ادەتتە ءتۇرلى اياقكيىمدى جوندەۋشىلەردىڭ دەنى ەر ادام بولىپ كەلەدى. ال ولاردىڭ اراسىندا سۇيرىكتەي ساۋساعىمەن ەتىك جوندەيتىن ايەلدەر دە كەزدەسەدى ەكەن. ايەل زاتىنا ءتان ەمەس كاسىپتى سەرىك ەتكەندەر قاتارىندا گۇلدانا حاۋاشەۆا دا بار. ونىڭ كىندىك قانى مۇنايلى تۇبەك اتانعان ماڭعىستاۋ وڭىرىندە تامعان ەكەن. الايدا بالالىق شاعى اقتوبە وبلىسىنداعى رەسەيمەن شەكارالاس مارتوك اۋدانىندا وتكەن. وڭ-سولىن تانىپ, بويجەتكەن سوڭ 2002 جىلى تۇرمىسقا شىققان. سودان بەرى ماقات اۋدانىمەن اتتاس كەنتتە تۇرادى.
– بالا كەزىمدە كوك كوزدى قۋىرشاقتى قۇشاقتاپ, سارى شاشىن تاراۋعا ىقىلاسىم اۋعان جوق. اۋلاداعى گاراجدا تەمىر-تەرسەكتى اۋدارىپ-توڭكەرۋ, اياقكيىمدى جوندەۋ سەكىلدى ىستەردى ۇناتتىم. سول كەزدە ءسىڭلىمنىڭ سپورتتىق اياقكيىمىن جوندەپ بەرەتىن ەدىم. ەتىكشىلىك – ارعى اتالارىمىزدان كەلە جاتقان كاسىپ, – دەيدى گۇلدانا حاۋاشەۆا.
ونىڭ اڭسارى وزگە كاسىپكە ەمەس, ەتىكشىلىككە اۋدى. ءسويتىپ, 2006 جىلى بالا كەزىنەن قىزىققان ىسىنە دەن قويىپ, تاپسىرىس بەرۋشىلەردىڭ اياق كيىمىن ءوز ۇيىندە جوندەۋدى باستادى. العاشقىدا ونىڭ بۇل ىسىنە تاڭدانىس بىلدىرگەن از بولمادى. العاشىندا كۇدىكپەن قاراعانداردىڭ ءبارى كەيىن ونىڭ اياق كيىمىن جوندەتۋشىلەردىڭ قاتارىن كوبەيتتى. ال 2010 جىلى جەكە كاسىبىن اشۋ ءۇشىن ماقات كەنتىندەگى بازار اۋماعىنان دۇڭگىرشەكتى جالعا الۋعا بەكىندى. قىتاي وندىرىسىنەن شىققان «ۆەرسال» ماركالى تىگىن ماشينكەسى بار. جەكە كاسىبىنەن تابار ءناسىبىن مولايتۋ ءۇشىن «دامۋ» كاسىپكەرلىكتى دامىتۋ قورىنان نەسيە العان.
– جۇرەك قالاۋىمەن باستاعان ءىستىڭ جەمىسى بولارىنا كوزىم جەتتى. كەيدە شارشايتىن, دەنساۋلىققا كوڭىل بولەتىن ءسات بولادى عوي. سوندايدا كۇيەۋىم دە, بالالارىم دا كومەكتەسەدى. ءتىپتى قايىن اعالارىمنىڭ بالالارى ەتىكشىلىكتى مەنەن ۇيرەنۋگە نيەت ءبىلدىردى. تاپسىرىس بەرۋشىلەردىڭ ءتىزىمى جازىلعان 10-عا جۋىق قالىڭ داپتەرىم بار. ەتىگىن جوندەتكەن جانداردىڭ ەشقايسىسى رەنىشىن بىلدىرگەن ەمەس. ويتكەنى تاپسىرىس بەرۋشىلەردىڭ ەتىگىن ساپالى جوندەۋگە ءمان بەرەمىن, – دەيدى ءوز ءىسىنىڭ شەبەرى.
ەتىكشىنىڭ ايتۋىنشا, قاي كاسىپتىڭ دە قيىندىعى بار. كۇنىنە 30-عا جۋىق تاپسىرىس تۇسەدى. تۇتىنۋشىلاردىڭ ءبارىنىڭ تالعامى بىردەي ەمەس. ءبارى دە جوندەۋگە تاپسىرعان ەتىگىنىڭ جاڭادان كەم بولماعانىن قالايدى. ءبىرى تاعاسىن, ەندى ءبىرى سىرماسىن جاڭارتىپ بەرۋدى سۇرايدى. كەيبىر ەتىكتىڭ جىرتىعىن جاماپ, ۇلتانىن اۋىستىرۋ, بوياۋ سەكىلدى جۇمىستاردى اتقارۋعا توزىمدىلىك قاجەت.
قازىر ەتىكشى گۇلدانا حاۋاشەۆانىڭ شاعىن شەبەرحاناسى بار. تاپسىرىس بەرۋشىلەردىڭ ءبىرى كىرىپ, ەكىنشىسى شىعىپ جاتادى. ويتكەنى ەتىكشى كەلىنشەك اياق كيىمدى جوندەۋمەن شەكتەلمەي, تۇتىنۋشىنىڭ قالاعان تۇسىنە بوياپ بەرەدى. ءتىپتى ءتۇرلى كىلتتىڭ كوشىرمەسىن اينىتپاي جاسايدى.
ەندى ونىڭ اياق كيىم تىگۋدى قولعا الماق نيەتى بار. العاشقىسىن كۇيەۋىنە ارناپ تىككەن. كۇزگى ماۋسىمعا ارنالعان باتەڭكەنىڭ ولشەمى – 43. بىراق اياق كيىمگە قاجەتتى بىلعارى, ۇلتان, ءتىپتى كاپرون ءجىپتى وزگە ەلدەن الدىرۋعا ءماجبۇر بولىپ وتىر.
– ەلىمىزدە بىلعارى وڭدەۋ قولعا الىنسا, وتاندىق ءونىمدى قۋانا الار ەدىك. ويتكەنى ەتىكشىلەرگە ساپالى بىلعارى وتە قاجەت, – دەيدى ەتىكشى كەلىنشەك.
اتىراۋ وبلىسى
