۋحانالارىنا جەتكىزىلىپ جاتقان وتتەگىنىڭ تازالىعىنا جاۋاپتى بولاتىن. زاۋىتتىڭ وسى ۋچاسكەسىندە تازالىعى 99,9% جوعارى, مەديتسينالىق ماقساتتارعا جارامدى وتتەگى وندىرىلەدى. سىن ساعاتتا كاسىپورىن ەمدەۋ مەكەمەلەرىنە تاۋلىگىنە 800 باللون جەتكىزىپ تۇردى.
«سول ساتتە ءبارىمىز قينالدىق. اسىرەسە مەديتسينالىق مەكەمەلەرگە باللون تيەپ جۇرگەن جىگىتتەردىڭ جۇمىسى اۋىر ەدى. مەن وتتەگىنىڭ تازالىعىنا جاۋاپتى ەدىم. ادام جەتپەي جاتقاندىقتان, تۇنگى اۋىسىمعا ەكى-ءۇش ادامنان قالىپ جۇردىك. ءتىپتى ىستەن شىققان قۇرىلعىنى ءوز قولىمىزبەن جوندەيتىنبىز. ادامداردىڭ ءومىرىن امان ساقتاپ قالۋعا ۇلەسىمىزدى قوسىپ جۇرگەندىكتەن, شارشاۋ دەگەندى ۇمىتتىق», دەيدى گۇلزادا ساعىنتايقىزى.
كوپ كەشىكپەي گۇلزادانىڭ قىزى سابينا عازيزوۆا دا زاۋىتقا جۇمىسقا كەلدى. قازىر دە ول حيميا زەرتحاناسىندا جۇمىس ىستەيدى. 2019 جىلى الماتىدا وقۋ ءبىتىرىپ, ءوز ماماندىعى بويىنشا سول قالادا ەڭبەك ەتىپ جۇرگەندە پاندەميا باستالىپ, ونىڭ اتا-اناسى ەپيدەميالىق جاعداي تۇراقتالعانشا اقتوبەدە بولا تۇرۋىن قالادى. بىراق جاستايىنان ەڭبەكقور سابينا ۇيدە كوپ وتىرا الماي, زاۋىتقا قۇجاتىن تاپسىردى. سۇحباتتاسۋدان ءساتتى ءوتىپ, رەنتگەنسپەكترلى تالداۋ زەرتحاناشىسى بولىپ كاسىپورىنعا كىردى. قازىر ول – زەرتحانادا مەتالل قۇرامىنىڭ ساپاسىن تەكسەرەتىن مامان.
گۇلزادا قىزىنىڭ ءوز ماماندىعى بويىنشا جۇمىس ىستەپ جاتقانىنا ريزا. ونىڭ پىكىرىنشە, تۇتىنۋشىلار ساپالى تاۋار السا, كومپانياعا دەگەن سەنىم دە, ءۇمىت تە ارتادى. كومپانيادا جاستارعا بارلىق جاعداي جاسالعان. ول زاۋىت قىزمەتكەرلەرىنىڭ بىرنەشە ماماندىقتى مەڭگەرۋى ءوزى ءۇشىن دە, وتباسى ءۇشىن دە ماڭىزدى دەپ ەسەپتەيدى.
قامبار مۇقاش
اقتوبە
