قالا اتىمەن اتتاس «الماتى» قوناقۇيىندە ورىن تەپكەن اياداي مۋزەيدەن الما مەن الماتىنىڭ تاريحىنان سىر شەرتەتىن تاڭعاجايىپ دەرەكتەردى كەزدەستىرۋگە بولادى. الماعا قاتىسى بار اڭىزدار مەن ەرتەگىلەر, المانىڭ الەمگە قالاي تاراعانى تۋرالى اڭگىمەلەر, باقشاشىلىق جانە المانىڭ تاساسىنداعى تىلسىم ماندەرگە بويلاتاتىن تىڭ اقپاراتتاردىڭ بارلىعى وسىندا توپتاستىرىلعان. جوباعا مۇرىندىق بولعان «المالى جۇماق» قوعامدىق قورىنىڭ وكىلدەرى شاعىن مۋزەي جىل سايىن جاڭا جابدىقتارمەن تولىعىپ, مۇندا ونەر كورمەلەرى ۇدايى ءوتىپ تۇراتىنىن ايتتى.
– مۋزەيدى ۇيىمداستىرۋداعى ماقسات – قالا قوناقتارى مەن شەتەلدىكتەرگە ەلىمىزدى المانىڭ وتانى ەكەنىن جانە بۇل جەمىستىڭ الماتى مەن الەم ءۇشىن ماڭىزدىلىعىن پاش ەتۋ. ءبىز كوپ ماتەريال جيناقتادىق. ولاردىڭ اراسىندا وتاندىق جانە شەتەلدىك اۆتورلاردىڭ الما تۋرالى كىتاپتارى, قازاقستان – المانىڭ وتانى ەكەنىن دالەلدەيتىن فرانتسۋز جانە نەمىستەر تۇسىرگەن دەرەكتى فيلمدەر بار. ءبىز المالى ولكەمىز. وكىنىشكە قاراي قولدا باردى باعالامايمىز. ەكى رەت الما باعىن جوعالتتىق. ءاۋ باستا قالا باۋرايىنداعى الما ورماندارىنان ايىرىلدىق. توقسانىنشى جىلدارى قالانى ۇلعايتۋ سالدارىنان قانشاما الما اعاشى جويىلدى. ەلىمىزدەگى الما كاسىبىن جانداندىرۋ ءۇشىن بۇل تاقىرىپتى كەڭىنەن قوزعايمىز. الما – ءبىزدىڭ ايرىقشا قۇندىلىعىمىز, – دەيدى «المالى جۇماق» قوعامدىق قورىنىڭ باسشىسى اجار جاندوسوۆا.
قالانىڭ كونە مادەنيەتىنەن حابار بەرەتىن الماعا قاتىستى دەرەكتەردى ءجىتى زەرتتەپ, ۇرپاققا ۇلگى ەتۋدىڭ ماڭىزى زور. المانىڭ ارعى وتانىنا بالاناتىن الىپ مەگاپوليستەگى شاعىن مۋزەي قالا قوناقتارىن شاھار تاريحىنىڭ تىلسىمىنا بويلاتاتىن بىردەن-ءبىر مادەني ورىن.
الماتى
